Albistea entzun

Brasilgo Munduko Kopa

'Torpedo'-ren kutuna

Thomas Muellerrek 24 urte ditu, eta dagoeneko zortzi gol sartu ditu munduko kopetan. Haren herrialdean ziurtzat jotzen dute Ronaldoren gol errekorra hobetuko duela: hamabost.
Thomas Mueller, gol bat ospatzen, Portugalen aurkako partidan.
Thomas Mueller, gol bat ospatzen, Portugalen aurkako partidan. T. EISENHUTH / EFE

Imanol Magro Eizmendi -

2014ko ekainak 21

Ez da erraza Thomas Mueller (Pahl, Alemania, 1989) kutxa jakin batean sartu eta etiketa jartzea; golegilea eta futbolari anarkista. Anarkismoa zelai gainean, haren ideologia politikoa ez baita ezaguna, baina bai postu jakin batean geldirik egoteko duen zailtasuna. Eta golegilea dela estatistikak dio. Brasilgoa bigarren Munduko Kopa du, eta, Portugali sarturiko hirurekin, zortzi gol daramatza munduko kopetan. 24 urte ditu, eta litekeena da beste bi kopatan parte hartzea. Gauzak hala, hau da galdera: Ronaldoren 15 goleko marka hobetuko al du? «Bai, ziur nago», erantzun du Gerd Muellerrek aste honetan. Torpedo mitikoak hamalau sartu zituen kopetan, Miroslav Klosek adina, Alemaniako selekzioan oraindik.

Gerd eta Thomas futbolari ezberdinak dira. Hura morroi gogorra zen, eta hau, gazte alaia. Bata aurrelari gotorra zen, eta bestea, dozena erdi postutan jokatzeko gai den edozeintokilari trebea. Alemaniako selekzioan zein Bayern Munichen, aurrelari peto, eskuin hegaleko, erdi-punta eta erdilari postuetan jokatu izan du. Bi Muellerrek Bayern Municheko beheko mailetan elkar ezagutu zuten, eta Torpedo-ak oso gaztetatik ikusi zuen ume hura ezpal onekoa zela. Hamar urte geroago, haren kutuna da. Aurrelari ohia oso kritiko mintza ohi da selekzioaz hedabideetan, baina beste Muellerrekin eskuzabalagoa da.

Agian selekziora iritsi bezain laster 13 zenbakia lotsagabe eskatu zuelako izango zen. Goiz iritsi zen Mueller, 20 urterekin, Bayern Munichekin debuta egin eta urtebetera. Jurgen Klismannek eman zion lehen aukera; bedeinkatu zuena, baina, Louis van Gaal izan zen: «Nirekin beti jokatuko du». Hamahiru gol sartu zituen ligan, eta edozein postutan jokatzeko gai dela erakutsi zuen. Balioaniztasuna, baina, askotan zaila da eskema batean txertatzen, eta Pep Guardiolak, Bayerneko entrenatzaileak, Mandzukic aukeratu izan du aurrelari posturako sasoi honetako garai erabakigarrietan.

Selekzioan askatasun handiagoa du, merezi eta behar duena. «Ez da jokalari ortodoxoa», deskribatu izan du Joachim Low hautatzaileak: «Haren diagonal eta ihesak zaintzea oso zaila da aurkarientzat. Espero ez duzuna egiten duen jokalari bat da. Gauza bakarra dut argi haren jokoari buruz: golegile petoa da».

'Nor da Thomas Mueller?'

Alemanian ospetsua da Mueller, eta duela gutxi are ezagunago egin da, Wer ist Thomas Müller? dokumentalari esker (Nor da Thomas Mueller?). Christian Beyven zuzendariak, jokalariaren ospea ardatz hartuta, gizonezko alemaniarraren soslaia egin du. Thomas Mueller da Alemanian gizonezko izen-abizen zabalduena, eta izen bereko hainbat pertsona elkarrizketatu ditu, futbolaria barne: «Alemaniar normal bat naiz; herritar normalen artean tokia dut».

Eta nolakoa da, bada, prototipoa? Ilehoria, 1,78 metro neurtzen du, egunero bi garagardo edaten ditu, hiru egunean behin ditu sexu harremanak, 41 ordu lan egiten du astean, eta 87 metro koadroko pisu batean bizi da. Bada, hor ere, Mueller ezagunena ere desberdina da, zelaian bezala. Hasteko, 1,85 metro luze delako, eta beste Muellerrek ia ez dute kirolik egiten, eta bost kilo dituzte sobera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Alavesek galdu egin du azken minutuetan jasotako gol batengatik

Berria

Defentsan sendo aritu dira arabarrak, baina Ludmila da Silvak erabaki du partida jokaldi eztabaidagarri batean

 ©UNAI ZABALETA

«Eibarrekin Lehen Mailara igotzea baino ez daukat buruan»

Iñaki Berastegi

Etxean bikain abiatu du sasoia Eibarrek, baina etxetik kanpo, nahi eta ezin. Arbillaren ustez, partida guztiak irabazteko «gosea» izan behar du taldeak igoeragatik borrokatzeko.
Realeko Franssi eta Betiseko Leles, lehian, atzo Zubietan jokatutako norgehiagokan. ©ANDONI CANELLADA / FOKU

Merezi izatea ez da nahikoa izan

Ainara Arratibel Gascon

Realak puntu batekin konformatu behar izan du Betisen aurka. Nagusi izan da, baina gola sartu diote bi jokaldi soltetan, lehen zatiaren bukaeran eta bigarrenaren hasieran
Annemiek van Vleuten, podiumean, ortzadar maillota soinean, eta urrezko domina kolkoan. ©DEAN LEWINS / EFE

Lesioak ere ez du urrundu ortzadarretik

Beñat Mujika Telleria

Annemiek van Vleuten da munduko txapeldun berria. Giroaren, Tourraren eta Vueltaren ondoren, pokerra lortu du Herbehereetakoak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...