Noiz sortua: 2015-09-30 00:30:00

Aroztegiko plana bertan behera uzteko eskatu diote gobernuari

Baztanen (Nafarroa) 228 etxe egin nahi dituzte proiektuan.

Epaileek haren kontra egin dute.

Ondorioz, bultzatzaileek berriz aurkeztu, eta udalez gaindiko plan gisa onartu dute
Aroztegia Jauregia SM enpresak bere proiektua egin nahi duen eremua, Lekarozen.
Aroztegia Jauregia SM enpresak bere proiektua egin nahi duen eremua, Lekarozen. ANDONI CANELLADA / ARGAZKI PRESS

Edurne Elizondo -

2015eko irailak 30

Sententzien aurka, udalez gaindiko sektore plana. Hori da Aroztegia Jauregia SM enpresak erabili duen estrategia, Aroztegia... eta gero zer? plataformako eta Sustrai Erakuntza fundazioko kideek salatu dutenez. Proiektu horren sustatzaileek luxuzko 228 etxebizitza, bederatzi zuloko golf zelai bat, lau izarreko hotel bat eta spa gune bat egin nahi dituzte Baztanen, Lekarozko Aroztegia jauregiaren 45 hektareako eremuan. Epaileek atzera bota dute, ordea: 2013. urtean, lehendabizikoz, eta aurten, bigarrenez. Bigarren sententzia hori Espainiako Auzitegi Gorenak eman zuen, uztailean. Jakin baino lehen, proiektuan hainbat aldaketa egin, eta berriz aurkeztu zuten bultzatzaileek Nafarroako Gobernuan. UPN zen agintean, oraindik ere. «Foru intereseko inbertsiotzat» jo, eta udalez gaindiko sektore plan gisa onartu zuen gobernuak, maiatzeko hauteskundeak egin baino zenbait egun lehenago. Aipagarria da gobernuak berak urrats hori ez egitea erabaki zuela 2008. urtean.

Aroztegiko egitasmo horren aurkako plataformako eta Sustrai Erakuntza fundazioko ordezkariek atzo nabarmendu zuten egungo gobernua garaiz dela, oraindik ere, proiektu horren udalez gaindiko sektore plana bertan behera uzteko. Eta horixe egiteko eskatu zioten. Eskaera horrekin bat egin dute Lekarozko herri batzarrak eta Baztango batzar nagusiek ere.

Gobernuak, oraingoz, ez du jarrera argirik erakutsi. Manu Aierdi presidenteordeak atzo erran zuenez, ez dute erabakirik hartu. Aitortu zuen gobernua babesten duten lau taldeak ez daudela ados Aroztegiko proiektuaren inguruan. Geroa Bai egitasmo horren alde agertu da, hain zuzen ere. «Akordio programatikoaren jarraipen batzordeak aztertu beharko du gaia», erran zuen Aierdik atzo.

Lehendakariordeak nabarmendu zuen arlo politikoaz gain juridikoa ere kontuan hartu beharra dagoela: «Oraingoz ez dut ikusi udalez gaindiko sektore plana legez kanpokoa dela erraten duen txostenik; kontuan hartu beharko dugu, halaber, gure erabakiek ondarearen arloan erantzukizunen bat ekar ote diezaioketen gobernuari».

Sustrai Erakuntza fundazioak atzo argi utzi zuen auzitara joko duela gobernuak plana bertan behera uzten ez badu. Erabaki hori babestu zuen Aroztegia...eta gero zer? plataformak. Talde horretako kide Agurtzane Orbegozok salatu zuen Aroztegiko proiektuak eredu ekonomiko «espekulatzaile eta suntsitzailea» ekartzen duela. «Gobernuak planarekin aurrera jarraitzen badu, aldarrikatzen duen aldaketa iruzurra dela erakutsiko du», gaineratu zuen.

Hamaseigarren herria

Aroztegiko egitasmoaren aurkako plataformako kideek argi dute golf zelaia eta hotela aitzakia direla etxebizitzak egin ahal izateko. «Proiektuak bultzatzaileei baino ez die mesede egiten; Baztanen, berriz, ondorio sozial eta ekonomiko sakonak eraginen lituzke», ohartarazi zuen Orbegozok. 228 etxebizitza eraikitzea da Aroztegia Jauregia SM enpresako kideen asmoa. «Horrek Baztango hamaseigarren herri bilakatuko luke urbanizazio hori», erantsi zuen plataformako kideak. Talde bereko kide da Garbiñe Elizegi, eta atzo gogora ekarri zuen Baztanen badirela 850 etxebizitza huts: «Kontua da ea zer-nolako garapen urbanistikoa nahi dugun. Proiektuak erakar dezakeen jendea aipatzen dute sustatzaileek; gaur egun Baztanera etortzen diren bisitariek, ordea, ez dute Aroztegian egin asmo duten eredua nahi».

Proiektuak Baztanen izan dezakeen eragina jarri zuten egitasmo horren aurkako taldeek atzo mahai gainean. Lekarozko herritarrek zuzenean jaso ditzakete ondorio horiek. Hango alkate jurado Miren Meokik ezezko biribila eman zion proiektuari, eta herritarrak «gerta daitekeenaren beldur» direla nabarmendu zuen.

2009. urtean galdeketa egin zuten herrian, eta gehiengoak erran zion ezetz Aroztegiko egitasmoari. Orduan erabaki zuten abokatu bat kontratatzea, Aroztegiko proiektuaren aurka lan egiteko. «Ziurgabetasuna erabatekoa da; ikusten ari gara, gainera, denak ez garela berdinak legearen aurrean; proiektu hau bultzatzen ari direnek nahi dutena egiten dute, udalaren eta herritarren iritzia kontuan hartu gabe», erantsi zuen Meokik.

Baztango eragileek espero dute urriko lehen hamabostaldian emango duela Nafarroako Gobernuak udalez gaindiko sektore planari buruzko erantzuna. Bitartean, Aroztegiko proiektuaren aurka lanean jarraitzeko konpromisoa berretsi zuten atzo plataformako kideek eta herritarrek. Etzi, 19:00etan, batzarra eginen dute Lekarozen, hango biztanleei egitasmoari buruzko informazioa azaltzeko. Meokik herritar guztiak deitu zituen parte hartzera.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Edurne Elizondo

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna