Albistea entzun

Pampliega eta Lopez BERRIAko kolaboratzaileak desagertuta daude Sirian

Hilaren 10ean gurutzatu zuten muga, Turkiatik, eta azken bederatzi egunotan ez da izan bi kazetarien berririk.

Angel Sastre kazetaria ere desagertu da haiekin
Jose Manuel Lopezek Alepon ateratako argazki bat, iaz BERRIAn argitaratua.
Jose Manuel Lopezek Alepon ateratako argazki bat, iaz BERRIAn argitaratua. J.M. LOPEZ

Mikel Rodriguez -

2015eko uztailak 22

Antonio Pampliega kazetaria eta Jose Manuel Lopez argazkilaria desagertutzat jo dituzte Sirian. BERRIAko kolaboratzaileak dira biak, eta FAPE Espainiako Kazetari Elkarteen Federazioak baieztatu du hilaren 12tik Pampliegaren eta Lopezen hurbilekoek ez dutela haien berririk. Haiekin batera desagertuta dago Angel Sastre kazetaria ere. Espainiako Atzerri Ministerioak adierazi du «jakinaren gainean» dagoela. Espainiako ABC egunkariak eman du haien desagerpenaren lehenbiziko berria, eta bahiketa bat izan dela argitaratu du, iturri propioak aipatuta. Zenbait kazetarik azaldu dute kasua gaur arte ez argitaratzeko erabakia hartua zutela Pampliegaren, Lopezen eta Sastreren senideek, haiek bilatzeko lanak errazteko asmoz. Horregatik, eztabaida gogorra sortu du familiaren onespenik gabe berria lehenago argitaratzeak. Hiru kazetarien familiek «pazientzia», «errespetua» eta «diskrezioa» eskatu dituzte agiri batean, eta jakinarazi dute ez dutela adierazpenik eginen gertatutakoaren inguruan.

Elsa Gonzalez FAPEko presidenteak Espainiako Efe agentziari jakinarazi dionez, Pampliega, Lopez eta Sastre hilaren 10ean sartu ziren Sirian, Turkiatik muga gurutzatuta. Alepo probintzian sartu zirela erran du Lopezek. Uztailaren 12tik haien berririk ez dela adierazi du FAPEko presidenteak. Pampliegak bi egun lehenago egin zuen azken txioa Twitter sare sozialeko kontuan —atzo desagertu zen kontu hori—. Espainiako Atzerri Ministerioak ere ez du xehetasun handirik eman.

Bahiketa bati buruz zenbait hedabide mintzatu dira, iturri propioak aipatuta. Espainian, ABC-k argitaratu zuen atzo arratsaldean, esklusiba gisa. Titularra hirutan aldatu zuen: hasieran, secuestrados (bahituak) erabili zuen; ondoren, retenidos (atxikiak), eta, azkenik, desaparecidos (desagertuak). Siriako hedabide batek, berriz, argitaratu du Ahrar al-Xams brigadaren baimenarekin sartu zirela Sirian. Fronte Islamikoa osatzen duen koalizio islamistako talde armatuetako bat da Ahrar al-Xams. Siriako Gobernuaren aurka borrokatzeko sortu zen Fronte Islamikoa. Bahiketa bat izan dela argitaratu duten hedabideek, ordea, ez dute erran zein talderen eskuetan dauden, eta aldarrikapenen baten berririk ere ez dago.

Alepo probintzia erabat banatuta dago Siriako armadaren eta gainerako talde armatuen artean. EI Estatu Islamikoak probintziaren ekialdean du presentzia, eta ez du lortu Alepo hirian sartzea. Hiria eta probintziaren gainerako zatia banatuta dago armadaren, gobernuaren aurkako hainbat talde armaturen —horien artean Al-Qaedari lotutako Al-Nusra Frontearen— eta kurduen milizien artean.

Gatazken berriemaile

Pampliega 1982an jaio zen, Madrilen. Lopezek, berriz, 42 urte ditu, eta Leongoa da. Freelance modura egiten dute lan biek, gatazka guneetan. Pampliegak lau urte daramatza Siriara bidaiatzen, han gerra hasi zen urtetik (2011). Somalian eta Ukrainan ere egondakoa da azken urteotan. Lopezek hamahiru urteko esperientzia du, eta herrialde anitz ezagutu ditu: Afganistan, Irak, Palestina, Kosovo, Guatemala, Nagorno-Karabakh (Armenia eta Azerbaijan artean), Iran, Kongoko Errepublika Demokratikoa eta Siria. Munduko hedabide handiek argitaratu dizkiote argazkiak, eta nazioartean sariak irabazitakoa da.

Pampliegak eta Lopezek elkarrekin egiten dute lan, eta iazko udaberritik hainbat kolaborazio egin dituzte BERRIArekin. 2014ko maiatzaren 9an argitaratu zuten lehenbiziko erreportajea, Somaliatik egina: Indiako Ozeanoko perlaren ilusioa. Muqdisho hiriburuko bizi baldintzei buruz aritu ziren, Al-Shabab muturreko talde islamistaren aurkako gerraren testuinguruan. Ordutik, nagusiki Siriatik idatzi dute BERRIArentzat, baina baita Iraketik, Ukrainatik, Turkiatik eta Indiatik ere.

Iragan martxoan eta apirilean erreportaje bana argitaratu zuten Siria barneko Kurdistango Kobane hiritik, EIren 134 eguneko setioaren ondorena kontatzeko. Muturreko talde islamista iazko irailetik aurtengo urtarrilera arte saiatu zen Kobane hartzen, eta hiria erabat suntsituta gelditu zen borroken ondorioz. Turkiatik argitaratu zuten azken erreportajea BERRIArekin, joan den ekainaren 30ean; zehazki, Istanbuldik. Hor ere Siriako gatazka zuten hizpide. Estatu Islamikoaren infernua zuen titularra, eta kazetari bahituen gaia jorratu zuten. EIk iaz exekutatutako Steven Sotloff kazetari estatubatuarraren fixer edo itzultzaile-laguntzaile izandakoa elkarrizketatu zuen Pampliegak, Yosef Abobaker siriar gaztea. Abobaker bi astez eduki zuen bahituta EIk, Alepo probintziaren iparraldean. «Psikologikoki infernua da. Bakarrik zaude, eta burua etengabe biraka dabilkizu; zure txanda noiz iritsiko den galdezka beti», kontatu zion Abobakerrek Pampliegari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Melillako hesiak marraztak izan ohi ditu goialdean, Marokok kontrolatzen duen aldean. ©MARIA TRASPADERNE / EFE

Itsasoak ere baditu mugak

Jone Arruabarrena

Burdinazko hesi batek inguratzen du Melilla; mendietatik hasi eta itsasoraino hedatzen da. Herritar batzuek ihesi datozen migranteei laguntzen diete.
AEBetako jatorrizko herrien protesta bat, artxiboko irudi batean. ©E. GARCIA / EFE

Ezin eska indigenei besteek ezin dutena

Urtzi Urrutikoetxea

Erreserbak lurralde subiranoak izanik, abortatzeko debekutik kanpo daudela iradoki dute, baina asko uzkur daude. Begiradak oraintxe bideratu dira jatorrizko herrietara, baina gogoratu ere ez dira egin haietaz hamarkadotan utzikeria sufritu dutenean.
Serko Kaniwar da Zarok TV telebista kateko aurkezleetako bat. ©BERRIA

Haurrentzako telebista kate batek bizirik eusten dio kurduerari

Lara Villalon

Zarok TV kateak emititzen jarraitzen du, Ankarak aginduta itxi zuten arren. Kurdueraren dialekto guztietan ematen ditu saioak, eta helduek ere ikusten dute, hizkuntza ikasteko.
Polizia operazioaren kontrako manifestazio bat. ©BERRIA

Erdoganek prentsa librea isilarazi du

Orsola Casagrande

Iragan ekainaren 8an polizia operazio bat egin zuten zenbait kazetariren eta hedabideren kontra, Diyarbakirko fiskalak aginduta: hogei kazetari hartu zituzten atxilo. Turkiako Gobernuak prentsa askea mugatu nahi du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...