Albistea entzun

Brasilgo Munduko Kopa. Italia 0. Costa Rica 1

Borreroak txanoa kendu du

Costa Ricak ezustekoa eman du berriz, eta jada sailkatu da final-zortzirenetarako.

Italia baino gehiago izan da, eta ondo merezita irabazi dio.

Ingalaterra kanpoan geratu da
Costa Ricako selekzioko jokalariak, elkar besarkatuta eta saltoka, atzoko partidako garaipena ospatzen.
Costa Ricako selekzioko jokalariak, elkar besarkatuta eta saltoka, atzoko partidako garaipena ospatzen. KAI FORSTERLING / EFE

Imanol Magro Eizmendi -

2014ko ekainak 21

Gola. 0-1: Ruizek (44. min.). Epailea. Enrique Osses (Txile). Txartel horiak: Italiako Balotelliri eta Costa Ricako Cuberori. Bestelakoak. 40.285 ikusle Arena Pernambuco estadioan.

Ez da ustekabekoa honezkero. Heriotzaren multzoan, biktima borreroa bilakatu da, eta txanoa kendu du. Costa Ricak Uruguairi irabazi zion lehenbizi (3-1), eta atzo Italiari, bi munduko txapeldun ohi. Ez da zortea izan, ezta kasualitatea ere, bi partidetan Costa Rica aurkaria baino gehiago izan delako. Taldeak nortasuna du, Jorge Luis Pintok dituen baliabideak optimizatu ditu, bospasei jokalari on eta ahal fisiko handia. Argudio on eta sendoak dira, eta jada matematikoki sailkatuta dago final-zortzirenetarako. Ingalaterra, aldiz, kanporatuta dago. Bigarren txartela Italiak eta Uruguairen artean erabakiko da, asteartean. Berdinketak Italiari balio dio, gol aldeari esker.

Costa Ricak ekainaren 20a jai egun nazional bilakatuko du martxa honetan. Duela 20 urte, Italiako Munduko Kopan, egun horretan bertan sailkatu zen aurrenekoz final-zortzirenetarako. Orduan, balentriako egileek taxi bana jaso zuten, bizitza guztirako ogibidea izateko. Oraingoan, aldiz, futbol globalago batean, jokalari askok liga hobeetara jauzi egiteko erakusleiho on bat izan dute.

Costa Ricak begietara begiratu zion Italiari. Hautatzaileak irabaziko zutela esana zuen eta partidaren bila joan ziren. Ukituz jokatu zuen, atzetik jokoa eraikiz. Pase luzerik ez, talde handien antzera. Baloa ez zuenean, aldiz, oso goian presionatu zuen, eta Borges Pirloren itzal bilakatu zen. Lonbardiako jeinuak, baina, bi pintzelada on utzi zituen lehen zatian (30. eta 32. min). Bi pase neurtu Balotelliri, eta honek ez zituen baliatu area barrutik. Aurrenekoan gaizki loratu zuen baloia eta bigarrenean Navasek geldiketa ona egin zuen.

Jokoaren ekimena, dena den, Costa Ricak izan zuen. Zelai erdian baloia ukitzen duten bi jokalari trebe ditu, Bolaños eta Bryan Ruiz, eta haien erritmoan egiten du dantza. Aurrean Campbell da erreferentzia, temosoa, borrokalaria eta zorrotza. 43. minutuan Chielinik penaltia egin zion eta epaileak ez zuen adierazi.

Patuak, baina, hurrengo jokaldian kitatu zuen zorra Costa Ricarekin (44. min). Ertamerikako selekzioak ahal ikusgarria du aire jokoan. Uruguairi min asko egin zion erdiraketetan eta atzo Italia baino gehiago izan zen. Bada zerbait Uruguai eta Italia baino hobea izatea buruz. Bada Junior Diazek ezkerretik erdiraketa luzea egin eta Ruizek, bigarren zatian, buruz gola sartu zuen. Atsedenaldian emaitza justua zen.

Prandellik erreakzionatu zuen bigarren zatian, eta Cassano zelairatu zuen Pirlori oxigenoa emateko. Bata zaindu behar izateak bestea libratu zuen. Hala ere Italiak ez zuen arrisku handirik sortu eta talka egin zuen Costa Ricaren bost atzelariko defentsarekin.

Pintok, aldiz, estrategia aldatu zuen, taldea hamar metro atzeratu eta kontraerasoa bilatuz. Ezkerretik saiatu zen eta Diaz eta Bolañosen artean Abatte ernegatu zuten. Ikusgarria Junior Diaz atzeko lerroko ezker hegalekoak eginiko partida. Bukaera gerturatu ahala Italia baloi zuzenekin saiatu zen baina Balotellik nekea sumatu zuen. Uruguairen aurka egin bezala Costa Ricak ondo kudeatu zituen bukaerako minutuak eta azken jardunaldian lasai egongo da, lehen postua ia ziurtatuta baitu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©UNAI ZABALETA

«Eibarrekin Lehen Mailara igotzea baino ez daukat buruan»

Iñaki Berastegi

Etxean bikain abiatu du sasoia Eibarrek, baina etxetik kanpo, nahi eta ezin. Arbillaren ustez, partida guztiak irabazteko «gosea» izan behar du taldeak igoeragatik borrokatzeko.
Realeko Franssi eta Betiseko Leles, lehian, atzo Zubietan jokatutako norgehiagokan. ©ANDONI CANELLADA / FOKU

Merezi izatea ez da nahikoa izan

Ainara Arratibel Gascon

Realak puntu batekin konformatu behar izan du Betisen aurka. Nagusi izan da, baina gola sartu diote bi jokaldi soltetan, lehen zatiaren bukaeran eta bigarrenaren hasieran

Annemiek van Vleuten, podiumean, ortzadar maillota soinean, eta urrezko domina kolkoan. ©DEAN LEWINS / EFE

Lesioak ere ez du urrundu ortzadarretik

Beñat Mujika Telleria

Annemiek van Vleuten da munduko txapeldun berria. Giroaren, Tourraren eta Vueltaren ondoren, pokerra lortu du Herbehereetakoak
Nerea Arruti, garaipena ospatzen. ©Idoia Zabaleta / FOKU

Nerea Arrutik eta Andoni Iruretagoienak irabazi dute Euskal Pentatloia

Edu Lartzanguren

Iruretagoiena bigarren urtez nagusitu da. Iazko irabazle Karmele Gisasola bigarren geratu da.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...