Albistea entzun

Emakume gazteen ia erdiek lanaldi partziala eta soldata txikiagoa dute

Negoziazio kolektiboa «ardatz nagusitzat» jo du EGK-k, lan eremuan berdintasuna lortzeko
EGK-ko ordezkariak, atzo, <em>Ibilbide Moreak</em> txostenaren aurkezpenean.
EGK-ko ordezkariak, atzo, Ibilbide Moreak txostenaren aurkezpenean. JAIZKI FONTANEDA / ARGAZKI PRESS

Jon Rejado -

2016ko irailak 21 - Gasteiz

Lan eremuan dagoen gizon eta emakume gazteen arteko aldea neurtu du EGK Euskadiko Gazteriaren Kontseiluak. 16 eta 29 urte arteko emakumezkoen soldata, batez beste, adin bereko gizonezkoena baino 266 euro txikiagoa da, Araban, Bizkaian eta Gipuzkoan. Horren atzean zenbait arrazoi daudela azaldu du EGK-k, eta horietako bat nabarmendu: lanean ari diren emakume gazteen %48,9k lanaldi partziala dute; aldiz, gizonen %22,1 ari dira lanaldi partzial edo murriztuan.

Ibilbide Moreak: Emakume gazteen egoera lan munduan txostenean zehaztu ditu EGK-k datu horiek guztiak. Datuen bilakaera ere jaso du, baita soldatan dagoen aldea handituz joan dela jakinarazi ere. Hori ulertzeko, lanaldi partzialaz gain, beste arrazoi batzuk daudela hausnartu du. Batetik, kontratuen behin-behinekotasuna; ezaugarri hori gazteekin eta emakumeekin «guztiz lotuta» dagoela azaldu du EGK-k. Bestetik, ordainsarien osagarriek emakumeengan eragin negatiboa dutela nabarmendu du; adibidez, antzinatasunagatiko osagarria emakumeen kalterako da, behin-behineko kontratupean ari direlako lanean maizago.

Halaber, EGK-k berretsi du enplegu feminizatuak gutxiago baloratzen direla. Areago, azaldu du sektore feminizatuetarako bereizketa ikasketa hautua egiten denetik gertatzen dela. 2013-2014ko ikasturtean EHUn gradua amaitu zutenetatik %55,4 emakumezkoak ziren; Arkitektura edota Ingeniaritza graduetan zuten presentzia, ordea, txikiagoa izan zen: %29,9.

Bestalde, gazteria kontseiluak adierazi du emakumezko gazteek pairatzen dutela sexu jazarpen gehien. Argitu du menpekotasun hierarkikoak eta egoera ezegonkorrek hori ahalbidetzen dutela. Edonola ere, oraindik gai tabua dela gaineratu du EGK-k.

Konponbideak, oinarritik

Maialen Olabe EGK-ko presidentearen iritziz, negoziazio kolektiboa «ardatz nagusia» da lan eremuan gertatzen diren emakume eta gizonen arteko desberdintasunei heltzeko. Berdintasun Planak sustatzeko beharra ere nabarmendu dute Ibilbide Moreak txostenean, proposamen gisa; hain zuzen ere, Olaberen ustez, planak «estuki» lotuta daude negoziazio kolektiboarekin. Ordea, planetatik kanpo negoziatu ahal izatea aldarrikatu du. «Negoziazioan gizonezkoen nagusitasun bat dago; ekonomikoki kementsuak diren arlo ekonomikoetako sektoreen ordezkaritza maskulinoa da, eta emakumezkoen begirada eta ahotsa ez da heldu». Genero ikuspegia txertatzeko «berdintasun arloko sindikatu» baten sorrera iradoki du EGK-k.

Enpresei ere egin die deia EGK-k, proposamenak egiterakoan. Besteak beste, lan eremuan gertatzen den sexu jazarpenaren aurka protokoloak abiarazteko eskatu die. Tresna horiek prebentzioa eta erasoen aurreko jokabideak zehaztu beharko lituzkete, EGK-ren arabera. Halaber, langileen trebakuntzan, protokoloaren garapenean eta horren eguneratzean era zuzenean inplikatu beharko lirateke enpresak. Azkenik, politiken betetze maila neurtzeko «datu sakonagoak» eta «gaurkotuagoak» eskatu ditu EGK-k.

Administrazioetara helarazi

Txostena amaitu ondoren bertan landutako informazioa zabaltzeko lana hasiko du EGK-k. Batetik, administrazioekin hitz egiteko «irekita» daudela jakinarazi du Norma Ageitos EGK-ko berdintasun teknikariak: «Baditugu pare bat proiektu airean; oraindik ez dago datarik, baina aurrez aurre aurkeztu nahi diogu Gasteizko Udalari». Gipuzkoan jardunaldi bat egiteko asmoa ere badaukate, proposamen gehiago biltzeko.

Bestetik, EGK-k sindikatuei jakinaraziko dizkie azterlanaren emaitzak, eta horien ildotik eginiko proposamenak. Sindikatuek, besteak beste, Lan eta Berdintasun lantaldeetan duten ordezkaritza baliatuko dute horretarako. Txostena atzotik ikus daiteke EGKren webgunean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Adegiko ordezkariak, gaurko prentsaurrekoan. ©FOKU

Lehengaien eta energiaren prezio handiak dira Gipuzkoako enpresen kezka nagusi

Iñaut Matauko Rada

2023an Gipuzkoako ekonomia %0,5 eta %2 artean handituko dela aurreikusten du Adegik. Enpleguaren inguruko datuak pandemiaren aurrekoak baino hobeak direla gehitu dute.

Lan merkatuan ere nabaritu da urtarrileko aldapa

Lan merkatuan ere nabaritu da urtarrileko aldapa

Jokin Sagarzazu

Lanbidek eta Lansarek abenduan baino 2.495 langabe gehiago erregistratu dituzte, ia denak emakumeak. Gizarte Segurantzak 12.237 afiliatu galdu ditu hilabete batetik bestera

Sindikatuen banderak Hezkuntzako langileen manifestazio batean, iragan azaroan. ©Marisol Ramirez / Foku

ELA garaile hauteskundeetan, azken urtean indarra galdu arren

Iker Aranburu

Mitxel Lakuntzaren sindikatuak Hego Euskal Herriko ordezkaritzaren %36,08 dauka. Oso atzean ditu CCOO (%19,99) eta LAB (%18,95), baina LAB da 2018ko azken epealdi trinkotik ordezkaritza handitu duen bakarra.

Christine Lagarde EBZko presidentea, gaur. ©FRIEDEMANN VOGEL / Efe

EBZk %3ra igo ditu interesak, eta martxoan %3,5era iristeko asmoa du

Iker Aranburu

Eurogunea atzeraldian ez sartzeak eta inflazioa jaisteak ez du banku zentrala iragarritako bidetik atera. Interes tasak mugatik «urrun» daudela esan du Lagardek

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.