PSE-EEk eta EAJk batzorde guztien lema hartu dute Bizkaian

Bizkaiko Batzar Nagusietako batzordeak eratu dira. Oposizioak ez du parte hartu nahi izan
Bizkaiko Batzar Nagusietako batzordeen eratzea, atzo, Bilbon.
Bizkaiko Batzar Nagusietako batzordeen eratzea, atzo, Bilbon. BERRIA

Gotzon Hermosilla -

2019ko uztailak 23
Eratu dira Bizkaiko Batzar Nagusietako batzordeak, polemikaz eratu ere. EAJk eta PSE-EEk duten itunaren karietara, batzorde guztien lema eskuratu dute bi alderdiok: ohiko batzordeei dagokienez, zazpitan presidentea jeltzalea izango da, eta beste bitan, sozialista. Hori ikusita, EH Bilduk nahiago izan du bozketan parte ez hartu, «inposizioa» salatzeko, eta Elkarrekin Podemos eta Alderdi Popularreko batzarkideek boto zuria eman dute bozketa guztietan: «batzordeen funtzionamendua blokeatzen saiatzea» egotzi diote EAJk eta PSE-EEk oposizioari.

Agintaldi honetan, bederatzi ohiko batzorde izango dituzte Bizkaiko Batzar Nagusiek, aurrekoan baino bat gehiago, Ekonomiaren Sustapenerako Batzordea ere sortu baitute. Batzorde bakoitzean presidentea, presidenteordea eta idazkaria aukeratu behar zituzten: EAJk eta PSE-EEk euren arteko akordioa baliatu dute, eta batzorde guztietako presidentetza guztiak eskuratu dituzte.

Zehazki, EAJk zazpi bereganatu ditu horien artean, Ogasuna, Euskara eta Kirola, Azpiegituretakoa, Ekonomia Sustapenerakoa eta Gizarte Ekintzakoa, eta PSE-EEk, berriz, bi: Enplegu, Gizarte Inklusio eta Berdintasunerako Batzordea eta Garraio eta Mugikortasun Jasangarrirako Batzordea.

Ohiko batzordeez gain, hiru batzorde iraunkor ere badaude, Batzar Nagusietako funtzionamendua bermatzen dutenak. Batzarkidearen Estatutuaren Batzordea eta Eskaeretarako eta Herritarrekiko Harremanetarako Batzordea eratu dira PSE-EEk eta EAJk eskuratu dituzte presidentetzak, hurrenez hurren, eta gaur eratuko da hirugarrena, Arautegi eta Jaurbiderakoa.

Gainerako ardurak ere bai

Presidentetza guztiak eskuratuta, EAJren eta PSE-EEren asmoa zen gainerako arduretan —presidenteordeak eta idazkariak— tokia egitea oposizioko indarrei, baina oposizioak ez du hori onartu. EH Bilduk, esaterako, uko egin dio bozketan parte hartzeari, «inposizioa» salatzeko, eta ez du hautagairik aurkeztu. Elkarrekin Podemosek eta PPk boto zuria eman dute bozketa guztietan, eta haiek ere ez dute hautagairik aurkeztu ardurak betetzeko. Horren ondorioa izan da batzordeetako presidenteordetzak eta idazkaritzak ere EAJren eta PSE-EEren artean banatu dituztela —zenbaitetan, hiru bozketa ere egin behar izan dituzte mahaia osatzeko—. Hortaz, presidente, presidenteorde eta idazkari guztiak jeltzaleak edo sozialistak izango dira.

«Agintaldiaren hasiera eskasa» iritzi dio EH Bilduko Bea Ilardiak batzordeen eratzean gertatutakoari. Haren ustez, oposizioari «kudeaketa aukera guztiak» ukatu zaizkio, eta «fiskalizaziorako eta kontrolerako tresna» EAJren eta PSE-EEren esku gelditu da.

Ilardiak gogorarazi du EH Bildu Bizkaiko bigarren indarra dela, eta haien proposamena zela «presidentetzen banaketa modu proportzionalean» egitea. «Gure jarrera irekia izan da, baina EAJk eta PSEk kargu guztiak euren artean banatzea erabaki dute».

EH Bilduk azaldu duenez, hori Bizkaian baino ez da gertatu, Araban, Gipuzkoan eta Nafarroan batzordeak «modu proportzionalean» banatu baitira.

Beste ondorio bat ere izan du batzordeetako mahaiak modu horretara eratzeak: lau batzordetan —Ogasuna, Azpiegiturak, Garraio eta Mugikortasun Jasangarria eta Ekonomia Sustapena—, mahaia osatzen duten guztiak gizonezkoak dira.

«Berdintasun parametroak bete gabe» geratu izana salatu du Ilardiak, are gehiago kontuan izanik Batzar Nagusiek badutela berdintasun plana.

EAJk eta PSE-EEk, aldiz, «batzordeen funtzionamendua blokeatzen saiatzea» leporatu diote oposizioari. «Haien esku zegoen batzorde guztietako presidenteordetzetan eta idazkaritzetan egotea, baina haien helburu bakarra izan da aitzakia merke eta faltsua bilatzea EAJri eta PSE-EEri kritika egin ahal izateko».

Gobernua osatzen duten bi alderdiek « harridura» azaldu dute «oposizioko alderdiek erakutsi duten interes falta» dela eta: «Erantzukizuna euren gain hartu eta Bizkaiko herritarrei azaldu beharko liekete zergatik egon diren prest batzordeen funtzionamendua blokeatzeko».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna