Ikaskuntzei eta erronkei erreparatuko diete azken Foro Sozialean

Bakea eraikitzeko prozesu berezia. Ikaskuntza partekatuak etorkizuneko erronketarako lelopean egingo dute VI. eta azken Foro Soziala martxoaren 17an eta 18an, Iruñean eta Donostian. Foro Sozial Iraunkorreko eledun Agus Hernanek eta Nekane Altzelaik eman dute egitarauaren berri, eta azken asteetan egindako bilkuretatik ateratako ondorio nagusiak ere plazaratu dituzte.

Foro Sozial Iraunkorrak bere ibilbideari amaiera ematea erabaki zuen urtarrilean, eta, ordutik, azken urteetako lanaren balantzea egiten aritu da beste zenbait eragilerekin. Gizarte zibileko 120 erakunde eta norbanako inguru batu zituzten Durangon (Bizkaia) eta Iruñean, eta, azken asteetan, eragile politikoekin ere elkartu dira: Eusko Jaurlaritzako eta Nafarroako Gobernuko ordezkariekin, eta EAJ, EH Bildu, PSN, PSE-EE, Geroa Bai eta Elkarrekin Podemoseko kideekin. Euskal Preso Politikoen Kolektiboko ordezkaritza batekin eta estatuaren biktimekin ere izan dira. ETAren biktimen kasuan, berriz, banakako bilerak egiten ari dira antolatu gabeko biktimekin.

Bilera errondaren ostean, Foro Sozial Iraunkorrak adierazi du eragile guztiek azaldu dutela 2016tik orain artekoa «bide partekatu bat» izan dela, eta bitarte horretan «aurrerapen handiak» egin direla. Esanguratsuenak gizarte zibilaren eta erakundeen arteko elkarlanari esker lortu direla ere esan dute. «Eragile askok egin dute ekarpena. Ekarpen horiei esker, aurrera egiteko agertoki hobeak sortu dira».

Era berean, eragileek adierazi diete foroaren ekarpenek modua eman dutela adostasunak lortzeko, «mikroakordioak lortzeko egin duen lan diskretuagatik».

Foro Sozialeko kideek adierazi dute «konfiantzazko guneak» eratu ahal izan direla azken urteetan, eta horrek aurrerapenak ehuntzea erraztu dutela: «Krisialdiak iritsi direnean, gainditu egin dira, hain zuzen ere, eragileek batzen gaituena lehenetsi dutelako desadostasunen gainetik». Orain, baina, uste dute fase bat «ixten» ari dela bakea eraikitzeko prozesuan.

Diagnostikoan sakondu

VI. Foro Soziala «diagnostiko partekatu» batean «sakontzeko» eta «egiteko dauden lanak identifikatzeko» baliatuko dute. «Bake etorkizuna eraikitzeko baliagarriak izango diren ikaskuntzak atera nahi ditugu».

Martxoaren 17an ekingo diote, Iruñeko Planetarioan, eta Donostiako Kursaalean amaituko da, biharamunean. Zenbait mahai inguru egingo dituzte egindako urratsak, aurrera begirako erronkak eta gizarte zibilaren rola aztertzeko. Parte hartzaileen artean egongo dira Brian Currin nazioarteko bitartekaria eta Veronique Dudouet Berghof fundazioko kidea, besteak beste.