Zelenskiren ustez, Errusiak «arma gisa» erabiltzen du elikagai urritasuna

Volodimir Zelenski bideokonferentziaz mintzatu zen iaz NBE Nazio Batuen Erakundearen Batzar Nagusian, baina atzo ez; atzo erakundearen egoitza nagusian egon zen Ukrainako presidentea, New Yorken, eta salatu zuen Errusiak «arma gisa» erabiltzen duela elikagai urritasuna. Izan ere, Errusia zerealen itunetik atera zen uztailean, eta, hortaz, atzera, iazko otsailean inbasioa hasi zenetik abuztura bitartean bezala, Ukrainak ezin ditu laboreak garraiatu Itsaso Beltzetik. «Ez da soilik Ukrainaren kontrako erabaki bat. Afrika mendebaldeko kostaldetik Asia hego-ekialderaino ari da nabaritzen inpaktua».

Ukrainako presidenteak babes bila jo du AEBetara. Bihar JoeBiden hango presidentearekin da biltzekoa —biek azken hamar hilabeteotan egingo duten aurrez aurreko laugarren bilera izango da—.

Eta gaur NBEren Segurtasun Kontseiluan hitz egitekoa da Zelenski. Nahi du Errusia ez izatea segurtasun kontseiluko kide iraunkorra; hau da, kanporatu dezatela organo horretatik. Errusiaz gain, Txina, Frantzia, Erresuma Batua eta AEBak dira kide iraunkorrak, eta beto eskubidea dute. Herrialde horietako estatuburu edo gobernuburuen artean, Biden da asteon batzar nagusian parte hartuko duen bakarra. Zelenskik atzo aurreratu zuenez, iazko batzar nagusian «bake formula baten lerro nagusiak» plazaratu zituen, eta gaur, segurtasun kontseiluan, bere «asmoa»da horren «xehetasunak» aurkeztea.

Biden izan zen atzo jendaurrean mintzatu zirenetako bat, eta Etxe Zuriko maizterrak berretsi zuen jarraituko dutela Ukrainari laguntzen. Paraleloki, Kievi ekipamendu militarra ematen segitzeko eskatu zien Lloyd Austin AEBetako Defentsa idazkariak,NATO Ipar Atlantikoko Itunaren Erakundeko kideei, atzo, Ramsteinen (Alemania), Ukrainaren Defentsarako Bitartekarien Taldearen bileran.

Babes diplomatikoa ere behar du Ukrainak, Errusiaren inbasioa hasi zenetik urte eta erdi igaro den honetan. Izan ere, aintzat hartu behar da G20 taldeko herrialdeek duela bi aste saihestu egin zutela gerra gaitzestea, nahiz eta adierazpen bateratuan «estatu guztiei» eskatu zieten lurralde batasuna errespetatzeko.

AEBetako presidenteak nabarmendu zuen atzo Errusia dela Ukrainako gerraren «erantzule bakarra» eta hark duela hori «berehala» bukatzeko gaitasuna. NBEko kideei esan zien «eraso izugarriaren» aurrean «irmotasuna» mantendu behar dela. «Modu horretan, etorkizuneko balizko erasotzaileei asmoak kenduko dizkiegu».

Ez zuen aipatu gerra amaitzeko negoziazio baten aukera. Bai, ordea, Luiz Inacio da Silva Lula Brasilgo presidenteak. NBEko estatuak deitu zituen «negoziazio espazio bat» sortzeko helburuarekin lan egitera. «Ez ditzagun gutxietsi bakea lortzeko zailtasunak, baina irtenbide bakar bat ere ez da iraunkorra izango, ez baldin bada elkarrizketan oinarritzen».

Recep Tayyip Erdogan Turkiako presidenteak ere diplomaziaren bidea ibiltzea aldarrikatu zuen, eta ohartarazi zerealen ituna bertan behera geratu izanak beste krisi bat eragin duela munduan —Errusiak, Ukrainak,Turkiak eta NBEk sinatu zuten akordio hori iazko uztailean

2030 Agenda betetzea asmo

Ukrainako gerra gorabehera, atzo hasi eta datozen egunetan New Yorkeko egoitzan egingo dituzten bileren asmoa da, NBEren beraren arabera, Garapen Jasangarrirako 2030 Agendan jasotako hamazazpi helburuak betetzen ahalegintzea. 2015ean adostu zituzten, eta, gaur-gaurkoz, bete gabe daude; batez ere, garabidean dauden herrialdeetan. Horiek laguntza eskatzen diete Mendebaldeko herrialdeei. «Gose direnak elikatzen ez baditugu, gatazkak elikatzen ari gara», adierazi zuen Antonio Guterres NBEren idazkaria nagusiak atzo, saioa irekitzeko.