Albistea entzun

Bost erakusketa egongo dira ikusgai aurten Bilboko Azkuna zentroan

Erakusketez gainera, beste 200 jarduera baino gehiago programatu dituzte, eta arte bisualak indartzea izango du ardatzetako bat zentroak
Juan Mari Aburto eta Fernando Perez, atzo, Azkuna zentroan.
Juan Mari Aburto eta Fernando Perez, atzo, Azkuna zentroan. ARITZ LOIOLA / FOKU Tamaina handiagoan ikusi

Olatz Enzunza Mallona -

2022ko urtarrilak 20 - Bilbo

«Aurtengo urtea ez dugu nahi bezala hasi, baina, zalantzarik gabe, kulturak ilusioa berreskuratzen lagunduko digu». Itxaropentsu dago Juan Mari Aburto Bilboko alkatea, eta ez da gutxiagorako. Bilboko Azkuna zentroak 200 jardueratik gora eta bost erakusketa programatu ditu 2022rako. Zentroa kultura garaikidearen lantegi «bizi, aktibo eta askotarikoa» bihurtu dela nabarmendu du Fernando Perez zuzendariak, eta aurrerantzean ere bide beretik jarraitu nahi dute.

Martxoaren 11n irekiko dute lehenengo erakusketa: Ahots bat Erausorentzat. Trans garai baterako epilogoa. Cabello/Carceller kolektibo artistikoak ekoitzitako lana izango da, eta Paul B. Preciado arituko da komisario lanetan. 1626an Katalina Erausori egindako erretratu bat izan da proiektuaren abiapuntua, eta, performancea, fikzioa, kontakizuna eta bideoa nahastuz, pertsonaiaren ertzak agerian jarriko ditu. «Katalina Erausoren pertsonaia oso presente eta gaurkotuta agertuko da erakusketa osoan», azaldu du Perezek. Besteak beste, gorputza, generoa, identitatea eta antzeko beste gai batzuk landuko dituzte.

Cabello/Carceller bikoteak Erausoren erretratu berri bat egin du, eta erakusketan kontakizun historikoaren eraikuntza eta queer eta trans politika garaikideak harremanetan jarriko dituzte. Horrez gain, bigarren hezkuntzako ikastetxeentzako hezkuntza programa bat ere jarriko dute martxan, eta bisitak zein tailerrak ere eskainiko dituzte.

Hurrengo erakusketa udazkenean iritsiko da Azkuna zentrora, Somewhere from here to heaven izenburupean. Hainbat belaunalditako zinemagileen konstelazioa marrazten duen ikus-entzunezko erakusketa bat izango da, eta Garbiñe Ortega arituko da komisario lanetan. Bruce Baillie zinemagilearen ibilbidean oinarrituta egongo da nagusiki.

Bi horiez gainera, beste bi erakusketa programatu dituzte BAT Espazioan: Sahatsa Jauregiren Aizkora eta Isidoro Valcarcelen Arquitecturas prematuras. Bestalde, Mediateka Galeriak, Maria Ptqk-k komisario duela, Ciencia Fricción erakusketa hartuko du.

Halaber, aurtengo proiektuen artean egongo dira, besteak beste, Gutun Zuria Bilboko Letren nazioarteko jaialdia —martxoaren 29tik apirilaren 2ra egingo dena—; eszenAZ arte eszenikoen denboraldia; musika esperimentalaren Hotsetan programa eta DendAZ euskal diseinuei ikusgarritasuna emateko gunea. Bestalde, urtero legez, zinemak eta ikus-entzunezkoek ere izango dute lekua programazioan. Aurten, Iciar Bollaini eskainitako ziklo monografiko bat antolatu du zentroak. Eta, horren ondoren, emakumezko zinemagileek zuzendutako film sorta bat eskainiko dute. Baina, badago berrikuntza bat: Euskal Herriko Unibertsitatearekin batera, arte eta kultura garaikideko praktikari eta teoriari buruzko masterra jarriko du martxan zentroak, urrian.

Guztira, 180 artistak eta sortzailek baino gehiagok osatuko dute Azkuna zentroko komunitate artistikoa. «Horiek izango dira gure programazioaren muina», adierazi du zuzendariak.

Askotariko publikoa

Joan den urteari dagokionez, urte «zaila» izan dela onartu du Aburtok, baina egindako balantzea positiboa da: bi milioi bisitari baino gehiago izan ditu zentroak, guztira. «Ekintza askotarikoak, gehienbat doakoak eta kalitatezkoak eskainiz, Bilbok duen programazioaren parte da Azkuna zentroa», adierazi du alkateak.

Zentroko zuzendariak ere publikoaren «erantzun ona» nabarmendu du, eta bisitarien artean dagoen «aniztasuna» goraipatu du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Larraza, Areta, Leitza, Quintana, Goikuria, Skalari, Mendinueta eta Jaka, Beietz taldeko kideak. ©BERRIA

Abiapuntu berriak ospatuz

Yasmine Khris

Beietz talde arbizuarrak bere bigarren diskoa argitaratu du, 'Askatu aingura'. «Jai giroan murgiltzeko» zortzi kantuz osaturiko lana da
Vangelis, 2001ean, Atenasen emandako kontzertu baten amaieran. ©Simela Pantzartzi / Efe

Vangelis musikaria hil da, 'Chariots of Fire' filmaren soinu bandaren egilea

Andoni Imaz

Musikari greziarra elektronikaren aitzindarietako bat izan zen, eta askotariko estiloetako dozenaka lan eman zituen argitara. 79 urterekin hil da.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.