Tirabirak EEPn, euskarazko irakaskuntzari jarri trabagatik

Kurutxarrik ohartarazi du Frantziako Hezkuntza Ministerioaren erantzunik ez badute urriaren 15eko biltzar nagusia «beroa» izanen dela
Hautetsiak protestan, Hiriburuko eskola publikoaren aitzinean.
Hautetsiak protestan, Hiriburuko eskola publikoaren aitzinean. GUILLAUME FAUVEAU Tamaina handiagoan ikusi

Ekhi Erremundegi Beloki -

2020ko urriak 8

Mobilizazioa eginen dute euskalgintzako eragileek larunbatean, Baionan, euskarazko irakaskuntzak murgiltzea behar duela aldarrikatzeko. Hiriburuko (Lapurdi) Baste Quieta eskola publikoan euskara hutsezko esperimentazioa egitea ukatu zuen uztailean Bordeleko errektoretzak, eta ordutik afera ez da konpondu. Baliteke urriaren 15eko EEP Euskararen Erakunde Publikoaren biltzar nagusia gatazkatsua izatea, baina Baionako suprefetak aditzera eman du ordurako egoera alda daitekeela.

Astelehenean izan zen EEPren bulegoko bilkura. Oraindik erakunde publikoko lehendakari izendatu ez badute ere, Antton Kurutxarri Euskal Elkargoko hizkuntza politikarako lehendakariordeak gidatu zuen —urriaren 15ean izendatu behar lukete—. Euskarazko irakaskuntzaren gaia mahai gainean ezarri zuten, eta azken asteetako blokeatzearen aitzinean aurkitu ziren: «Herve Jonathan Baionako suprefetak eta François Xavier Pestel Akademia ikuskariak ez dute deus berririk proposatzen», azaldu dio Kurutxarrik BERRIAri. Hezkuntza Ministerioari bilkura eskatu zioten EEPn ordezkaritza duten erakundeetako hautetsiek, baina gaur-gaurkoz ez dute erantzunik izan. «Suprefetak erran digu beharbada proposamen bat izanen zela», adierazi du. Oraingoz ez dute deus zehatzik. «Guretzat, urriaren 15a da epea. Astebururako erantzunik ez badugu, biltzar nagusi beroa izanen da». Suprefetari zuzenki galdetu zion BERRIAk asteartean. Honen arabera, «oraingoz, ez da deus berririk».

Kurutxarrik azpimarratu du gaur egun murgiltze eredua dela irakaskuntzaren bidez gazteak euskalduntzeko eredurik onena. «Horixe jartzen dute zalantzan, eta haien aldetik ez dugu hori esplikatzen duen erantzunik. Juridikoki ez du zutik egoteko kolorerik! Badakigu erabakia ez dela ez juridikoa, ez pedagogikoa... ideologikoa da. Hori entzun nahi dugu Ministeriotik».

2022 arteko hitzarmena

Kurutxarrik nabarmendu du EEPren biltzar nagusiak 2022 arte euskarazko irakaskuntza garatzeko «programa» adostua duela; akademia ikuskariak eta suprefetak ere izenpetu zuten hitzarmena. «Ez bada Hezkuntza Ministerioaren erantzunik, bulegoan aipatu dugu badela programa bat zehazturik, eta hirurek [Euskal Elkargoak, Pirinio Atlantikoetako Departamenduak eta Akitania Berria Eskualdeak] atxiki nahi dugu. Hori landu dugu zerbitzuekin. Lan programa horretan, murgiltze galderei erantzutea sartu dugu», esplikatu du. Herri batzuek badituzte eskaerak eginik, murgiltze ereduaren esperimentazioak martxan ezartzeko; bizpahiru daudela aipatu du Kurutxarrik, horien artean dago Larraine (Zuberoa).

Kurutxarrik ohartarazi du EEPren biltzar nagusiko gai ordenan ezarri dutela gaia. Baina akademia ikuskariak eta suprefetak gai ordenatik kendu nahi lukete, haren arabera. Urriaren 15eko bilkuran izanen duen jarreraz galdetuta, honela erantzun du Herve Jonathan Baionako suprefetak: «Estatuaren posizioa ezaguna da, eta, gaur-gaurkoz, nik hori defendatuko dut urriaren 15eko biltzar nagusian. Baina hemendik urriaren 15era gauzak alda daitezke».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Eguberrietako argiak, lehengo astean, Donostian. ©JUAN HERRERO / EFE

Gabonetan familia bisitatzeko baino ezingo da erkidego artean ibili

Arantxa Iraola

Espainian itun bat egin dute. Gabon gauean eta Urtezaharrean 01:30 arte ibili ahalko da kalean
Txertoak jartzeko xiringak, osasun etxe batean. ©GORKA RUBIO / FOKU

Intzidentzia metatu handiena dutenen taldetik irten da Nafarroa

Ion Orzaiz

Hego Euskal Herrian 629 positibo atzeman dituzte, eta positibo tasa %5,9 da. Aurreko astean 112 lagun hil ziren izurriaren ondorioz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.