Helburu desberdinak jokoan

Irabazteko beharrak elkartuko ditu gaur IDK eta Gernika, Gaskan jokatuko duten derbian (19:30, Twitch FEB). Donostiarrek azkeneko hamar neurketak galdu dituzte liga eta Eurokopa kontuan hartuta, eta Azu Muguruzak «profesionaltasun falta» leporatu zion taldeari azken partidan. Gernikarrek beste bide bat izan dute azken neurketetan. Zazpi partida irabazi zituzten jarraian, baina, orain, lau porrot iritsi dira jarraian. Hala ere, Espaniako Kopa jokatzeko lehia bizian murgilduta daude gernikarrak, eta irabazteak helburu horretara hurbilduko lituzke.

Urte amaiera oso txarra izan da IDKrentzat. Jarraian hamar partida galdu izana ez baita Muguruzak daukan buruhauste bakarra. Klubak atzo ezagutarazi zuen Kadri Lassek taldea utzi duela. Prestatzailearen arabera, Estoniako hegal pibotak berak eskatu dio taldeari kontratua eteteko, eta denboraldia hasi zenetik taldea utzi duen hirugarren jokalaria da, aurrez gauza bera egin baitzuten Ivana Racak eta Ane Esnalek. Prestatzailearen ustez, «hasieratik» okertu ziren gauzak: «Ustezko titularrak huts egin zuen [Racak]. Beharbada, rol aldaketa hori gehiegi izan zen harentzat, eta, horretara iritsita, taldea uztea erabaki du».

Gaur-gaurkoz, bederatzi jokalari baino ez ditu Donostiako taldeak, eta «daukanarekin» jokatuko duela esan zuen atzoko prentsaurrekoan Muguruzak. Hala ere, taldeak bi fitxaketa egingo dituela adierazi zuen prestatzaileak: «Urtarril hasieran, bi jokalari iritsiko dira. Baina hemen daudenek aurrerapausoa eman beharko dute haiek iritsi arte».

Gernikaren aurkakoari buruz, «partida garrantzitsua» dela esan zuen donostiarrak, eta Gernikak ere «aldaketa asko» izan dituela taldean: «Guretzat, irabaztea da garrantzitsuena orain. Ez dakit noiz irabaziko dugun, baina gugan sinesteko balioko digu»

Gernika, ordea, donostiarren bolada txarra luzatzen ahaleginduko da. Anna Montañanarenek ez dute goiko postuetatik aldendu nahi, eta entrenatzaileak argi utzi du Kopan egotea dutela helburu. Datozen hiru partidetan erabakiko da zein zortzi talde arituko diren Zaragozan.

Azken hiru partidei ere erreparatu zien Montañanak. Hirurak etxetik kanpo jokatu ditu Gernikak, eta «maila onean» aritu zirela uste duen arren, ezin izan ziren gailendu: «Orain aste batzuk izan zitekeen baino garrantzitsuagoa izango da IDKren aurkako partida». Montañanaren ustez Eurokopa jokatzeak «kalte» egin die donostiarrei, baina ohartarazi du «erasoan lagundu dezaketen jokalari asko» dituela IDK-k. Gakoa «defentsako lanean» egongo dela uste du, eta errebotea «zaindu» beharko dutela.