Albistea entzun

ATZEKOZ AURRERA. Daniel Burgi. Kazetaria

«Istorio pertsonalek harilkatzen dute hain zabala den liburu hau»

Hamabost lagun Europan bizikletan ibili ziren, iaz, D2016ren Biziz proiektuaren barruan; tartean, Burgi. 'Europa Biziz! Aniztasunaren bitakora' liburuan jaso ditu proiektuak emandakoak.
UNAI BEROIZ Tamaina handiagoan ikusi

Julen Aperribai -

2017ko ekainak 9

«Europako bizi estiloaren» bost arlo desberdinekin lotutako ibilbide bana; eta, guztira, 15.000 kilometro. Europako hainbat hiritatik etxerako bidea hasi zuten iazko ekainean, bizikletaz, hamabost lagunek. Daniel Burgi (Iruñea, 1985) horietako bat izan zen, eta, bidaiatzeaz gain, horren berri ematea ere egokitu zitzaion, beste lau laguni bezala. Bidean elkarrizketatutako lagunen esperientzietan oinarrituz, Europa Biziz! Aniztasunaren bitakora liburua kaleratu du.

Argi zenuten hasieratik proiektua liburu batera eramango zenutela?

Ez zen hori hasierako asmoa. Baina pentsatu genuen material oso interesgarria bildu genuela, Europako aniztasuna erakusten zuena, eta gorrotoaren diskurtsoaren eta klixeen kontra egiten zuena. Proiektuan hori guztia islatu nahi genuen, eta urte amaieran sortu zen liburu forma emateko aukera. Bidaian ezagututako lagunen istorioak erakutsi nahi genituen; ez genuen nahi bidaia liburu soil bat izatea.

Liburuak zein erabilera izatea nahi zenuke?

Liburu berezia da. Gai ugari ukitzen ditu, eta, aldi berean, dibertigarria eta motibagarria da. Horrez gain, eta, batez ere, bizi dugun atsekabe globalaren aurrean eta instituzioen, gobernuen eta estatuen gainetik, jende arruntaren esperientziak gailentzen dira, goizean goiz esnatzen direnena eta euren komunitatearen alde lanean ari direnena. Liburuak zabalpena izatea nahi nuke: eskola eta institutuetan presente egon dadila, eta jendeak Internet bidez deskargatu dezala.

Pertsona arrunten istorioetan zentratu nahi izan duzue?

Bost ibilbidetan banatuta egon da proiektua, eta ibilbide bakoitzetik onena erreskatatzea egokitu zait. Konturatu nintzen ibilbide guztiak batzen zituena horietan ateratzen ziren pertsonak zirela. Istorio pertsonalek harilkatzen dute hain zabala den liburu hau.

Bidaian, zenbateraino zenuten egin beharrekoa aurrez lotuta eta zenbateraino izan duzue inprobisatu beharra?

Proiektuak hiru fase izan ditu. Bidaiari dagokionez, batzuetan ez zen erraza gure eginbeharra. Denbora mugatua genuen, eta jendearekin harremanetan jarri behar genuen, haiekin gelditu eta hurrengo egunean berriz bidaiarekin jarraitzeko. Batzuekin bigarren aldiz jarri gara harremanetan liburua idazteko orduan. Inprobisazio puntu bat ere egon da. Errumanian, adibidez, Adrian izeneko artzain batekin topo egin, eta elkarrizketatu egin genuen. Arbizun [Nafarroa] lan egindakoa zen, eta euskara apur bat ere hitz egiten zuen.

Bizitzaren arlo desberdinei loturiko ibilbideak osatu dituzue. Zuek hala erabakita?

Bidaia Donostia 2016 hiriburutzak berak proposatu zuen. Europako bizitza nolakoa den ikusarazi nahi zuten, bizitzaren bost arlo garrantzitsu kontuan hartuta: arkitektura, gastronomia, sexualitatea, komunitateak eta biodibertsitatea. Planteamendu hori bere horretan jaso genuen. Liburuan ere mantendu egin dugu, kapituluak antolatzeko modu erraza delako.

Arlo horien bidez, Europako bizi estiloa irudikatzea zen proiektuaren helburuetako bat. Hitz egin al daiteke, egun, Europako bizi estiloaz?

Ez, noski. Aniztasunaren eguneroko moduko bat irudikatu nahi izan dugu, eta ideia horixe azpimarratu nahi dugu. Europak dituen 10.000 kilometro koadroetan baino aniztasun handiagoa ez da munduko beste edozein lekutan. Europa zerbaitek batzekotan, bertan bizi den jende pluralak egiten du. Zorionez, munduari irekia dago. Europako bizi estiloa noizbait existituko bada, gure mezua da mestizajean oinarritua egon behar duela. Desberdintasunak elkartzen gaitu, azken batean.

Diozun aniztasun hori ez da leku guztietan berdin islatuko, ezta?

Asko aldatzen da leku batetik bestera. Hala ere, badira espero ez dituzun gauzak. Askotan, ekologiaren kasuan bezala, iparraldeko herrialdeak hartzen dira eredutzat. Danimarka, Herbehereak, Alemania... oso kontzientziatuta daude arlo askotan. Hala ere, Herbehereetan, esaterako, gizakiak guztiz eraldatu du paisaia naturala, XVI. mendetik hona. Gizakiaren esku hartzea ikaragarria izan da, baina ez dugu irudi hori herrialde hartaz.

Eta bidaian ukitu dituzuen arlo horiek guztiek zer-nolako lekua dute Euskal Herrian?

Azken batean, guk testigantza batzuk eraman ditugu liburura. Baina begiak zabaltzeko modu bat ere bada, eta konturatzekoa euskal herritar batek eta beste edozein txokotako pertsona batek elkarrekin gauza asko izan ditzaketela. Buruan ditugun muga horiek eraistea asko gustatzen zait.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Nire lanbidea artearekin lotzen saiatzen nintzen beti»

Unai Etxenausia

Armestok biltegian gordeta zeuzkan lan batzuk aurkeztu ditu Gasteizko Zas Kultur Espazioan. Marrazkiek «pertsonen arteko komunikazioa eta inkomunikazioa» erakusten dute.
 ©MONIKA DEL VALLE / FOKU

«Ez dugu neurtzen egiten ditugun gauzek zer eragin duten inguruan»

Iker Tubia

Intsektu kopuruaren gainbeheraz ohartarazi du Ugaldek, Lurraren funtzionamenduan «oso garrantzitsuak» baitira. «Itxurakeria» albo batera uzteko eskatu du, eta kontserbazioa lantzeko.
 ©ETB

«Beste gauza batzuk probatu nahi ditut»

Urtzi Urkizu

Igandean, Gurrutxagaren agurra izango da ETB1eko 'Herri txiki, Amerika handi' saioan. Zortzi denboraldiren ondoren, beste aurkezle bat arituko da 'Herri txiki, infernu handi'-n.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Julen Aperribai

Informazio osagarria

Iruzkinak kargatzen...