Albistea entzun

«Atzerriko esku hartzea» amaitzeko deia egin dio nazioarteak Libiari

Gatazkari buruzko nazioarteko bigarren konferentzia egin dute, Berlinen. Bileran izan dira batasun nazionaleko gobernuko ordezkariak ere
Libiako lehen ministro Abdulhamid Mohammed Dbeiba, atzo, Berlinen.
Libiako lehen ministro Abdulhamid Mohammed Dbeiba, atzo, Berlinen. S. G. / EFE Tamaina handiagoan ikusi

Arantxa Elizegi Egilegor -

2021eko ekainak 24

Abenduaren 24an jarria du begia nazioarteak. Orduan egingo dira Libiako legebiltzarrerako hauteskundeak, eta, ondo bidean, datorren urteko otsailean hartuko luke agintea gobernu berriak. Helburua bete ahal izateko, baina, aurrez beste baldintza batzuk bete behar dituzte, eta horietan lehena da «atzerriko esku hartzea» amaitzea. Atzo Berlinen egindako Libiari buruzko nazioarteko bigarren konferentzian, Alemaniako Atzerri ministro Heiko Maasek ohartarazi zuen «eragile guztien konpromisoa» beharko dela horretarako.

Iazko urtarrilean egindako nazioarteko konferentzian hartu zuten estatuek «esku hartzea amaitu» eta atzerriko milizianoak Libiatik ateratzeko konpromisoa. Baina, NBE Nazio Batuen Erakundearen arabera, 20.000 miliziano inguru daude oraindik herrialdean. Turkia eta Errusia dira urrats hori egiteko oztopo nagusiak. Ekialdeko buruzagi militar Khalifa Haftar babestu du Moskuk, eta, hark urrian su-etena sinatu zuen arren, han daude oraindik Errusiaren miliziak. Turkiak Tripoliko behin-behineko exekutiboa babesten du, eta argudiatu du gobernuak berak eskatu ziola tropak bidaltzeko, eta, beraz, haren indarrak ezin litezkeela «atzerriko esku hartzetzat» jo.

Maasen esanetan, baina, irteera «orekatua» ez bada, aldeetako bat babesten duten tropek abagunea baliatu dezakete bestea garaitzeko: «Libiarrek beren geroari buruz erabakiko badute, beharrezkoa da atzerriko indarrak herrialdetik ateratzea».

Konferentzian izan zen AEBetako Estatu idazkari Antony Blinken ere. Buruzagi estatubatuarra bat etorri zen Maasekin, eta esan zuen hau «aukera bat» dela herrialde «subirano eta seguruagoa» eraikitzeko. Hauteskundeez ere mintzatu zen Blinken, eta ohartarazi zuen horiek abenduan egin ahal izateko aurrez konstituzioari buruzko adostasun bat lortu behar dutela batasuneko gobernuko kideek.

Baina atzerriko miliziak kanporatzearekin ez da amaitzen arazoa. AEBen Libiarako ordezkari berezi Richard Norlandek nabarmendu zuen egun milizia horiek direla segurtasunaz arduratzen direnak, eta horiek irtendakoan «armada eta polizia sendo bat» osatu beharko dituela Tripolik. 2011n Muammar Gaddafi kargugabetu zutenetik bitan banatuta egon da Libia: nazioarteak babestutako gobernua, batetik, eta ekialdean kokatutako indar armatuak, bestetik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Espainiak Kataluniako bederatzi buruzagi independentistari eman dien indultuaren kontrako manifestazio bat, ekainaren 11an, Bartzelonan. ©Quique García, EFE

Espainiako Auzitegi Gorenak baztertu egin du indultuen kontrako bide penala

Gorka Berasategi Otamendi

Eskuin Liberala alderdiak Pedro Sanchezen kontra jarri zuen kereila bertan behera utzi du epaimahaiak. Azaldu duenez, soilik bide administratibotik jo daiteke Kataluniako buruzagi independentistei zigorra eteteko erabakiaren aurka.

Pekin, behe laino batek estalia, artxiboko irudi batean. ©ROMAN PILIPEY / EFE

OMEk gomendatu du kutsatzaile nagusiei muga zorrotzagoak jartzeko

Arantxa Elizegi Egilegor Iosu Alberdi

Esan du kutsadurarekin lotutako heriotza gehienak saihestu daitezkeela neurriak betez gero

Copernicusek sareetan zabaldutako mapa. ©@CopernicusEU

Litekeena da Kanarietako sumendiak jariatzen dituen gasak Euskal Herrira heltzea asteburuan

Jone Arruabarrena

Sufre dioxido kopuru handiak isuri ditu sumendiak: eguneko 7.997-10.665 tona. Ostiralerako, gas hori Iberiar penintsulako zati handi batean barreiatuko da, baita Marokon, Tunisian, Frantzian eta Italian ere, besteak beste.

Estatu kolpearen egunetan hildakoen senideak, justizia eske, La Pazen. ©MARTIN ALIPAZ / EFE

«Kolpearen lehen biktima da Sebastian»

Romina Lema

Boliviako estatu kolpearen berri ematen ari zela, Sebastian Moro kazetaria hilik agertu zen, La Paz hiriburuan. Familiak Normando Alvarez Garcia Argentinaren enbaxadore izandakoaren aurka jo du, Morori laguntza ukatzea egotzita.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.