Albistea entzun

Donostiako 69. Zinemaldia. Euskal Zinemaren gala. Asier Altuna. Zinemagilea

«Soinuarekin gozatu dut gehien»

Cristina Iglesiasek errealitatea abiapuntutzat hartu zuen 'Hondalea' sortzeko; Asier Altunak prozesu hori «behatu» du dokumental batean.

JON URBE / FOKU Tamaina handiagoan ikusi

Andoni Imaz -

2021eko irailak 21 - Donostia

Ekainean zabaldu zuten Donostiako Santa Klara uhartean Hondalea arte instalazioa. Cristina Iglesias artista bost urte lehenago hasi zen obra prestatzen: nola irudikatu itsas hondoa uharteko itsasargiaren barruan. Asier Altuna zinema zuzendariak (Bergara, Gipuzkoa, 1969) artelana nola pentsatu, fabrikatu eta muntatu zuten erakutsi du Hondalea: abismo marino dokumentalean. Gaur estreinatuko dute Zinemaldian, Euskal Zinemaren galan.

Iglesiasen lantaldeak eta Donostiako Udalak, proiektuaren arduradunek, prozesu osoa filmatzeko eskatu zioten Altunari, eta hemezortzi hilabete eman zituzten grabatzen, «zer aterako zen jakin gabe». Muntaian igaro dute denbora gehien, eta hainbat erabaki hartu dituzte orduan. Hala ere, filmatzen hasterako bazituzten ideia batzuk: «Irlako obra erakustea, hortik ez ateratzea; sinple kontatzea, gidoirik gabe, nik beti dudalako idazteko joera; ez molestatzea, Cristinaren lana ez oztopatzeko; eta lana ez uztea agerian hasieratik, pixkanaka baizik».

Altunak errepikatzen diren elementu batzuk sumatu zituen Iglesiasen lanetan: urruneko tokiekiko interesa, errealitatea fikzio bihurtzea, eta misterioa bilatzea. Horiek kontuan izan ditu dokumentala egiteko. «Haren lana erakutsi nahi genuen, bulegokoa eta in situ egiten duena, hor hartzen direlako benetako erabakiak. Gertatzen ari zena erregistratu genuen, ezer irrealik gabe».

Hainbeste material hartuta, muntaia izan da filma sortzeko zatirik «bereziena» Altunarentzat: «Ez genuen gauza tekniko edo didaktiko bat egin nahi». Prozesu horren barruan, soinua lantzean jaso du pozik handiena: «Pelikula bat egitean, ez dakizu non gozatuko eta non sufrituko duzun. Kasu honetan, soinuarekin gozatu dut gehien». Aitor Etxebarriaren musikak indarra ematen dio irudiekin bilatutako giro iradokitzaileari: «Gozamena izan da; asko inplikatu da, eta emaitza ederra da».

Lan pertsonal bat bidean

Zarata handia sortu da proiektuaren inguruan. Dokumentalaren egileek kanpotik bizi dute: «Gu ez gara obraren parte; sormen prozesua erregistratu dugu. Ulertzen dut kritiken atzetik dagoena, nik ere bat egiten dudalako kezka horrekin: hiri turistikoak muturrera eramaten ari gara. Horri buruz hitz egin behar da».

Altunak Arzak Since 1897 dokumentala aurkeztu zuen iaz Zinemaldian, eta Agur, Etxebeste! orain dela bi urte. Atzera proiektu pertsonal bati ekiteko irrikaz dago: «Dokumentalak egitea ederra da, baina badaukat berriz lemari heltzeko gogoa. Film bat finantzatzen ari gara; zaila da, baina etorriko da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Josune Velez de Mendizabal antzezten, Gasteizko Oihaneder Euskararen Etxean. ©ENDIKA PORTILLO / FOKU

Ogiak badu beste istorio bat

Unai Etxenausia

XlX. mendean ingelesek Gasteiz okupatu zuteneko beste bertsio bat kontatu dute 'Ogiak hizketan baleki' ikuskizunean. Oihaneder Euskararen Etxean estreinatuko dute, etzi
Edorta Jimenezen liburuak Nikole Atxikallenderen eta Sabino Aranaren argazkia du azalean. ©MAIALEN ANDRES / FOKU

Jazarpenez eta laidoz baztertutako anderea

Gorka Arrese

Edorta Jimenezek 'Nikole bijotzekua' ikerketa idatzi du. Nikolasa Atxikallenderen biografia osatzeaz batera, Sabino Aranaren bestelako ikuspegi bat dakar. Elkar etxeak argitaratu du liburua
2022ko udazkenean egingo da XVIII. Bertsolari Txapelketa Nagusia

2022ko udazkenean egingo da XVIII. Bertsolari Txapelketa Nagusia, Iruñean

Mikel Lizarralde

Getxon abiatuko da, irailaren 24an, eta finala Nafarroako hiriburuan jokatuko da, abenduaren 18an.

Paula Estevez, Maite Gurrutxaga eta Ainara Azpiazu <em>Axpi</em> ilustratzaileak, atzo, Donostiako Koldo Mitxelena kulturunean. ©MAIALEN ANDRES / FOKU

'Zu'-aren hamaika trazuak

Itziar Ugarte Irizar

Tupust kolektiboak bigarren komiki antologia argitaratu du, oraingoan autoekoitzita. 21 sortzaile eta hamazazpi istorio bildu dituzte, eta askotariko ertzetatik heldu diote gai nagusiari, 'zu'-ari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.