Albistea entzun

Krisiaren ondotik, indartuta

Lau urte diskorik kaleratu gabe egon ondoren, Mielotxin folk taldeak 'Alan Lomax in memoriam' diskoa aurkeztuko du bihar, Barañainen
Ismael Yague, Iñigo Agerri, Xavi Foch eta Salva Tarazona dira egun Mielotxin taldea osatzen duten lau lagunak.
Ismael Yague, Iñigo Agerri, Xavi Foch eta Salva Tarazona dira egun Mielotxin taldea osatzen duten lau lagunak. BERRIA

Naiara Elola -

2017ko urriak 20 - Iruñea

Azken urteetan izan dituen «gorabehera handiak» direla medio, agertoki eta grabazio estudioetatik apur bat aldenduta egon da Mielotxin folk taldea. 2013an ia urtebeteko etenaldia egin zuten, hausnartzeko. Horri esker «indarberritu» ondoren, oholtzetara eta grabazio estudioetara itzuli nahi zutela erabaki zuten. Hala, zazpi urte diskorik grabatu gabe egon eta gero, Alan Lomax in memoriam diskoa grabatu zuten iragan apirilean, Oiartzungo (Gipuzkoa) MECCA estudioetan, eta, bihar, aurkezpen modura, musika eta dantza uztartuz, ikuskizun bat egingo dute Barañaingo (Nafarroa) auditoriumean.

Alan Lomax etnomusikologo estatubatuarrak 1952an Euskal Herrira egindako bidaia batean egin zituen grabazioak dira Mielotxin taldearen lan berriaren oinarri. Iñigo Agerri taldeko abeslari eta soinu jotzaileak esan duenez, ikerketa « handia» egin dute lan berria gauzatu ahal izateko. Lomaxek Nafarroako hainbat herritan egindako grabazioak aztertu dituzte: besteak beste, Elizondon, Arbizun eta Erratzun. «Herriko kanta asko grabatu zituen, baina guk hiru kantu hautatu, horiek moldatu eta gurera ekarri ditugu», dio Agerrik. Gaineratu duenez, Alan Lomaxek euskal kulturaren ezagutzaren alde egindako lanaren aitortza modura jarri diote diskoari haren izena.

Lan berriaren bitartez taldea «hauspotu» nahi dutela adierazi du Agerrik. Aitortu du kontratazioak «asko jaitsi» zirela 2010ean, azken diskoa kaleratu zutenean. «Krisia guri ere iritsi zitzaigun, eta oso kontzertu gutxi ematen genituen». Ondorioz, kideek taldeko proiektua apur bat alboratu, eta bakarkako bidearen aldeko apustua egitea erabaki zuten. Gainera, lehen boskotea zena laukotea da orain. Dena den, taldea «indartuta» dagoela irizten dio Agerrik, eta horren isla dela lan berria. Kontratazioei dagokionez, aldaketak badirela uste du. «Sumatzen da krisi ekonomikoa gainditzen ari garela, poliki bada ere. Badirudi udalek kontratatzeko gogo handiagoa dutela».

Aro berri bati hasiera emateko modurik onena lan berri bat grabatzea dela ebatzita, Mielotxin taldeko kideek disko berria diseinatzeari ekin zioten iragan urtean. Hala, aurreko hiru lanetan ez bezala, zuzenean grabatzea erabaki zuten. «Musikari guztiek aldi berean jotzea nahi genuen, horrek sortzen duen freskotasunagatik». Hala, aukera hori ahalbidetuko zuen estudio baten bila hasi ziren. Hainbat aukera aztertu ondotik, Oiartzungo MECCA estudioetan grabatzea erabaki zuten. Apirilean grabatu zuten, eta emaitzarekin oso pozik daudela esan du Agerrik. «Oso aberasgarria izan da musikari guztiak aldi berean aritzea estudioan».

Folk doinua oinarri duten hamabi abestiz osatutako diskoa aurkeztuko dute bihar, Barañainen. Mota guztietako abestiak dira, batzuk euskaraz eta beste batzuk gaztelaniaz. «Gu nafarrak garenez, gure musikaren bitartez, hemengo errealitatea islatu nahi izaten dugu. Horregatik, euskaraz eta gaztelaniaz abesten dugu», azaldu du Agerrik. Abesti berriak badiren arren, euskal tradizioan oso ezagunak diren abestien moldaketak ere jaso dituzte disko berrian, Akerra eta Horra kantuak, kasurako. Iñigo Agerrik iragarri duenez, aurkezpen emanaldia ez da kontzertu soila izango. Besteak beste, Iruñeko Hutsun txalaparta taldeak eta Atarrabiako Lauarin dantza taldeko kideek hartuko dute parte.

Merkatuen aukera

Biharko ekitaldiaz gain, epe motzera begira hainbat proiektu dituzte esku artean, euren proiektua ezagutarazteko, batez ere. Esaterako, duela pare bat aste Bulgariako Varna hirian izan ziren, kultur eragileen merkatu batean. Esperientzia oso ona izan dela aitortu du Agerrik, Mielotxinek nazioartean oso harrera «ona» duelako. Hain zuzen ere, azaroan, halako zerbait egiteko asmoa dago Iruñean. Nafarroako Gobernuak, beste hainbat erakunde eta eragilerekin batera, 948 Merkatua antolatu du azaroaren 15 eta 16rako: arte adierazpen ezberdinetan beharrean aritzen diren profesionalek elkar ezagutzea xedea duen egitasmoa. Mielotxin taldeak proiektu horren barruan izango diren kontzertuetan parte hartzeko hautagaitza aurkeztu duen arren, ez dago hautatutakoen artean. Hala ere mahai bat izango du Geltokian, Iruñeko autobus geltoki zaharrean egingo den azokan. «Gure musika eta batez ere gure ikuskizuna saltzea izango da asmoa. Mielotxinek nazioartean duen harrera ona hemen ere izatea espero dugu», esan du Agerrik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Manuel Asin Ikuspuntu jaialdiko zuzendari artistikoa, Baluarteko atarian, Iruñean. ©JAGOBA MANTEROLA / FOKU

Ikertzeko balio duten distantziak

Olaia L. Garaialde

Iruñeko XVI. Ikuspuntu jaialdia martxoaren 14tik 19ra izanen da. Sail Ofizialean hamazazpi herrialdetako 21 film izango dira lehian. Lan eta Desbordamientos sail berriak ere badira

 ©BERRIA

Lukiek, eskemak nondik eta noraino apurtu

Itziar Ugarte Irizar

 

Hamar kantuko disko berria plazaratu du taldeak: '#2'. Kontraste ugariko lana ondu dute, egitura ezohikoak eta pasarte poperoagoak uztartuta. Arrasaten joko dute gaur; bihar, Tolosan

Juan Mari Aburto eta Fernando Perez, atzo, Azkuna zentroan. ©ARITZ LOIOLA / FOKU

Bost erakusketa egongo dira ikusgai aurten Bilboko Azkuna zentroan

Olatz Enzunza Mallona

Erakusketez gainera, beste 200 jarduera baino gehiago programatu dituzte, eta arte bisualak indartzea izango du ardatzetako bat zentroak

Carla Simonen 'Alcarràs' filma. ©Berlinale

Claire Denis, Hong Sang-soo, Isaki Lacuesta eta Carla Simon, Urrezko Hartza eskuratzeko lehian

Andoni Imaz

Berlinalen, besteak beste, Mitra Farahani, Lucrecia Martel, Ulrich Seidl eta Peter Strickland zinemagileen lan berriak erakutsiko dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.