Albistea entzun

Espainiako Gorteetarako hauteskundeak. Biharamuna. Odon Elorza. PSE-EEren diputatua

«Voxi nola aurre egin planteatu behar dugu denok, baita PPk ere»

Elorzak dio alderdi sozialistak talde guztiekin hitz egingo duela Sanchez presidente egiteko, eskuin muturrarekin salbu. Inbestidura eta gobernagarritasuna ezberdindu ditu: «Ez da formula itxien momentua».
JAVIER LIZON / EFE Tamaina handiagoan ikusi

Jokin Sagarzazu -

2019ko azaroak 12

PSOEren zuzendaritzak Madrilen atzo eginiko batzarrean parte hartu zuen Odon Elorzak (Donostia, 1955). Apirilean lortu zuen eserlekuari eutsi dio, baina emaitza hobeak espero zituen Gipuzkoan. «Neurriko poztasun bat» nabaritu zuen atzoko batzarrean.

Zer izenondo jarriko zenioke igandeko garaipenari?

Mikatza, baina meritu handikoa. Kanpainaurre luzean eta hauteskunde kanpainan denek egin dute Pedro Sanchezen eta PSOEren kontra, eta, beraz, zaila izan da. Kataluniako gertakariek asko markatu dituzte azken asteak. PSOEren kalterako izan da, eskuineko alderdi espainolek zein Kataluniako alderdi sezesionistek eta komunikabideek jarri dutelako jarduneko gobernua guztiaren erdian. Gainera, arriskua zegoen herritarrek guri egozteko hauteskundeen errepikapenaren ardura guztia.

Emaitzak ikusita, erabaki egokia izan zen hauteskundeak berriz egitea?

Gertatu direnak kontuan hartuta, emaitza ona izan dela uste dut. Ezkerreko gobernu bat osatu ez izanaren atsekabea Elkarrekin Podemosek kapitalizatu zezakeen, baina ez da hala izan. Guk eutsi egin diogu, eta haiek behera egin dute. PPk ez ditu inolaz ere bete jarri zituen helburuak. Eta gero dago Ciudadanosen hondamen erabatekoa.

Baina zuek lortu duzue espero zenuten emaitza?

Egia da irailean beste datu batzuk genituela, eta ez ditugula aurreikuspenak bete. Baina, esan bezala, irailean eta urrian gertatu direnak ikusita, emaitza ona da. Gainera, hauteskundeak aurreratzea ez zen guk nahi genuen zerbait: gure nahia zen gobernu bat osatzea akordio programatiko bat eginda Elkarrekin Podemosekin eta beste indarren batekin, baina, ezinezkoa izan zenez, hauteskundeetara joan behar izan genuen.

Eta orain zein da formula?

Egoera konplexua da, eta oso zail dago gobernagarritasuna. Baina alderdi sozialistak eutsi egin dio, eta badu oinarri bat negoziatzeko. Kongresuan zailagoa da, baina, adibidez, Senatua kontrolatu daiteke bi alderdiren kolaborazioarekin; besteak beste EAJrekin.

Alegia, koalizio gobernurik ez duzue aurreikusten.

Ez dut halakorik esan, ezta kontrakorik ere. Gainera, nik nahi dudanak ez du axola, eta nik orain nire iritzia ematea kaltegarria izan daiteke; ez dut inor despistatu nahi. Garrantzitsuena da Pedro Sanchezek buruan duena.

Eta estrategiarik badu?

Bai. Eta inbestidurarako epe bat ere jarri du: abendurako.

Herenegun, gobernu progresista bat hitzeman zuen: nola?

Ez da formula itxiak planteatzeko momentua, alderdi guztiekin hitz egitekoa baizik, parlamentuan dauden alderdi guzti-guztiekin, Voxekin salbu.

Eta PPrekin zeri buruz hitz egin nahi duzue?

Inbestidurari buruz, emaitzei buruz, batzuen eta besteen jarrerei buruz... Elkarrizketa prozesu bat zabaldu behar da, metodologia on batekin. Ekin egin behar diogu. Nire nahia litzateke inbestidurak ahalbidetzea gobernu progresista bat, Sanchezek esan duen moduan. Gehiago ezin dugu aurreratu eta espekulatu.

Voxen emaitzek nola eragin dezakete inbestiduran?

Kezkarako motibo asko izan behar dugu denok, alderdi hori arriskutsua baita demokraziarako. Vox fenomenoari nola aurre egin planteatu behar dugu denok, baita PPk ere. Europako beste herrialde batzuetan ikusi dugu zer egin duten. Gobernuak ardura dauka agenda sozial baten bidez demokrazia indartzeko, baina ez da soilik gobernuaren ardura.

Zergatik sartzen duzu PP zuen talde berean?

Voxen hazkundeak bahituta dago PP, eta geldi geratzeko tentazioa izan dezake. Alderdi horren zabor ideien kontaminazio handia jasango du datozen hilabeteetan. Baina zeresan eta interes handia dauka fenomeno hori gelditzeko. Gero dago Ciudadanos. Kongresuan indarra galdu arren, hor dago: maiatzean autonomia erkidego batzuetan eta udaletxe batzuetan sartu zen, eta gobernatzen ari da haiekin [PPrekin eta, zenbait kasutan, Voxekin]. Gerta daiteke, norabide aldaketa bat egotea bere aliantzen estrategian, eta horrek gauza batzuk aldatzea.

Hego Euskal Herrian ere eutsi egin diezue apirileko emaitzei. Nola baloratzen dituzu zuk?

Apirileko emaitzak hobetzeko helburua genuen, eta hala izango zela espero nuen nik behintzat. Baina zer gertatu da? Abertzaleak legez kanporatzeko Voxek egin duen mehatxu politikoak, PPren eta Ciudadanosen isiltasun konplizearekin, mobilizatu egin duela boto abertzalea Euskadin eta Nafarroan.

Datorren urtean Eusko Legebiltzarrerako bozak izango dira: zein izan beharko litzateke PSE-EEren helburua?

Elkarrekin Podemosekin dugu guk lehia. Igandean huts egin du lurralde guztietan. Euskadin oso-oso indartsu sartu ziren duela lau urte, baina, hauteskundez hauteskunde husten ari dira. Gure helburua izan beharko litzateke botoaren parte bat berreskuratzea. Hauteskunde kanpaina serio bat planteatu beharko genuke —eta badakit egiten ari direla— hautesle horiek gurera erakartzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bego Atxa eta Joseba Azkarraga, atzoko prentsaurrekoan. ©ANDONI CANELLADA / FOKU

Sarek Auzitegi Nazionalaren «blokeo jarrera» kritikatu du

Isabel Jaurena

Sare Herritarraren arabera, 47 euskal preso daude orain urruneko espetxeetan. «Presoengandik gertuen daudenen» jarrera nabarmendu du, erabakiak «jarraipen egokia» egin eta gero hartzeagatik

Bego Atxa eta Joseba Azkarraga, gaur goizeko prentsaurrekoan. ©Andoni Canellada / Foku

Sarek Auzitegi Nazionalaren «blokeo jarrera» salatu du

Isabel Jaurena

Sare Herritarrak adierazi du 47 euskal preso daudela oraindik urruneko espetxeetan

Antonio Caño 2018an, 'El Pais' egunkarik zuzendari zenean. Don Mitxelen albiste faltsua sinistu duenetako bat da. ©Fernando Villar / EFE

Arralderi buruzko txio batek agerian utzi du albiste faltsuen ahalmena

Paulo Ostolaza

Fikziozko herri horretako udalak Miguel Angel Blancoren hiltzailea seme kutun izendatu duela idatzi du Twitterreko Don Mitxel erabiltzaileak. Besteak beste, Daniel Lacalle ekonomialariak eta Antonio Caño El País-eko zuzendari ohiak sinistu eta zabaldu dute mezua.

Iruñeko zezen plaza, uztailaren 14ko arratsean. ©Iñigo Uriz, FOKU

Aske utzi dituzte Mutilzarra peñaren salaketaren harira Iruñean atxilotuak

Uxue Rey Gorraiz

Poliziak bost lagun atxilotu zituen atzo, uztailaren 14an Iruñeko zezen plazan izandako istiluekin lotuta. Aske dira, baina epaileak deklaratzera deituko ditu. Gorroto delitua egozten diete. Mutilzarraren arabera, hainbat pertsonak eraso egin zieten peñako zenbait kideri.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...