Hilaren 18an, Iñaki Muruak jantziko dio txapela Bertsolari Txapelketa Nagusiko irabazleari. Eta bihar ETB1eko Hitzetik hortzera saioan Muruari Eider Perez aurkezleak egindako elkarrizketa ikusi ahalko da (15:00). Proposamena jaso zuenetik, zailena «berria ezkutuan gordetzea» izan dela esan du Muruak. Txapel emailea bera izateak jendearengan sortu duen pozak «ilusioz» eta «irrikaz» bete duela adierazi du, era berean. 2005etik 2018ra, Bertsozale elkarteko lehendakaria izan zen Murua —aurretik hainbat txapelketatan kantatu zuen—. Aurtengo txapelketan «ikaragarrizko maila» egon dela nabarmendu du.
Programa berean, finalaurreko bertsoaldien aukeraketa bat ikusi ahalko da. Bai Hitzetik hortzera-ko atalak, bai finalerdietako saio guztiak, EITBren Nahieran atarian ikus daitezke.
