Albistea entzun

Zaloa Mendez. 'Gure Kasa' saioko zuzendaria

«Lehen etorri nahi ez zutenek orain etorri nahi dute 'Gure Kasa' saiora»

'Gu ta gutarrak' gazteentzako saioa zuzendu ondoren, Mendezek 'Gure Kasa'-ren lema hartu zuen iaz. Familientzako gaueko entretenimendu tarte bihurtu nahi izan du, gazteentzako eta helduentzako edukien bidez.
ETB Tamaina handiagoan ikusi

Edu Lartzanguren -

2018ko irailak 21

Zaloa Mendez zuzendariak (Bilbo, 1974) ETB1eko Gure Kasa saioaren bigarren denboraldiari ekin dio berriki.

Espero zenuen Gure kasa-k bigarren sasoia izatea?

Duela urtebete, ezetz esango nizuke; inondik inora ez. Baina ikusle datuek lagundu egin digute; gora eta gora joan dira, eta bigarren sasoian ere sendo hasi gara. Adierazgarria da gonbidatuekin gertatu zaiguna: lehen Gure Kasa-ra etorri nahi ez zutenek orain nahi dute. Jendea animatzen hasi da, eta jo eta ke gabiltza.

Nork esan dizue ezetz eta gero baietz?

Amets Arzallusek iaz ezetz eta ezetz esan zigun, eta, oraingoan, baietz. Eñaut Elorrietak iaz ezetz, baina, orain, aurrerago hitz egingo dugula esan digu. Iaz, hasi ondoren konturatu ginen ETBn ez zegoela jendea modu arin eta informalean elkarrizketatzeko tarterik. Aurrekoan, batek galdetu zidan nola lortzen dugun gonbidatuak horren eroso egotea saioan. Gidoia gonbidatuekin adosten dugu, ustekabeak izan ezik. Oso lasai datoz.

Benito Lertxundiren eta Berri Txarrak taldeko musikarien atzetik zabiltzate. Lortuko duzue saiora eramatea?

Benito Lertxundik beti esan digu ezetz, baina Iban Garciak gonbidapena eman zion aurrekoan Zarautzen [Gipuzkoa], kontzertu batean, eta bueno, ez zuen ezetzik esan. Berri Txarrak taldeari ematen saiatu zen, baina ez zuen lortu. Maialen Lujanbio oraingoz ezinezkoa da, baina nik gonbidapena eman nahi diot Gure Kasa-ra etortzeko. Karlos Argiñanok ere sekulako saioa emango liguke. Dagoeneko lotuta ditugu Fermin Muguruza, Andoni Ortuzar, Arnaldo Otegi...

Zenbateko ikusle kuotarekin hasi zarete?

Astelehenean 2,8ko kuota izan genuen, Jon Maiarekin; 20.000 ikusle. ETB1erako saio baterako, sekulakoa da. Aurreko denboraldian marka ekainean egin genuen, Pello Zabala handiarekin: 3,7. Kuota sendoa izan dugu hilabetez hilabete eta hainbat adinetako jendearekin. Gaztetxoak ditugu nagusi ikusle saioaren hasieran, Iban Garciaren tartearekin eta Zuriñeren txantxekin [Aitziber Garmendia aktoreak egiten duen pertsonaia]. Gero, 25-44 urteko tarteko ikusleak —target komertziala deitukoa— oso altu dugu. Azkenik, 45 urtetik gorakoak harrapatu ditugu. Iaz ez genien heldu hasieran, pixkanaka joan dira sartzen.

Adin tarte oso zabala harrapatu nahi duzue. Hori nahi duenak ez al du arriskua azkenean inorentzat ez aritzeko?

Gu ta gutarrak saioa egin genuen aurretik, eta, orduan bai, nerabeak eta gaztetxoak konkistatzea zen helburua. Orain, familiarentzako saio bat egiteko eskatu digute. Hor galdera sortzen zaigu: haur batek ikusiko du helduentzako eduki bat? Orduarekin jokatzen dugu hor: 22:00etatik aurrera sartzen ditugu helduentzakoak. Nik 8 eta 15 urteko semeak ditut, eta 22:00ak arte uzten diet telebista ikusten. Segida naturala da, beraz, bizitza bezalakoa.

Ane Guria rap abeslaria fitxatu duzue; kantuak asmatzen dizkie gonbidatuei. Gidoitik aterako zen baten beharra zenuten?

Beste kolaboratzaile askorekin gertatu zaigun bezala, Ane Guria gonbidatu gisa etorri zen saiora, eta sartu bezain pronto jarri zuen platoko energia goraino. Telebistan, hori urrea da, eta berehala eskatu genion saioan parte hartzeko. Gonbidatuak berak proposatzen duen rap horretan integratzea da asmoa.

Gonbidatuak lankide bihurtzen dituzue, baina Gure Kasa-k ere izan ditu kumeak: zuen saiotik atera zen Onintza Enbeitaren eta Ana Goitiaren Hauxa2 saioa. Aurtengo sasoiak ere haurrak emango dituela uste duzu? Zeintzuk?

Ana eta Onintza nagusi egin dira, emantzipatu dira eta etxe propioa dute. Bigarren denboraldiarekin astebete bakarrik daramagu, baina guretzat Maddalen Arzallus sekulako aurkikuntza izan da. Lotsati hasi zen, baina ustekabe hutsa da. Nire ustez, saio propioa izan dezake lasai asko. Baina pena emango lidake, guk galduko genukeelako.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©ANDONI CANELLADA / FOKU

«Zientzia feminista egiten dugu»

Urtzi Urkizu

Urte asko daramatzate elkarrekin lanean, eta «osagarriak» dira Galarraga eta Etxebeste. Feminismoa eta klima larrialdia aldizkarian «gai transbertsalak» direla azaldu dute.
 ©GORKA RUBIO / FOKU

«Kultura parte-hartzaileak dira bide eraldatzaileak»

Urtzi Urkizu

Historialaria da Aierdi. Aniztasuna eta generoa lantzen ditu formakuntza saioetan, hezkuntzan zein erakunde eta enpresetan. «Bizipenei balioa eman, eta horietatik abiatzen gara eraldaketarako».
Ataungo Barandiaran museoan elkartutako emakumeak, atzo. ©IDOIA ZABALETA / FOKU

Lihoaren txirikordak

Enekoitz Telleria Sarriegi

Makrame ikastaro berezia egin dute Ataungo Barandiaran museoan, lihoa erabiliz. Landare hori zuntz bihurtu arteko prozesuaren eta Euskal Herrian izan duen garrantziaren berri izan dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.