Jon Alonsori eman diote prentsa idatziko Argia saria

Jon Alonsori eman diote prentsa idatziko aurtengo Argia saria, Naparra. Kasu irekia ikerketa liburuagatik. 2020an 40 urte bete ziren Joxe Migel Etxeberria Naparra desagerrarazi zutenetik, eta senideek oraindik ere ez dute topatu haren arrastorik.

Argia-koen arabera, Alonsok ondutako liburuak auziaz dakigun guztia bildu du, eta, aurrerantzean, kasuaz jakin edo ikertu nahi duenarentzat «ezinbesteko erreferentzia» izango da.

Sarien arduradunek nabarmendu zuten nahiz eta auzia argitu ez duen lanik garrantzitsuenetariko bat egin duela: «Ahanzturaren zingiran usteltzen ez utzi, irakurlea auzi korapilatsuaren harian ongi eta argi eramanez». Desagerpenak utzitako lorratza azpimarratu zuten, eta gogorarazi auziaren muina argitzeko dagoela oraindik. «Naparraren familiak sufritzen jarraitzen du».

Prentsa idatziko irabazlearen berri emanda, itxi dute aurtengo Argia sarien banaketa. COVID-19a dela eta, ez dute ekitaldirik egin ahal izan, eta webgunean eman dute sarituen berri. Alonsoz gain, Hondar ahoak telesailak irabazi zuen ikus-entzunezkoen saria; Zaldibar Argituk kanpainarik onenarena; Zubiak saioak irratikoa, eta Euskal Encodings proiektuak Internetekoa.