Xabier Amurizarekin hasiko dute ETB1eko 'Biba zuek', astelehenean

Gai bati buruzko solasaldia egingo dute lehenbizi; gero, elkarrizketa bat pertsona ezagun bati
Maddalen Arzallusek eta Xabier Sukiak aurkeztuko dute <em>Biba zuek saioa</em>, astelehenetik aurrera.
Maddalen Arzallusek eta Xabier Sukiak aurkeztuko dute Biba zuek saioa, astelehenetik aurrera. JON URBE / FOKU Tamaina handiagoan ikusi

Urtzi Urkizu -

2020ko irailak 11

Azkeneko urteetan, ETB1ek artxiboko saioz bete izan du 18:00etatik 20:00etarako tartea. Denboraldi honetan, ordea, apustu sendoa egingo du ordutegi horretan: zuzeneko magazin bat eskainiko du. Maddalen Arzallusek eta Xabier Sukiak Biba zuek aurkeztuko dute datorren astetik aurrera, astelehenetik ostiralera. New Digital Mediak Miramongo (Donostia) estudio batean egingo du saioa.

Unai Etxabe da saioko zuzendaria —Gure kasa-ko zuzendaria eta zuzendariordea izan zen—. Iragarri duenez, programa bi zatitan banatuko da. «Lehen orduan, hiru gonbidatu izango ditugu, gai jakin baten inguruan aritzeko. Adibidez, lehen egunean, eskolarako itzulera izango da mintzagaia; asteartean, COVID-19a gainditu duten gazteak; familia eredu berriak landuko ditugu datorren astean. Bidelagun edo coach bat egongo da lehen parte horretan, aholkuak emateko eta gauzak beste modu batean ikusteko»

Bigarren zatian, elkarrizketa bat egingo dute —gehienetan, aurpegi ezagunak izango dira—. Aurreneko atalean, Xabier Amuriza elkarrizketatuko dute.

Gainera, kolaboratzaile ugari egongo dira bigarren partean: Agus Barandiaran musikariak Euskal Herriko abestien historia kontatuko du; Jon Artanok Euskal Herritik kanpo bizi diren euskaldunak elkarrizketatuko ditu webcam bidez; Ana Goitiak oroimin atal bat aurkeztuko du —gonbidatuaren jaiotze data aintzat hartu, eta gogoraraziko du garai hartan zer jantzi, zer musika eta zer telebista programa zeuden—; Marta Elvirak Euskaraldiaren tarte bat aurkeztuko du, eta kaleko aktualitatearen erradiografia bat egin; Mikel Markezek gonbidatuarekin lotutako hiru objektu eramango ditu gitarra funda batean; Iker Laurobak Euskal Herriko herriak bisitatuko ditu, eta, tokian tokiko hitzak lotuz, abestiak sortuko ditu; Jon Garate artxiboan murgilduko da; Mikel Elizegik aiton-amona «aktiboak» bisitatuko ditu, eta Ainhoa Vitoriak gonbidatuaren playlista eramango du.

Artzain bat ere egongo da saioan: Aritz Ganboa. «Nafarroako bere eremuan zer eguraldi duen azaldu, egunean zehar zer egin duen kontatu, eta artzain munduari buruzko erreportajeak aurkeztuko ditu. Gure konexioa izango da baserri munduarekin», azaldu du Etxabek.

Zuzeneko konexioak ere egingo dituzte, aktualitatea aztertzeko. Joseba Olagarai eta Izaskun Moyano arituko dira erreportari.

Etxabe itxaropentsu dago Maddalen Arzallus eta Xabier Sukia aurkezleekin. «Oso apustu sendoa egin dugu aurkezleekin, eta uste dut asmatu dugula. Sekulako ezustekoa emango diete ikus-entzuleei. Etorkizuneko benetako bikotea osatzen dute». Abesten ere jarriko dituzte.

Etxabek aitortu du azken urteetan errepikapen asko eta saio berri gutxi egon direla ETB1en ordutegi horretan. «Ea ordutegi hori sendotu dezakegun hemendik abendura bitartean».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Errigorako kideak eta Mendigorriko familiak, atzo, kanpaina berriaren aurkezpenean. ©IDOIA ZABALETA / FOKU

Otarre bete hats euskararentzat

Ion Orzaiz

Aurtengo kanpaina aurkeztu du Errigorak Mendigorrian, D eredua eskatzen duten familiek lagunduta. Tokian tokiko proiektuak sustatuko dituzte, 'Agerraldia' izeneko egitasmoaren bidez.
 ©IÑIGO URIZ / FOKU

«Belaunaldi bakoitzean izan da jendea aurrera jotzeko»

Iker Tubia

Oharkabean hasi zen mikrofonoen aurrean solasean eta kazetaritzaren munduan murgiltzen. Beti izan du non idatzi, eta horrek itzultzaile lanerako trebatzeko aukera eman dio. Etxean jasotako euskaltzaletasuna izan du ipar.
Euskarazko telesailek 30 urte (IV): 'Goenkale' osteko aroa

'Go!azen' izan da salbuespena

Urtzi Urkizu

ETBk 'Goenkale' kentzea erabaki zuenean, 'Aitaren etxea' grabatu zuten; gero, 'Eskamak kentzen'. Hiru urte eta erdiko «basamortua» iritsi zen, iaz 'Ihesaldia' estreinatu zuten arte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna