Albistea entzun

Euskal musikari buruzko podcast bat BERRIAn eta Badoken

'Dunbala' podcastaren lehen atala entzungai dago jada. Estilo askotako kanten inguruan mintzatuko dira, bi astean behin
Jagoba Salvador eta Eneritz Dueso dira <em>Dunbala</em> podcasteko esatariak.
Jagoba Salvador eta Eneritz Dueso dira Dunbala podcasteko esatariak. JON URBE / FOKU Tamaina handiagoan ikusi

Urtzi Urkizu -

2020ko martxoak 14 - Donostia

Euskal musikak askorako ematen du; dozenaka talde daude lan berriak sortzen, eta haien inguruko podcast bat sortzea erabaki dute Eneritz Dueso eta Jagoba Salvador musikariek: Dunbala. Aurreneko atala entzungai dago BERRIAren webgunean eta Badok atarian —podcasta Badok musika atariarena da—.

Salvadorrena izan zen hasierako ideia, baina, Jon Eskisabel Badok-eko koordinatzaileak proposamena jaso zuenean, bazebilen dagoeneko antzeko zerbait egiteko asmoz. Duesori hots egin zioten gero —haren izen artistikoa Eneritz Furyak da—, eta «pozik» eman zuen baiezkoa. «Iruditzen zait Badok egun erreferente bat dela euskal musikaren erakusleiho gisa. Non duzu aukera euskarazko musika gehiena topatzeko, azken albisteen berri izateko, zure kantu kutunekin eta oraindik ezagutzen dituzun horiekin zerrendak egiteko?». Podcastak gero eta zabalduago daude, eta «ekarpen polita» egin dezaketela uste du musikariak. «Euskal musikari buruzko irratsaioak badira, baina gehienak estilo jakin bati buruzkoak dira. Gurea irekia izatea nahiko genuke; berdin kabituko lirateke euskaraz egindako trapa, txistua, popa, rocka edo reggaetona».

Atal bakoitzak 40-50 minutu inguru iraungo du. Bertan, disko eta kantu berriak aipatuko dituzte, doinu zaharrak gogora ekarriko dituzte, eta, gai orokorretatik abiatuz, askotariko proiektuak eramango dituzte saiora. «Ez da erraza izango, eta beti ezin izango dugu lortu, baina euskal musikaren aniztasuna islatu nahiko genuke minutu horietan. Lekua eman nahi diegu horren komertzialak ez diren proiektuei, eta bozgorailua jendearengana heltzeko oztopo gehiagorekin topo egiten duten musikei», iragarri du Duesok. «Baina horrek ez du esan nahi boladan dauden musikak edo irrati formuletako zerrendetako hit-ak ekarriko ez ditugunik».

Esatariek nabarmendu dute musika izango dela Dunbala-ren protagonista nagusia. «Kasu batzuetan, aitzakia izango da talde edo bakarlari baten kontzertu bat ikusi dugula. Edo, disko berri bat atera delako, entzungo dugu lan horren kantu bat. Izan daiteke gai orokorrago edo ez hain musikal bat hartu eta hartatik tiraka gaiari lotutako musika entzutea ere. Gure aletxoa jartzen saiatuko gara, baina astunak izan gabe». Duesok eta Salvadorrek gidari lana egingo dute, eta entzuleei aitzakia bat emango diete musika bat ala beste bat entzuteko.

Gaur egungo musika

Duesok azaldu duenez, Euskal Herriko gaur egungo musikak izango du lehentasuna podcastean, nahiz eta zenbait kasutan ez diren izango azkeneko nobedadeak. «Hala ere, tartea emango diogu iraganeko musikari ere. Historiak beti lagun dezake egungoa hobeto ulertzen. Eta iraganeko kontu asko lehen aldiz entzuten duen jendea egongo dela hartuko dugu kontuan».

Bi esatariak musikariak izateak eragina izango du Dunbala-ren estiloan. «Biok maite dugu musika, eta niretzat naturala da musikaz hitz egitea. Baina podcast formatuak aukera ematen digu euskal musikari ekarpen bat egiteko, musika hutsa ez den ekarpen bat», azaldu du Duesok. «Euskal musika asko dago, baina ez dago hainbeste aukera hura ezagutzeko ahalegina egiteko. Horrenbestez, nahiko genuke podcastak zubi gisa jokatzea musikaren eta entzuleen artean. Zin dagit musika zoragarri asko daukagula Euskal Herrian, eta horri buruz hitz egiteak eta horri ekarpena egiteak asko motibatzen nau».

Dunbala-ren lehen atalean, Gernika-Lumon (Bizkaia) ehun emakume musikarik baino gehiagok egindako Elkarrekin egon ginen topaketa izan dute abiapuntua. Bestalde, Arima taldearen zuzenekoaz, Keu Agirretxearen Lagunak, ura eta bakea proiektuaz, eta Testura, Verde Prato eta Liher taldeen disko berriez hitz egin dute. Bi aste barru, gehiago.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Berdea nola berdatu

Berdea nola berdatu

Enekoitz Telleria Sarriegi

Hosto berdeko barazki eta landareak ohikoak dira entsaladetan. Gero eta aniztasun handiagoa dago: tonu, forma, testura eta propietate ezberdinak dituzte.

Rafa Gorrotxategi, Tolosako Txokolatearen Museoan. ©JON URBE / FOKU

Bisita gozoa Tolosako museoan

Iraia Irazusta Mujika

Tolosako Txokolatearen Museoa 2020tik dago zabalik. Bisita gidatu zein birtualen bidez ezagutu daiteke, eta hainbat tailer egiteko aukera ematen du, txokolatearekin jolasteko

 ©ENDIKA PORTILLO / FOKU

«Jaiak gasteiztarron topagune dira»

Unai Etxenausia

Kazetari eta parrandazale moduan ezagutu ditu Fiestrasek Andre Maria Zuriaren festak urteetan. Bizitza osoan bi urtez baino ez du huts egin, eta datozen guztiez «gozatzeko asmoa» daukala iragarri du.
2 ©JAIZKI FONTANEDA / @FOKU

Jana eta edana azkenera arte

Eider Etxeberria Soria

Zeledonen igoerarekin amaitu dira Gasteizko Andre Maria Zuriaren jaiak. Gasteiztarrek azkenera arte zukutu dituzte festa egunak. Txorizoa eta patatak banatu dituzte kuadrillek, eta buruhandi eta erraldoien konpartsak kalejiran ibili dira. Tabernariak gustura daude jaiekin.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...