'Zapla!' podcasta, hizkuntza ohiturak aldatzeko gida

Hizkuntza ohiturak aldatzeko baliabideak emateko xedez, hau da, euskara gehiago erabili eta hizkuntza ohiturak aldatu nahi dituzten herritarrei tresnak eskaintzeko, Euskaltzaleen Topaguneak podcast bat ekoitzi du: Zapla!. Monika Belastegi eta Juan Kruz Lakastak gidatuko dute, eta ekoizpen teknikoa On Time ekoiztetxeak egin du. EITB Podkast atariak gaur estreinatuko du lehen atala; beste audio plataforma batzuetan ere entzungai egongo da, hala nola Google Podcast, Apple podcast, Ivoox eta Spotify zerbitzuetan.

Euskaraldiaren testuinguruan ekin dio Topaguneak podcasta martxan jartzeari. Iker Martinez de Lagos Topaguneko komunikazio arduraduna da podcastaren ekoizlea. «Hizkuntza ohiturak aldatzeko lagungarri izan dadin, horrelako prozesu batek behar dituen baliabideak eman nahi ditugu», azaldu du. «Euskaraldian, baliabideak falta izaten dituzte euskaldun askok, eta tresna batzuk emango ditugu saioan».

Atal bakoitzean, aditu bat elkarrizketatuko dute Belastegik eta Lakastak. Gaur, aurreneko atalean, Gemma Sangines psikologoa elkarrizketatuko dute. TELP tailerren (hizkuntza espazio pertsonalei buruzko lantegia) sortzaileetakoa izan zen Sangines, eta estres linguistikoaz, hizkuntza sumisioaz eta asertibitateaz mintzatuko da. «Argi genuen Sanginesekin hasi nahi genuela», esan du Martinez de Lagosek. «Elkarrizketa bakoitzean entzuleek kontzeptu batzuk ulertzea nahi genuke».

Era berean, hizkuntza hautuaren inguruko testigantzak ere izango dira podcastean. Gaur, Juan Ignacio Perez IglesiasEHUko Kultura Zientifikoko Katedraren zuzendari eta Jakiundeko presidenteak emango du lekukotza. Hurrengo ataletan, zenbait kazetari eta kultur sortzaileren testigantzak ere jasoko dituzte.

Azaroko lehen lau astearteetan sareratuko dituzte Zapla!-ren lau atalak. Bakoitzak 30 minutu inguru iraungo du.

Podcasta Euskaraldiaren testuinguruan sortu duten arren, luzerako erabilgarri izateko helburua du. Topaguneko ordezkariek uste dute sortutako materiala baliagarria izan daitekeela TELP tailerretan, euskaldunen ahalduntze eskoletan, euskaltegietan eta eskoletan. Martinez de Lagosek nabarmendu du ahobizi eta belarriprest funtzioak hartzen dituzten herritarrei tresnak emango dizkietela Zapla!-n.

Podcast berri gehiago

EITB Podkast atarira egitasmo gehiago iritsiko dira datozen asteetan. Hilabete honetan bertan, emakume zientzialariei buruzko podcast bat estreinatuko dute: Uhin ultramoreak.

Beste podcast batek migrazioaren fluxuak aztertuko ditu, Bidasoaren ertzean dauden migranteen egoera aintzat hartuta. Harresi ikusezina izango du izena podcastak. Jabier Muguruza musikariaren kanten osagarri izango da Dodoa podcast berezia, bestalde, eta Eguberrietan estreinatzea espero dute.

Fikzioak ere izango du lekua EITB Podkast atariaren eskaintzan. Izan ere, Artxipelagoa serie apokaliptikoaren bigarren denboraldia estreinatuko dute abenduan, Durangoko Azokako egunetan, hain zuzen. Hiru olatu erraldoiak iritsi eta gero, bizirik irauteko dauden arazoek sortzen dituzten gerren, indarkeriaren eta goseteen jarraipena bilduko dute atal berrietan.

Udazken honetan estreinatu dute #10garrena fikzioa ere. Bertsolari Txapelketa Nagusiaren final distopiko edo alternatiboak hartzen ditu hizpide.

Duela gutxi hasi dituzte denboraldi berriak, bestalde, Barruan gaude eta Estamos dentro elkarrizketa podcastek. Oier Aranzabalek aurkezten du euskarazkoa, eta Jon Martijak gaztelaniazkoa. Elkarrizketatuen etxeetan grabatzen dituzte atalak.

Gaztea irratiak ere heldu dio podcastgintzari. Azkeneko hilabeteetan, Gaztearen proposamen hauek iritsi dira EITB Podkast atarira: Yoko Ona solas tartea, Zulora eztabaida saioa —bigarren denboraldian daude—, Benetan zabiz? izeneko talk-show-a, eta Ly Day surf kulturari buruzko emankizuna.

Haurrentzako podcastak ere ekoizten ari dira: Sara eta Paulen abenturak! fikzioa eta Kuku ipuin bilduma estreinatu zituzten udan.

Halaber, Iñigo Antsorregik gidatutako Korapiloak da EITB Podkast atariko beste berrikuntzetako bat. Buru osasunarekin lotutako elkarrizketak egiten ditu.