Kataluniako atal berezi batekin itzuliko da gaur 'Ur handitan'

CDRko bi kide, Jordi Sanchezen gurasoak, Jordi Cruixarten iloba eta Carles Puigdemonten arreba elkarrizketatuko ditu Xabier Madariagak
Xabier Madariaga kazetaria Bartzelonan, atzo eguerdian, manifestarien artean.
Xabier Madariaga kazetaria Bartzelonan, atzo eguerdian, manifestarien artean. BALEUKO

Urtzi Urkizu -

2019ko urriak 15
Udako etenaldiaren ostean, Ur handitan saioa gaur itzuliko da ETB1era (22:20), eta buruzagi independentisten aurkako auziaren epaia Kataluniako gizarteak nola jaso duen kontatuko dute. Kaleko herritarrei ahotsa emango die programak, eta askotariko elkarrizketak ere ikusi ahalko dira erreportajean.

Errepublikaren defentsa batzordeetako kideak, epaiaren kontrako mobilizazioetan parte hartu duten euskaldunak eta Kataluniako prozesuaz aspertuta dauden herritarrak azalduko dira iritzi bilduma berezi horretan. Sententziaren itzalean erreportajean, atzo Bartzelonako kaleetan egin ziren mobilizazioetako irudiak ere ikusiko dira.

Ane Rotaetxeren lekukoa hartuta, Usua Garin izango da denboraldi honetan Ur handitan-eko zuzendaria. «Epaia jaso aurretik, euskaldun eta katalan batzuekin elkarrizketak grabatu genituen. Saiatu gara ikuspegi desberdinak biltzen. Epaia jakin ostean, gizartean izan duen eragina ari gara jasotzen», azaldu du Garinek. Elkarrizketatuen artean daude Miren Azpiri CDRko eta ANCko kidea, Jerma Martin CDRko kidea, Aritz Galarraga literatura irakaslea, Eunate Serrano Barcelona en Comuko prentsa arduraduna eta Saioa Baleztena kazetaria. Garinek iragarri duenez, Jordi Sanchezen gurasoen (Pere Sanchez eta Nuria Picanyol), Jordi Cruixarten iloba Polen eta Carles Puigdemonten arreba Montseren hitzak jaso dituzte.

Azken ordukoak jasoko dituzte saioan. Gaur goizean grabatzen egongo dira, eta arratsaldean bidaliko dute saioa ETBra. «Epaian oinarritutako erreportajea egiteko eskatu ziguten ETBtik. Denborarekin landu dugu gaia, eta lantaldearen parte bat asteazkenetik egon gara Katalunian. Baina normalean Ur handitan saioan ez dugu horrela funtzionatzen, hain aktualitateari lotuta, eta estres handia eragin digu. Edonola ere, lantaldearekin oso harro nago».

Rotaetxeren lekukoa hartzea «ardura handitzat» jo du Garinek: «Bi urte eta erdian, saioak ikusle datu politak bereganatu ditu. Batetik, arduratuta nago. Baina, bestetik, erronkarekin ilusionatuta. Bi sentimendu horiek orekatuz nabil».

Xabier Madariagak segituko du saioa aurkezten. Gidoilariburua, berriz, Jon Gonzalo izango da, Fermin Etxegoienen ordez. Lantaldera batu da Ainhoa Zabarte kazetaria ere —Hamaika telebistan aritutakoa—.

Kataluniako atalaren ostean, datorren astean Aralarrera joango da Madariaga, hango artzainen bizimodua ezagutzera. Zaharren egoitza batean eta klausurako mojak bizi diren komentu batean ere murgilduko da aurkezlea datozen asteetan. «Erreportaje askotan espazio bat edo atmosfera bat izango dira ardatza», esan du Garinek. «Baina ez gara egongo aktulitateari hain lotuta, Kataluniako gaurko atalean bezala».

'Faktoria', Bartzelonatik

ETBk Kataluniako gertakizunen berri eman zuen atzo albistegietan eta hainbat saiotan. Hamaikak saio berezia eman zuen, 18:30etik 21:00etara. TV3 kateak bere programazioa goitik behera eraldatu zuen, eta astelehenetan eman ohi dituzten sei saio bertan behera utzi zituzten, aktualitatearen berri eman ahala izateko.

Euskadi Irratiko Albiste Faktoria saioa, berriz, Bartzelonatik egingo dute gaur goizean. Maite Artolak gidatuta, lantalde osoa arituko da Katalunian gertatzen denaren berri ematen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna