Hamaikak eta Kanaldudek Sareren manifestazioak emango dituzte

Bilbon denak elkartu beharrean, Euskal Herriko berrehun herri eta hiri baino gehiagotan egingo dituzte gaur arratsaldean manifestazioak, Sare Herritarrak deituta. Elkarbizitzarako, bakerako, etxerako bidean lelopean, milaka herritarrek bat egingo dute deialdiarekin, eta Hamaika telebistak eta Kanaldudek elkarlanean egingo dute zuzeneko emankizuna, 16:00etan hasita.

Kanalduderen unitate ibiltariak emango du Baionako manifestazioaren berri —hiru zutabe abiatuko dira, 15:00etan—. Baionako San Andres plazako amaierako ekitaldia zuzenean ikusi ahalko da Kanalduden eta Hamaikan. Gero, Hamaikako unitate ibiltariek Bilboko, Donostiako, Gasteizko eta Iruñeko mobilizazioen berri emango dute.

Hamaikaren platoan, bestalde, Ekhiñe Atorrasagastik gidatuko du emankizuna. Alboan izango ditu Miren Legorburu eta Karlos Renedo, analisiak egiteko. Kasu egingo diote Interneteko sare sozialetan arratsaldean dagoen mugimenduari ere. Halaber, hiriburuetan manifestazioaren amaieran egingo diren ekitaldiak emango dituzte.

Gaur goizean, bestalde, Bilboko Euskalduna jauregian mahai inguru berezi bat egingo dute, Sarek antolatuta, gatazkaren biktimei buruzkoa. Ekitaldi horren laburpena ere emango dute Kanalduderen eta Hamaikaren saio berezian. Karol Suarez kazetariak jasoko du han gertatzen dena.

Hamaikaren ohiko seinalean eta Hamaika.eus eta Kanaldude.eus atarietan ikusi ahalko da gaurko saioa, 16:00etatik Iruñeko manifestazioaren ingurukoak hasi arte —han izango da mobilizaziorik berantiarrena—.

Azken hamarkadetan presoen eskubideen alde egin diren ekinaldirik garrantzitsuenak gogora ekarriko dituzte, baita beste herri mobilizazio batzuk ere.

BERRIAk manifestazioaren berri emango du bere webgunean. EITBk albistegietan eskainiko dio tartea manifestazioari, baita beste euskal komunikabide askok ere.

'Portu bat hurbilago'

BERRIAk Sareren mobilizazioen gaia sakon landuko du biharko egunkarian. Horrez gain, Berria telebistak Portu bat hurbilago erreportajea estreinatu du. Zenbait euskal presoren gertukoen lekukotzak jaso dituzte, iaz Azken porturaino erreportajean egin zuten moduan. Preso horiek hurbilago daude orain. Ez dira gauza bera bi egun eta bi ordu. Eta ez dira gauza bera Puerto de Santamaria (Andaluzia, Espainia, 1.020 kilometro) eta Dueso (Kantabria, Espainia, 170 kilometro). Lekeitiotik (Bizkaia) Duesora, adibidez, bi orduz egin daiteke bidaia: 895 kilometro laburtu zaie bidea Sarai Goitia Arrizubietari, Iratxe Goitia Atxabali eta Iraide Juaristi Agirreri. Mirentxin gidariek, bestalde, bukatu dute euren bidea: senideek jada ez dute haien beharrik, eta itzali dituzte motorrak. Bidaia ugari egin dituzte urteotan guztiotan. Haien ingurukoak ere jaso dituzte erreportajean.