Noiz sortua: 2020-05-21 00:30:00

'Gure kasa' platora itzuliko da, eta astero hiru gonbidatu izango ditu

Joseba Olagaraik herritar ezezagunen lekukotzak jasoko ditu. Ostegunero emango du ETB1ek
Maddalen Arzallus, Julen eta Antton Telleria, Joseba Olagarai, Aitziber Garmendia eta Joseba Beloki, Miramonen.
Maddalen Arzallus, Julen eta Antton Telleria, Joseba Olagarai, Aitziber Garmendia eta Joseba Beloki, Miramonen. EITB Tamaina handiagoan ikusi

Urtzi Urkizu -

2020ko maiatzak 21

Bi hilabete etxetik atera gabe eman eta gero, Gure kasa platora bueltatu da. Berrikuntza askorekin ekingo dio gaur etapa berriari: asteroko prime-time saio bihurtu da, eta gonbidatu bakarra izan beharrean, hiru izango dituzte. Lehen programan, Iker Irribarria pilotaria, Xabi Solano musikaria eta Lucia Lakarra dantzaria gonbidatu dituzte. Nahiz eta haien bizitza profesionala bertan behera geratu den, egoera berrira moldatu behar izan dute. Etorkizuneko proiektu asko dituzte, eta horien berri ematera joango dira Gure kasa-ra.

Julen eta Antton Telleria aurkezleek izar bilakatzen ari den Virginia Santos izango dute alboan —Aitziber Garmendiak jokatzen du pertsonaia—. Fase berrian, hauek izango dira saioko kolaboratzaileak: Joseba Beloki, Maddalen Arzallus, Onintza Enbeita, Marta Elvira eta Joseba Olagarai.

Beloki euskal gizartean eta kulturan erreferente diren lagunekin elkartuko da, eta COVID-19ak haien lanbide eta bizitzan nolako eragina izan duen ikusi ahalko da. Gaurko saioan, Mikel Martinez aktorearekin izandako solasaldia emango dute; Elvirak, bere estiloari eutsiz, orain «terrazeoa» egingo du. Lehenengo saio horretan, Zumaian (Gipuzkoa) izan da, hiru gonbidatu ospetsuei buruzko galderak egiten; Arzallusek Abestien zaindaria atala egiten jarraituko du, eta abestien bertsio bereziak ere prestatuko ditu; Olagaraik atal berri bat estreinatuko du, herritar ezezagunen testigantzekin osatua. Lehen bideoan, maiatzean ezkondu behar zuen Gasteizko bikote batekin izan da Olagarai, eta kontatu diote ezkontza bertan behera utzi behar izan dutela; Enbeitak «lehenengo aldiak» izango ditu hizpide: lehenengo aldia ile-apaindegian itxialdiaren ondoren, lehenengo aldia arropa denda batean itxialdiaren ostean... Nola ibili behar da orain halakoetan? Zeintzuk dira arau berriak? Hurrengo astean hasiko da bertsolaria atal horrekin.

Saioaren etapa honetan beste berrikuntza bat ere egongo da: astero kolaboratzaile ezagun bat egongo da, bere txokorik kutunenak erakusten. Gaur, Reyes Prados kazetari eta aurkezleak Elgoibarko (Gipuzkoa) bazterrik kutunenak grabatu eta platoan erakutsiko ditu. Euskal Herriko lekuak ezagutarazi nahi ditu saioak tarte horrekin.

Unai Etxabe Gure kasa-ko zuzendariak iragarri du ekainaren bukaera arte izango dela saioa asterokoa —osteguna, 22:30ean—. «Entretenimenduzko saio bat egin nahi dugu, gure gaien eta gure kulturaren ingurukoa». Protagonistak Euskal Herriko pertsona ezagunak izango direla nabarmendu du, «esparru guztietakoak». Ordutegi aldaketak tonuan eragina izan dezakeela uste du Etxabek: «Pixka bat lotsagabeagoak izango gara, ordutegiak laguntzen digulako».

Azkeneko asteetan Zuen kasatik gure kasara saioan beste formatu batera moldatu eta helburua lortu dutela uste du Etxabek. «Baina etxetik atera eta Miramongo estudiora itzultzeko desiatzen geunden».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 5ean eguneratua. ©BERRIA

Koronabirusaren azken datuak

Berria

Azkeneko 24 orduetan hiru lagun hil dira COVID-19 gaitzaren eraginez. Hamalau positibo atzeman dituzte PCR probekin, eta ez dute gaixorik ospitaleratu. Euskal Herrian 29.723 gaixok eman dute positibo guztira, koronabirusa atzemateko probaren bat eginda. Horietatik 2.089 hil dira. Grafikoak, albiste barruan.

Ertzaintzaren kontrol bat, Kantabriako (Espainia) mugan. ©Aritz Loiola / Foku

Beste hiru pertsona hil dira COVID-19ak jota

Berria

Hamalau pertsonak eman dute positibo Hego Euskal Herrian PCR proban. Ez dute inor ospitaleratu, eta pertsona bat atera dute zainketa intentsiboen unitatetik.

Herritarrak paseoan, Donostiako Ondarreta hondartzaren ondoan. ©JON URBE / FOKU

Hirugarren fasera igaroko da Hego Euskal Herri guztia

Ainhoa Larretxea Agirre

Hirugarren fasetik aitzinera, autonomia erkidegoetako lehendakariek izango dute erabakiak hartzeko eskumena. Alarma egoera bukatu arte, etenda egongo dira Nafarroaren eta EAEren arteko joan-etorriak. Nafarroan elkarte gastronomikoak irekiko dituzte, baina tabernetako barrek itxita jarraituko dute. Jaurlaritzak bihar emango ditu hirugarren faseari buruzko azalpenak.

Arroabeko haur eskola, artxiboko irudi batean ©urola kostako hitza

Partzuergoko haur eskolak ekainaren 22an irekiko dituztela jakinarazi diete sindikatuei

Irati Urdalleta Lete

LABek plantorako deia egingo du, «prebentzio plan egokia» adostu ezean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna