'Zientzialari eta ikertzaile izan nahi dut!', Euspot lehiaketarako gaia

Iragarkiak maiatzaren 29a baino lehen aurkeztu beharko dira. 3.000 euro banatuko dituzte

Euspot lehiaketako antolatzaile eta babesleak, atzo, Donostian. ANDONI CANELLADA / FOKU.
urtzi urkizu
Donostia
2023ko urtarrilaren 26a
00:00
Entzun
Hamabigarren aldira iritsi da Euspot euskarazko iragarki lehiaketa, eta aurten gazteengan zientziazaletasuna sustatzea izango dute helburu. Aurten parte hartzaileek landu beharko duten gaia hau izango da: Zientzialari eta ikertzaile izan nahi dut!.

Hain justu, aurtengo babesle nagusiaZientzia, Teknologia eta Berrikuntzarako Euskadi 2030 Plana (ZTBP Euskadi 2030) izango da. Euspoten aurtengo aldia aurkezten izan zen atzo Donostian Cristina Uriarte Jaurlaritzako Zientzia, Teknologia eta Berrikuntzarako mandataria. Eusko Jaurlaritzaren egoitzan egin zuten aurkezpena, eta han izan ziren Goio Arana Mondragon Unibertsitateko Komunikazio campuseko zuzendaria, Unai Elkoro Aretxabaletako alkatea (Gipuzkoa), Arantzazu Lagunilla Arteman agentziako zuzendaria, Naiara Okina Arizmendi ikastolako (Arrasate, Gipuzkoa) komunikazio arduraduna eta Leire Luengo Bai Euskarari elkarteko ordezkaria. Erakunde horiek dira lehiaketaren antolatzaile eta babesleak.

Parte hartzaileek 30 segundoko iragarki bat bidali beharko dute. Antolatzaileek iragarri dute lan horiek bokazio zientifiko eta teknikoak sustatzeko, gazteengan zientzia eta teknologiaren inguruko interesa eta grina pizteko, eta munduaren eraldaketan aktiboki parte hartzeko izango direla. Zientzia, teknologia, ingeniaritza, artea eta matematika gaiak gazteengana hurbildu eta balioetsi nahi dituzte aurtengo lehiaketaren bitartez, eta gai horien edukiak eta lanbideen gaineko interesa handitu. Sormena eta ikasteko grina bultzatu nahi dituzte antolatzaileek, pentsamendu zientifikoa sustatuz.

Publizitate formakuntza

Aurreko urte batzuetan bezala, Euspot lehiaketako antolatzaileek ikus-entzunezko publizitatearen gaineko formakuntzak eskainiko dituzte Euskal Herriko ikastetxeetan, iragarki egileen harrobia indartzeko asmotan. Formakuntza saio horien helburua izango da gazteei sormenaren eta publizitatearen inguruan izan dezaketen sena sustatzea, eta lehiaketan parte hartzera animatzea.

Euspot.eus webguneak 20.000 bisita inguru izaten ditu urtero. Interneteko sare sozialetan, gainera, 2.000 jarraitzaile baino gehiago ditu lehiaketak. Haren inguruko informazio gehiago webgune horretan bertan aurki daiteke.

Euspot lehiaketan sei sari banatuko dituzte aurten (3.000 euro orotara): iragarkirik onenarena; publikoaren saria; gazteen saria; musika sinkronizazio onenaren saria; Mondragon Unibertsitateko ikasleen iragarkirik onena; eta Arizmendi ikastolako ikasleen lanik onena.

Euspot ez da soilik gazteentzat, nahiz eta ikasleentzako sariak dauden. Parte hartzaileen artean askotarikoa da profila, jatorria eta interesa. Lehiaketa irekia baita edozein herritarrentzat. Urteotan, 600 iragarki baino gehiago jaso dituzte. Parte hartzaile asko espero dituzte aurten.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.