Tabakaleran beteko ditu 10 urte Eremuak arte garaikideko programak

Gasteizko Artiumen eta Bilboko Alondegian antolatu izan dute lehenago. Asteburuan jardunaldi publikoak egingo dituzte egoitza berrian
Eremuak programaren aurkezpena, atzo, Tabakaleran.
Eremuak programaren aurkezpena, atzo, Tabakaleran. JON URBE / FOKU

Ane Eslava -

2020ko urriak 14

Eusko Jaurlaritzako Kultura eta Hizkuntza Politika Sailak bultzatzen duen Eremuak programak hamar urte bete ditu, eta, urtemugarekin batera, aldaketa bat iragarri du: Donostiako Tabakalera izango du aurrerantzean egoitza. Egitasmoaren helburuak, ordea, berberak izango dira aurrerantzean ere: «Artistentzako eta sortzaileentzako plataforma bat eskaintzea, eztabaidarako eta topaketarako giroa bultzatzea eta egungo errealitate artistikoaren behatoki gisa funtzionatuko duen lan espazio bat egokitzea».

2010. urtean abiatu zuen bidea Eremuak-ek, Gasteizko Artiumen, «euskal esparruan praktika artistikoetarako testuingurua sortzeko» asmoarekin. Ondoren, Bilboko Alondegira aldatu zuten, eta atzo jakinarazi zuten aldaketa berria. «Aberasteko eta hazteko bide berriak aztertzeko» xedez eraman dute Tabakalerara, adierazi dutenez.

Heldu den ostiralean eta larunbatean Eremuak-en urteroko jardunaldi publikoak egingo dituzte Tabakalerako Z aretoan, programaren aurtengo jarduera ildoak aurkezteko. Espazioaren aldaketa ez da izango berrikuntza bakarra: jarduera artistikorako beste bi laguntza jarri dituzte martxan, sorkuntza prozesuak bultzatzeko; Laida Lertxundik eta Tripak taldeak jasoko dituzte.

Horrez gain, berria ez den arren proiektuarentzat funtsezkoa den ildo bat da arte sorkuntza, bitartekaritza eta interpretazioa bultzatzeko deialdi jarraitua: 2010etik etenik gabe gauzatu dute eta aurten ere antolatuko dute. Beste hanketako bat Harriak programa da: horren barruan, arte garaikideko erakusketak eta bestelako jarduerak eramaten dituzte Araba, Bizkai eta Gipuzkoako kultur etxeetara, artistei beren lana erakusteko guneak eskaintzeko eta hartzaile berriak lortzeko xedez; aurten, sei zentrok parte hartuko dute. Bestalde, bi egoitza artistiko eskainiko dituzte, Bartzelonako Halfhousen eta New Yorkeko Art Omi zentroetan. Azkenik, Eremuak-ek aldizkari bat argitaratzen du urtero, programaren proposamenak erakusteko, eta ikerketak eta eztabaidak zabaltzeko, eta zazpigarren zenbakia kaleratuko du aurten.

Ibilbide bat

Asteburuko jardunaldietan, azken bi urteetan praktika artistikorako laguntzak jaso dituzten zein Harriak programan parte hartu duten hainbat artistak parte hartuko dute. Halaber, epe horretan babestutako proiektuetako batzuk azalduko dituzte, eta aldizkari berria ere aurkeztuko dute.

Hamar urteko ibilbidean, Eremuak-ek ehun proiektu baino gehiago babestu ditu deialdi jarraituarekin, 90 artista baino gehiagoren lanak jarri ditu ikusgai, hamar argitalpen baino gehiago plazaratu ditu, eta zortzi jardunaldi publiko antolatu ditu.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bisitari bat Bilboko Rekalde aretoak Agustin Ibarrola artistari eskainitako erakusketan ©Miguel Toña/Efe

Ibarrolaren unibertso artistikoak bete du Bilboko Rekalde aretoa

Iñigo Astiz

Agustin Ibarrola sortzailearen azken lau hamarkadetako 70 lan inguru biltzen ditu 'Agustin Ibarrola, naturalki' erakusketak, eta Jose Ibarrola seme eta artistak egin ditu komisario lanak

 ©KURSAAL ESZENA

«Maitatua eta sostengatua sentiarazten nau publikoak»

Ainhoa Larretxea Agirre

Hirugarren diskoa aurkezteko bira bertan behera utzi ondotik, Kursaalean izango da Izaro bihartik aurrera. Pandemiatik bizirik atera izana ospatzearekin «nahikoa» du, oraingoz.
<em>Ama Kuraia</em> antzezlaneko lantaldea, joan den otsailean Bilbon egindako aurkezpenean. ©ARITZ LOIOLA / FOKU
Lander Garro idazlea ©Berria

Lander Garrok irabazi du nobelak idazten laguntzeko Agustin Zubikarai saria

Iñigo Astiz

Euskal Herriko giro nahasitik ihesi Bartzelonara doan Xabi Ugarte pertsonaiaren nondik norakoak ditu ardatz proiektuak, eta 'Faith' du behin-behineko izenburua.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna