Val do Salneseko altxorrak

Mende bat atzera egin beharko genuke Forja de Salnesen sustraiak bilatzeko, 1912ra. Rodrigo Mendezen birraitonak orduan landatu zuen gaur egun Forjas de Salnesen lantzen duten mahastirik zaharrena.

El Torno izeneko lursail horrez gain, Jose Manuel Mendez Lazarok eta bere seme Rodrigok beste hainbat lursail lantzen dituzte. 3,5 hektarea kudeatzen dituzte jabetzan eta beste hiru alokairuan, Meaño, Sanxenxo eta Barro herrietan zehar banatuta.

Forjas de Salnes Rodrigo Mendezen eta Bierzoko (Leon, Espainia) Raul Perez ardogile bikainaren proiektua da, 2005ean Rias Baixaseko Val do Salnes (Pontevedra, Galizia) inguruan sortutakoa.

Lur horien artean daude 2001ean hil zen Francisco Mendezek landatutako hainbat mahatsondo beltz. Ez zuen hark mahatsondo horiek ardoztatzeko ametsa bete, baina Rodrigok bete du ametsa, haren omenez. Rodrigoren aitonak Forjas de Salnes enpresa sortu zuen, muskuiluak hazteko azpilak egiteko. Aitonaren omenez, izen berbera jarri zion upategiari.

Izugarrizko lana egin du Rodrigo Mendezek Rias Baixaseko mahats beltzak berreskuratzeko, ardoztatzeko eta merkaturatzeko. Loureiro, caiño eta espadeiro mahats beltzek Rias Baixaseko lurren zati handi bat hartzen zuten, baina gaur egun lur horiek guztiak albariñoz landatu dira, beltzak lurretik ateraz.

Aitonaren tradizioari jarraituz, asko eta askoren harriduraz, ardo beltzak eginez hasi zen, eta eskualdeko ardogilerik onenetarikoa bihurtu zen. Albariñoak ere egiten ditu, eta askoren inspirazio direla esango nuke.

Leirana da oinarrizko albariñoa, mahasti desberdinetako mahatsak erabiliz egina. Baina lursail bateko ardoak ere egiten dituzte, besteak beste Finca Genoveva, zuria zein beltza.

Forjas de Salnesek Rias Baixaseko albariño zein beltz bikainenetarikoak egiten ditu. Rodrigo Mendezek oso lan zehatza eta bikaina egin du mahasti aukeraketan, mahasti zaharrak bilatuz eta berreskuratuz, eta ekologikoan lan eginez.

Baina upategiko lana ere asko zaintzen dute, lurren izaera zaintzeko eta babesteko, izugarrizko sentsibilitatez eta arretaz lan eginez. Upel handiak (fudre), erabilitako upelak eta altzairu erdoilgaitza baino ez dituzte erabiltzen.

Hainbat ardo egiten dituzte, baina nabarmentzekoak dira Leirana Genoveva —albariñoz eginiko zuri bikaina— eta Finca Genoveva —caiñoz egindako beltz bikaina, harrigarria—.

Forja de Salnesek egiten dituen ardoak orekatuak dira, azidotasun nabarmenekoak baina helduak, zaporetsuak eta nortasun handikoak.