EH Bildun izango du jarraipena

Aralar desegiteko proposamena babestu dute alderdiko afiliatuen %91,2k. Hamasei urteko ibilbideari jarraipena emateko tokia EH Bildu dela esan du Patxi Zabaletak
Ubera, Otegi eta Zabaleta, ezker eskua jasota <em>Eusko gudariak</em> abesten, atzo, Aralar desegiteko biltzarrean.
Ubera, Otegi eta Zabaleta, ezker eskua jasota Eusko gudariak abesten, atzo, Aralar desegiteko biltzarrean. IÑIGO URIZ / ARP

Naiara Elola -

2017ko abenduak 3

Amaitu da. Bukatu da Aralar alderdiak azken hamasei urtean egindako ibilbidea. Atzo, Iruñeko Baluarte jauregian egin zuten zazpigarren biltzarrean hartu zuten erabakia 200 bat afiliatuk. Ia aho batez —%6,3k eman zuen kontrako botoa— helburuak «beteta» zeudela-eta, Aralar desegitea adostu zuten. Rebeka Ubera, Aralarreko idazkari nagusia, ziklo amaieraz mintzatu zen: «Aralarri alderdi gisa amaiera ematean ziklo bat itxi eta beste bat irekitzen da». Amaitutako ibilbideak, dena den, EH Bildun jarraipena izango duela iragarri du Aralarreko presidente Patxi Zabaletak.

Momentu hunkigarriz josia egon zen Aralar alderdiaren ibilbideari amaiera emateko xedez Iruñean egindako ezohiko kongresua. 200 aralarkide baino gehiago elkartu ziren; %91,2k alderdia desegitearen aldeko botoa eman zuten, eta %6,3k, aldiz, kontrakoa. Behin emaitzaren berri emanda, Uberak hartu zuen hitza. «Beren ideiengatik askatasuna galdu, bizia galdu eta deserria ezagutu dutenak ekarri nahi ditut gogora», adierazi zuen. 2001. urtean Zabaletak, beste hainbat lagunekin batera, ETAren indarkeria gaitzesten zuen bestelako ezker abertzalea posible zela «defendatuz» egin zuen «apustu ausarta» goraipatu zuen. Horrez gain, ordutik gauzatutako ibilbidearekin «harro» dagoela aitortu zuen. Hala ere, etorkizunari erreparatuta, «kezkatuta» azaldu zen Ubera: «Euskararik gabe, ez dago Euskal Herririk. Hori jakin behar dute agintariek. Gure komunitatea eraikitzeko kultura, hezkuntza eta euskara ezinbestekoak dira».

Hain zuzen ere, etorkizunean pentsatuz, Arnaldo Otegi EH Bilduko idazkari nagusiari mintzatu zitzaion. Alde batetik, goraipatu egin zuen Otegik «ezberdintasunak gainditzeko izan duen gaitasuna». Bestetik, iragan urriaren 1ean, Katalunian, independentziarako bidean egindako pausoa Euskal Herrian ere emateko beharra nabarmendu zuen. «Urrian, Katalunian sentitutakoa Euskal Herrian ere bizi nahi dut. Arnaldo [Otegi], martxan jarri, mesedez, bide hori», eskatu zion.

Oriol Junqueras eta gainerako preso politikoak gogora ekarriz hasi zuen bere agurra, bestalde, Zabaletak. «Zaila egiten zait esatea, baina Aralar bukatu da», esan zuen. Hala ere, pozik agertu zen. «Aralar alderdia desegitea etorkizunera begira egindako urratsa da. Ezker abertzale zibil eta zabala eratzea izan da beti gure bidea. Bidea, orain, EH Bilduk egingo du», esan zuen Zabaletak, ziur. Giza eskubideak, euskal abertzaleen artean ezkerreko hanka izateko beharra eta autodeterminazio eskubidea ere izan zituen gogoan. «Autodeterminazioa eta herria dira gure ametsak, baina helburu horiek demokratikoki soilik lor daitezke». Azkenik, gizarteak bizi duen «krisi» gordinari aurre egiteko, politikan parte hartzera animatu zituen gazteak.

Ordezkaritza zabala

Aralarkideez gain, beste alderdi eta sindikatu batzuetako ordezkariak ere izan ziren Baluarten, EH Bilduko Arnaldo Otegi eta Gari Mujika, Abertzaleen Batasuneko Jakes Bortairu, EAko Pello Urizar eta Miren Aranoa, EAJko Unai Hualde, Sortuko Arkaitz Rodriguez eta Miren Zabaleta, Alternatibako Maria del Rio, ELAko Adolfo Muñoz Txiki, LABeko Igor Arroio eta Steilaseko Raul Lopez, esaterako. Horiez gain, ERC, BNG, Compromis, HDP edota Fronte Polisarioko kideak ere izan ziren Aralarren azken biltzarrean.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna