Abdek hautsi du berdinketa lehen partidan

1-0. Ez Abdek (47.min). .

Sevillan ilusionatu zen lehen aldiz Osasuna Espainiako Koparekin, Betisi final-zortzirenetan irabazita. Atzo, berriz, Sevillara itzultzeko lehen kolpea jo zuen, oraingoan finala jokatzeko asmoz. 1-0 irabazi zion Osasunak Athletici Sadarren. Neurketa parekatuta joan zen, baina Ez Abderen golari esker aurreratu ziren etxekoak. Lehen partida irabazita gertuago du Osasunak finala, baina, San Mamesen, zuri-gorrien gotorlekuan, erabakiko da kanporaketa, apirilaren 4ean.

Neurketari erritmo altua jartzen ahalegindu zen Osasuna hasieratik. Zaleen aurrean aritzen den aldiro hala nahi izaten du Arrasateren taldeak, eta gustura aritzen da abiadura handiko neurketetan. Pase gutxi eman eta ahal bezain laster Julen Agirrezabalaren ate ingurura hurbiltzen ahalegindu ziren gorritxoak, baina zuri-gorriek ez zieten nahi zuten jokoa egiten utzi.

Ez Abde izan zen etxekoen argi izpia. Haren talentuaren bila aritu ziren taldekideak une oro, eta haren hegaletik eraman zuen arriskua etxeko taldeak. Oscar de Marcosek ez zuen lan erreza, eta behin baino gehiagotan lagundu behar izan zion Alex Berenguerrek. Osasunaren lehen zatiko aukera garbiena Marokoko hegalekoak izan zuen, baina haren jaurtiketa kornerrera joan zen, zutoinaren ondotik.

Athleticek, berriz, Iker Muniain izan zuen gidari. Jokaldi bakoitza hobetu egiten zen baloia haren oinetatik igarotakoan, eta hark izan zituen lehen zatiko aukera garbienak. Lehenengo saiakeran atzelari baten gorputzean jo zuen baloiak haren jaurtiketa batean, eta Sergio Herrerak hanka luzatu behar izan zuen baloia atepetik ateratzeko. Ordurako lharen burua lurrera botata zuen gorritxoen atezainak. Bigarren saiakeran atzelari bati izkin egin zion area barruan, baina langaz harago jaurti zuen baloia.

Hasi bezain pronto, gola

Bigarren zatia hasi eta berehala jo zuen lehen kolpea Osasunak. Athleticen atzelariak oso aurreratuta zeuden Osasunak baloia lapurtu zuenean, eta Moi Gomezek pase bikaina egin zion Abderi atzelarien artetik. Marokoarraren kontrola ez zen ona izan, baina ederki egin zion izkin Dani Viviani baloia aurrera botaz. Area barruan sartu, atera begiratu, eta ezkerrarekin egindako errematea sareetara bidali zuen zutoina jo ostean; 1-0 47. minutuan.

Handik gutxira aldaketak egin zituen Valverdek, eta zertxobait aldatu zen neurketa. Athleticek ez zuen lortu jokaldiak ontzea, baina Raul Garciarekin eta Nico Williamsekin arriskua eraman zuten une bakan batzuetan.

Azken minutuan izan zuen Athleticek aukera garbiena markagailuan berdinketa ezartzeko,, baina Raul Garciaren errematea gorputzarekin gelditu zuen Herrerak. Sendo aritu zen defentsan Osasuna, talde lanean, eta gol baten aldearekin joango da San Mamesera.Bertan erabakiko da kanporaketa, zuri-gorrien gotorlekuan.