1.
Bi mila eta hogeigarrena
zer urtea oroitzeko...
Estigma zaharrak atera dira
urrats berri bakoitzeko.
Asmorik ez dut piztu suari
egur gehiago gehitzeko,
baina, gertatzen ari denari
bere izenez deitzeko,
bertso berriak jartzera noa
gustu duenak leitzeko.
2.
Zilborkerien buruzbidea
gogoaren zilbor-heste:
jaiominez den kimuarentzat
ari dira zigor eske.
Ahalkegarrizko jarraikera honen
aje bat, besteak beste.
Euskal Herrian argudioak
iraintzen badu hainbeste,
berandu gabe irainak eurak
argudio bihur daitezke.
3.
Esan digute soilik garela
militante alegiaz,
esan digute gu ez garela
euskaltzaleak egiaz,
egotzi zaigu umekeria
betiko aitakeriaz,
Txiolandiak eragindako
oldarraldien kariaz...
Batzuk nahi gabe ariko dira,
beste batzuk berariaz.
4.
Ideal baten araztasuna,
materiaren tolestura,
ezkonezina zirudiena
praxiak lotu ez du ba!
Oi, belaunaldi, belaunikatu
nahi ez dutenen eskura...
Oi, belaunaldi, aldi berean
lokailu eta haustura:
harramazketan neur liteke
eragin duzun azkura.
5.
Bizi gaituen garai lanbrotsu
hau hain da makurra ezen,
halabeharrez jalgi ginela
ahal zenik eta artezen.
Hautu bat egin genuelako
sartu ginen GKS-n,
moderniaren zimendu zaharrak
dardarka hasi zitezen:
saiatu denak frogatuko du
posible izan ote zen.
6.
Borrokarako molde berrien
ta zaharren azterketa,
errazkeria erreformisten
behin betiko bazterketa.
Galbahe baten modukoa da
gizaldien lasterketa.
Aieru baten eroale, gu,
joan goaz zangarteka,
gaurko urratsek letorkeenaren
ernemina dakarte ta!
Doinua: Uztailaren hemeretzia
