Albistea entzun

Hamar urtera, lehen urratsa

Giza Eskubideen Batzorde Interamerikarrak eskubide urraketen zantzuak ikusi ditu Asel Luzarragaren auzian. Duela hamar urte espetxeratu eta Txiletik kanporatu zuten
Asel Luzarraga 2018an, <em>Bioklik</em> liburua aurkeztu zuenean.
Asel Luzarraga 2018an, Bioklik liburua aurkeztu zuenean. GORKA RUBIO / FOKU Tamaina handiagoan ikusi

Gotzon Hermosilla -

2020ko urtarrilak 4 - Bilbo

Giza Eskubideen Batzorde Interramerikarrak IACHR aintzat hartu du Asel Luzarragak Txileko Estatuaren kontra jarritako salaketa, Luzarraga atxilotu eta herrialdetik kanporatu zuenean haren giza eskubideak urratu zituelakoan. Batzordeak ez du giza eskubideen urraketen inguruan ebazteko eskumenik, baina hark egindako txostenak atea zabalduko dio auzibideari. Batzordeak adierazi du Luzarragaren auzia urteko txostenean sartuko dutela, eta ikertzen jarraituko dutela.

Abenduaren 5eko data du ebazpenak, eta, bertan, batzordeak adierazi du giza eskubideen urraketak izan daitezkeela «[Luzarragaren etxera sartuta] egoitza bortxatzea, hura herrialdetik kanporatzea, auzibide penala egitea eta Luzarraga publikoki terrorista gisa aurkeztu izana»; zehazki, berme judizialerako eskubidearen, ohorearen eta duintasunaren babesaren, pentsamendu eta adierazpen askatasunaren eta legearen aurreko berdintasunaren kontrako urraketak.

Hamar urte igaro dira harrezkeroztik. Asel Luzarraga idazlea (Bilbo, 1971) 2008ko abenduan jarri zen Txilen bizitzen. Handik urtebetera, 2009ko abenduaren 31n, Txileko Polizia haren etxera sartu zen, eta atxilotu egin zuten. «Terrorismoa» leporatu zioten, eta horren froga gisa zenbait argazki aurkeztu zituzten, zeinetan leherkariak egiteko erabil zitezkeen osagaiak agertzen ziren, ustez Luzarragaren etxean atzemandakoak. Luzarragak, baina, deklaratu zuen gai horiek ez zeudela bere etxean bera atxilotu zutenean, eta geroago jarri zituztela. Gainera, salatu zuen argazkiak manipulatuta zeudela, egin zireneko data eta ordua desagerrarazteko. Poliziak ez zituen jatorrizko argazkiak inoiz aurkeztu.

Pelikula batean bezala

«Ezusteko itzela izan zen», gogoratu du Luzarragak. «Nik ordurako ikusita neukan Txile oso herrialde errepresiboa zela; gure eskualdean polizia asko ikusten zen kalean, eta giro hori sumatzen zen. Beraz, etxean nengoela karabineroak kanpoan ikusi nituenean, ez zen erabateko ezustekoa, banekielako hori gerta zitekeela, baina ez nuen espero horrelako azpijoko bat prestatuta edukiko zutenik nire aurka. Pelikula batean sartu ninduten, eta ez nekien zein zen haren argumentua, baina oso argi zegoen izorratuta nengoela».

Hasieran, leherketa batzuetan parte hartu izana leporatu zioten, baina frogatu zenean leherketak gertatu zirenean Luzarraga Euskal Herrian zegoela eta ez Txilen, akusazioa aldatu eta leherkariak edukitzea egotzi zioten. Kartzelan atxiki zuten, eta etxean egotera behartu zuten gero; epaiketa iritsi zenean, 220 eguneko kartzela zigorra ezarri zioten. Kartzelan hura baino denbora gehiago pasatu zuenez, aske utzi zuten, baina Txiletik alde egiteko aginduarekin.

Luzarragak ez du oso oroitzapen txarra ordukoaz; dioenez, espero baino denbora gutxiago eman zuen espetxean, eta batez ere lagunen elkartasunak arindu zion zigorra: «Jende askok erantzun zuen: idazleek, musikariek, anarkistek, antimilitaristek eta abarrek. Oso babestuta sentitu nintzen. Irudipena nuen kanpoan zeudenek neuk baino askoz gehiago egin zezaketela; azken finean, barruan apur bat txotxongilo sentitzen zara».

Poliziak aurkeztutako txostenean Luzarragaren ideologiaren inguruko aipamenak agertzen ziren; idazlea eta euskal herritarra dela nabarmentzen zuten, Luzarragak maputxeen eskubideen alde idatzitako artikulu bat aipatzen zuten, eta «Txileko gazteei ideia arrotzak txertatu nahia» leporatzen zioten. Horretan guztian oinarrituta, Luzarragak eta haren abokatuak argudiatu zuten jazarpenak jatorri ideologikoa izan zuela: «Orain, batzordearen ebazpenak arrazoia eman digu horretan».

Are gehiago: Luzarragaren auzian esku hartu zuten fiskala eta polizietako batzuk orain auzipetuta daude —haietako batzuk espetxean ere badaude—, beste afera batzuetan akusatuen kontra antzeko trikimailuak erabili izana eta horretarako sare bat osatu izana leporatuta. Luzarragak «oso garrantzitsutzat» jo du hori, eta uste du auziak aurrerantzean egingo duen ibilbidea baldintza dezakeela horrek.

Izan ere, atxiloketa gertatu zenetik hamar urtera iritsitako hau «lehen urratsa» baino ez da, Luzarragaren aburuz. Horrek atea zabaltzen du auziak aurrera egin dezan eta etorkizunean nazioarteko auzitegi batek Txileko Estatua zigor dezan, egoki irizten badio. Baina prozesu hori «luzea. astuna eta garestia» izango da, Luzarragaren esanetan: «Hurrengo urratsa izango da txosten bat prestatzea. Lau hilabeteko epea dugu horretarako. Eta prozesua seguru asko urtetan luzatuko da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Irungo alarde parekidea, atzo. ©JON URBE / FOKU
 ©JESUS DIGES / EFE

Elizaren sexu abusuei buruzko lege «aitzindaria» onartu dute Nafarroan

Ion Orzaiz

Arauak biktimen «aitortza» bermatuko du delitua preskribatuta dagoen kasuetan. Babes ia erabatekoa jaso du foru legeak: Navarra Sumak bakarrik bozkatu du kontra
Uxerra joan zen unea, atzo goizean, Aldako kideen aitzinean. ©BOB EDME

Etxegabetze protokolo bat aktibatzea eragotzi du Alda kolektiboak Bokalen

Oihana Teyseyre Koskarat

Iruzurreko alokatze kontratu bat eginik ere, uxer bat bidali dute jabeek familia bat kanpo ezartzeko. Prozedura «legez kanpokoa» da
LAB errepidea mozten, atzo. ©LAB SINDIKATUA

Gipuzkoako zahar etxeetan greba egin dute aldundiari inplika dadila eskatzeko

Irati Urdalleta Lete

ELAk eta LABek gaurko ere grebara deitu dute, baita hilaren 14rako eta 15erako ere. Protesta gisa, LABek Donostiako sarbide bat itxi du

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...