Albistea entzun

'Handia' Ipar Euskal Herriko zinema aretoetara iritsiko da

Baionako Gabarra Films banatzaileak hartu du estreinatzeko ardura. Astelehenean abiatuko du bira filmak, Donibane Lohizunen
<em>Handia</em> filmeko lantaldea, irailean, Donostiako Zinemaldian.
Handia filmeko lantaldea, irailean, Donostiako Zinemaldian. J.ETXEZARRETA / EFE Tamaina handiagoan ikusi

Nora Arbelbide Lete -

2018ko urtarrilak 12 - Baiona

Handia filma Ipar Euskal Herrian ematearen inguruan orain arte bizi «paradoxa arraroa» gainetik kentzeko aukera ukan dutela azaldu du Handia filmeko zuzendarietako batek, Aitor Arregik. Paradoxa, euskal filma izateaz gain, bertan noiz estreinatuko zen ezin jakinda aritu direlako orain arte, «oso lurralde zinemazalea delako iparraldea». Jendea galdezka, eta haiek erantzunik ez.

Orain badute erantzuna. Heldu den astelehenean, urtarrilaren 15ean, Donibane Lohizuneko Le Select aretoan abiatuko du bira filmak. Hortik, Hendaiatik Maulera hamar aurrestreinaldi antolatu dituzte. Estreinaldi ofiziala bera urtarrilaren 24an dute, eta hortik aurrera beste emanaldi andana bat ere aldizkatuko dira. Gabarra Films du banatzailea filmak. Atalante zinema gela, Euskal Kultur Erakundea eta Ipar Euskal Herriko zazpi zinema gela kudeatzen dituen Cinevasion sarearekin elkarlanean. Ipar Euskal Herrian banatzen duten zazpigarren filma dute. Azkena, Amama izan zuten. Ipar Euskal Herrian zein Frantzian gaindi 11.000 sartze egin zituen filmak.

Lehenago nahiko zuketela ekarri aitortu du, bide batez, Arregik. Baina hori ez dela bere esku ere gaineratu du. Kontua da Ipar Euskal Herriko aretoetan Handia proiektatu edo ez, hori Bartzelonako Film Factory enpresaren menpe dela. Honek du filmaren nazioarteko banaketa kudeatzen, eta nazioarte horretan sartzen da Frantziako estatua, eta horren menpe Ipar Euskal Herria. Gertatzen dena da Film Factoryk baduela bere sare propioa Pariseko banatzaileen artean. Eta horiek gehienetan sare guztia dute kudeatzen. Zinema aretoetatik DVDra, telebistatik pasatuz. Gabarrak ez du horrelakorik. Gabarra aretoez arduratzen da. Gabarrak aspaldi egin zien proposamena, gainera, baina Parisekoaren zain egotea nahiago zuten. Baina azkenean denbora luzatzen ari zela eta deus berri ez zela heldu handik eta, Gabarraren proposamena onartu dute. Gaur egun horrelako salmentak ixtea gero eta zailago dela esplikatu du Handia filmeko ekoizleak, Xabier Berzosak. «Banatzaileek behar dute zerbait oso indartsua, garbia. Sariak, festibal handiak, aktore ezagunak edo filma komertziala izatea».

Orain Madrilgo Goya sarietarako hamahiru hautagaitza eskuratu dituela filmak, horrek zerbait alda zezakeen galdetzean, ez dakiela dio Berzosak, eta «ez dut galdetu nahi», gaineratu du irriz. «Orain konpromisoa egina dago Gabarrakoekin eta aurrera!. Eta dena dela, ez pentsa pila bat egongo direnik. Azkenean Goyena oso garrantzitsua da guretzat, eta Espainia mailan kristorena... baina Frantzian... zero».

Gabarra bera ere ari da Frantziako Estatuan gaindi filma banatzeko negoziazioetan. Bordele eta Avignon artean zazpi zinema gela kudeatzen dituen Utopia sarearekin, besteak beste. Horrek Amama filma banatu zuen bere garaian. Handia ez dute oraindik ikusia Utopiakoek. Horretarako frantsesezko azpidatziak egin behar zituen Gabarrak. Orain eginak dira azpidatziak. Ikustekoa da zer erantzunen dieten.

Azpidatzi frantsesekin

Ipar Euskal Herrian frantsesezko azpidatzirik gabeko emanaldirik ez dute aurreikusi zinema aretoek. «Ideia publikoak nahastea» dela berretsi du Baionako Atalante zinema aretoaz arduratzen den elkarteko buru den Jean-Pierre Saint-Picqek. «Ez dadila bakarrik izan euskaldunentzat». Euskaldunak ere badirela Ipar Euskal Herrian eta azpititulurik gabeko gaualdi bat egiteak ez duela nahasketa saihesten onartu du, halere, Saint-Piquek.

Gaiarekin ez direla «tematuak» gaineratu du Cinevasion elkarteko Xabi Garatek. Eskaera hori ez dutela gogoetatu aitortu du, eta egingarria izan daitekeela. Ulertzen duela euskara dakiena trabatu dezaketela azpidatziek. Izatekotan komunikazioan ikusten du zailtasun handiena Garatek. Ez dadin gaizki ulertzerik izan, euskara ulertzen ez dutenak ez daitezen agertu azpidatzirik gabeko emanaldietara.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ruper Ordorika eta Joseba Sarrionandia, astelehen iluntzean, Bilboko Kafe Antzokiko Kutxa Beltza aretoan. ©ARITZ LOIOLA / FOKU

Gaur konta daitezkeen kantuak

Olatz Enzunza Mallona

Ruper Ordorika eta Joseba Sarrionandia askotariko gaiez solasean aritu dira 'Huntaz eta hartaz' emanaldian, elkarrekin izandako bizipenak ardatz hartuta. Astelehen iluntzean hasita, bihar arte egingo dituzte saioak, Bilboko Kafe Antzokiko Kutxa Beltza aretoan. Agortuta daude sarrera guztiak.

Maria Schneider, 2019an, Donostiako Jazzadiaren aurkezpen batean. ©Gorka Rubio / Foku

Maria Schneider eta Brad Mehldau Gasteizko Jazzaldian izango dira

Mikel Lizarralde

Uztailaren 3tik 8ra egingo den 46. jaialdirako baieztatu dituzten lehenengo bi artistak dira.

Eneko Barberena idazlea, <em>Suak erreko ez balu</em> eleberria eskuan, Oñatin (Gipuzkoa). ©JON URBE / FOKU

Mendizale kiskalien beltza

Uxue Rey Gorraiz

'Suak erreko ez balu' nobela argitaratu du Eneko Barberenak, Txalapartarekin. (H)ilbeltza sormen beka irabazita eman du. Istorioak Aezkoan izaniko mendi sute bat du abiapuntu

Irene Larrañaga, <em>Insuladas</em> erakusketaren egilea, Donostiako Aquariumeko Nautilius aretoan. ©ANDONI CANELLADA / FOKU

'Insuladas', irla diren emakumeak

Miren Mujika Telleria

Bakarrik bizi diren andreak dira Irene Larrañagaren ‘Insuladas’ erakusketako protagonista.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...