Albistea entzun

Greziako diputatuek batzorde bat eratuko dute espioitza salaketak ikertzeko

Mitsotakis lehen ministroak aitortu du oposizioko politikari bat zelatatu zutela, baina ez du argitu zergatik. Tsiprasek gobernuburuaren dimisioa eskatu du; bozak 2023an egingo dira
Pasok-KINAL aliantzaren talde parlamentarioko buruzagi Michalis Katrinis, atzo, parlamentuan.
Pasok-KINAL aliantzaren talde parlamentarioko buruzagi Michalis Katrinis, atzo, parlamentuan. EPA / EFE Tamaina handiagoan ikusi

Ander Perez Zala -

2022ko abuztuak 30

Grezian hiru espioitza afera dituzte. Iragan otsailean eta apirilean, bi kazetarik Auzitegi Gorenera jo zuten beren telefonoen kontrako erasoak jasan zituztela salatzeko, eta, joan den hilabete amaieran, oposizioko Pasok-KINAL Mugimendu Sozialista Panheleniarra-Aldaketaren Aldeko Mugimendua aliantzako presidente Nikos Andrulakisek gauza bera leporatu zion EYP Inteligentzia Zerbitzu Nazionalari; are, Andrulakisek azaldu zuenez, haren sakelakoa hackeatzeko bi saiakera izan ziren. Uda lasaia espero zuen Kyriakos Mitsotakis lehen ministroak, baina Pasok-KINAL aliantzako buruzagiak jakinarazitakoak kazetarien kasuek baino oihartzun handiagoa izan du asteotan; azkenean, presioa zela medio, atzo parlamentuak onartu egin zuen kasu horiek ikertzeko batzorde bat eratzea —Mitsotakisen ND Demokrazia Berria alderdiak gehiengo osoa du—.

Orain arte, lehen ministroak ez du ia ezer argitu espioitza kasu horien inguruan. Azkenekoz iragan ostiralean mintzatu zen parlamentuan afera horietaz, eta aitortu zuen «hutsegite bat» izan zirela; hori bai, adierazi zuen ez zekiela «ezer», nahiz eta EYPk hari eman behar dizkion bere ekintzei buruzko azalpenak.

Informazio zerbitzuek hilabeteon onartu dute oposizioko politikaria zelatatu zutela, eta, horren harira, EYPko buru Panagiotis Kontoleonek eta gobernuko idazkari nagusi Grigoris Dimitriadisek dimisioa eman zuten hilaren 5ean.

Azken horren protagonismoa handia da Andrulakisen kasuan, Reporters United kazetari sareak eta Inside Story ikerketa atariak argitara eman baitzuten Dimitriadisek harremana zuela «telefonozko entzuketen aferan zuzenean edo zeharka parte hartu duten pertsona fisikoekin eta juridikoekin».

Pasok-KINALeko presidenteak hizpidera ekarritako bi galdera erantzunik gabe daude oraindik ere: «Nork eskatu zuen eta zergatik eskatu zuen Greziako eurodiputatu eta hirugarren alderdiko buruzagitzarako hautagai baten telefonoa entzuteko, legeak eta konstituzioa urratuz [espioitza primarioen garaian egin zen, iazko abendu inguruan]? Lehen ministroa ez bada zuzeneko arduraduna, nork kontrolatzen ditu herrialdeko zerbitzu sekretuak?».

Espioitza hasi eta bost egunera, Andrulakisen telefonoan Predator spywarea instalatzen saiatu ziren, Citizen Lab Kanadako ikerketa zentroak azaldu zuenez; hori lortuz gero, erasotzaileak gailuko kamera eta mikrofonoa aktibatzeko aukera izango zukeen, baita zifraturiko mezuak irakurtzekoa ere.

Greziako Auzitegi Gorenean salaketa ezarri zuen kazetarietako batek ere leporatu zion EYPri haren sakelako telefonoan Predator instalatzen saiatu izana; Greziako Gobernuak, ordea, ukatu egin du software hori erosi izana.

ADAE Komunikazio Arloko Segurtasuna eta Pribatutasuna Zaintzeko Agintaritza Heleniarraren arabera, geroz eta handiagoa da Greziako informazio zerbitzuen zaintza aginduen kopurua: iaz, esaterako, 15.000 inguru izan ziren, 2018an baino %30 gehiago —Mitsotakis 2019ko uztailetik da lehen ministro—.

«Atzerriko indarrak»

Gobernuburuak aitortu duen arren informazio zerbitzuek legezko espioitza egin dutela, behin eta berriz errepikatu du EYPk ez duela harremanik bi kazetariek eta Pasok-KINALeko presidenteak salatu dituzten beste kasuekin. Are, Mitsotakisen arabera, «atzerriko indarrak» leudeke horien atzean, eta iradoki izan du Errusia dela erruduna.

Argudio horretatik tiraka, iragan ostiralean, Syrizako buruzagi eta lehen ministro ohi Alexis Tsiprasek egungo gobernuburuari eskatu zion argitzeko zeintzuk ziren Andrulakis espiatzeko arrazoiak: «Zeintzuk ziren segurtasun nazionaleko arrazoiak? Atzerriko agente bat da, espioi bat?».

Lehen ministroak ez zuen erantzunik eman, eta, Tsiprasek dimititzeko eskatu zion arren, Mitsotakisek azaldu zion agintean jarraituko duela egonkortasuna bermatze aldera —parlamenturako hauteskundeak beranduenez datorren udan egingo dituzte—; asmo hori argudiatzeko, gobernuburuak berriz ere aipatu zuen «atzerriko indarrei» aurre egiteko beharra.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Raphael Warnock hautagai demokrata, iragan ostiralean egindako mitin batean, Savannah hirian (AEB). Botoen %49,48 bildu zituen lehen itzulian. ©JIM LO SCALZO / EFE

Demokratek arnasa gehiago nahi dute

Urtzi Urrutikoetxea

Senaturako hauteskundeen bigarren itzulia egingo dute gaur AEBetako Georgia estatuan. Demokratek irabaziz gero, bi aulkiren aldea izango lukete, eta maniobratzeko tarte handiagoa

Hainbat sudandar, herrialdeko armadaren aurkako protestan, ekainaren 3an, Khartum hiriburuan. ©ELA YOKES / EFE

Sudango krisi politikoa gainditzeko akordioa sinatu dute junta militarrak eta oposizioak

Mikel O. Iribar

Hitzarmenaren helburuak dira «gobernu zibila» osatzea eta bi urteko epean bozak egitea. Parlamentuko eserlekuen %40 emakumeek beteko dituzte. Estatuko hainbat eragilek itunaren aurkako protestara deitu dute.

Emakume bat burua estalita, atzo, Teherango kaleetan. ©STRINGER / EFE

Mobilizazioei eusteko eskatu dute Iranen, Moralaren Polizia desegin dutela zabaldu ostean

Edu Lartzanguren - Maddi Iztueta Olano

Datozen hiru egunetan manifestazioak eta grebak egitera deitu du oposizioak. Gobernuak, ordea, ukatu egin du Polizia taldea sakabanatu izana.

Macron eta Putin prentsaren aurrean, joan den otsailaren 7an Moskun egindako bileraren ondoren. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.