Greba orokorrarekin «Jaurlaritza ahuldu» nahi dutela egotzi die EAJk ELAri eta LABi

Confebaskek ohartarazi du «oso neurri larria» dela: «Zaila da onartzea Euskadin ez dagoela lan baldintza duinik». Pentsiodunek oroitarazi dute haiengandik datorrela deia
MIGUEL TOÑA / EFE Tamaina handiagoan ikusi

Hodei Iruretagoiena -

2019ko urriak 29

«Eusko Jaurlaritza eta Nafarroako Gobernua ahuldu nahi dituzte, erabat [Espainiako] estatu mailakoak diren aldarriekin». Asmo horixe ikusi du EAJren EBBko buru Itxaso Atutxak urtarrileko greba orokorrerako deialdian. Hala, Eusko Legebiltzarreko legealdi amaierarekin lotu du Euskal Herriko Eskubide Sozialen Gutunak egindako iragarpena. Eskubide Sozialen Gutuna osatzen duten eragileek «lan baldintza, pentsio eta bizitza duinen aldeko» greba iragarri zuten joan den astean, eta atzo, Confebask patronaleko eta EAJko kideek eman zuten iritzia. Forum Europa delako hitzaldi-gosarian, ELA eta LAB kritikatu zituen bereziki EAJko burukideak: «Espero dut herrialdearen egonkortasuna lehentasuna izatea eragile politiko, ekonomiko eta sozialentzat».

Confebask patronaleko presidente Eduardo Zubiaurrek, berriz, greba babestu duten eragileei ohartarazi zien «oso neurri larria» dela iragarritakoa. Zubiaurrek Radio Euskadin azaldu zuen «beste garai batzuetan» baino lan gatazka gutxiago daudela gaur egun, baina «oihartzun publiko indartsua» lortzen ari direla: «Zaila da onartzea Euskadin ez dagoela lan baldintza duinik, soldata handienak dituen [Espainiako] autonomia erkidegoa baita, biztanleko barne produktu gordinik handiena duena, eta indize onak dituena giza garapenean eta zerbitzu publikoetan».

Confebaskeko buruak aitortu zuen badaudela «egoera zailean dauden kolektibo batzuk», baina ziurtatu zuen badituztela «bizi maila duina bermatzeko babes neurriak».

Eskubide Sozialen Gutuneko kideen iritziz, eskubide galera handi bat gertatu da 2008an hasitako krisitik. Hala azaldu zuten greba orokorrerako deia egitean: «Prekaritatearen hedapena ikusten ari gara soldatetan eta lan baldintzetan; ez da garatu babes sare egokirik, eta ez zaio babesik ematen behar gehien duen jendeari». Grebaren aurretik, ekintza gehiago ere sustatuko dituzte; besteak beste, pentsiodunen mugimenduek azaroaren 16an Hego Euskal Herriko hiriburuetan egingo dituzten manifestazioak babestuz.

CCOOri erantzuna Bilbon

Greba deialdiaren berri izan bezain laster, zalantzak agertu zituen CCOO sindikatuak, eta pentsiodunen mugimenduari eskatu zion argitzeko «gizarte osoa ordezkatzen duten ala ELAren eta LABen makulu soziala ote diren». Bilboko asteleheneroko elkarretaratzean, Bizkaiko mugimenduko eledun batek argitu zuen pentsiodunengandik datorrela greba orokorraren ideia: «Bat egitea edo ez egitea, haien esku dago». Dena den, pentsiodunek erantsi zuten ez direla sindikatuen arteko tirabiretan sartuko, eta parte hartzea sustatzeko «zubi lana egitera eta batasuna lantzera» mugatuko direla. Ildo horretatik, «erantzun irmo bat» emateko eskatu zieten langileei, gazteei, emakumeei eta sindikatuei, «kritikek eta kanpo eztabaidek mugimenduaren batasunean eragin ez dezaten». Azaroaren 16an izango da horretarako aukera, Donostiako, Bilboko, Gasteizko eta Iruñeko mobilizazioetan.

Erantzunak erantzun, CCOO Euskadiren idazkari nagusi Loli Garciak atzo ere kritikatu zuen greba deialdia. «Norbaitek ikusi du jende asko mugitzen duela honek, eta borrokaren jabe egin eta beren eremura eraman nahi dute», esan zuen Radio Popularren egindako elkarrizketan.

Confebaskeko buruek iradokitakoaren aurka, ELAko idazkari nagusi Mitxel Lakuntzak Onda Vascan ohartarazi zuen «ezberdinkeria eta prekaritatea handitzen» ari direla, eta badela garaia «erasoaldirako». Lakuntzak azaldu zuen ez dutela bat egiten «euskal oasiaren» ideiarekin: «Pertsona askorentzat, ameskeria baino ez da hori».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Ramontxu Berri tabernan egondako 683 laguni egin ziete proba, atzo ©Gorka Rubio / Foku

Hego Euskal Herrian, 492 positibo

Berria

Pertsona bat hil da Nafarroan, uztailaren 15etik lehena. Uztailaren 27tik abuztuaren 3ra Galdakaoko Muguru tabernan izan ziren 420 laguni PCR proba egingo diete, eta Donostian PCR-ak egiten jarraituko dute Ramontxu Berriko bezeroei.

Iñigo Urkullu Eusko Jaurlaritzako lehendakaria, iragan astelehenean, Gasteizen ©Jaizki Fontaneda / Foku

«Erantzukizunerako» deia egin du Iñigo Urkulluk

Joxerra Senar

Sare sozialetan zabaldutako ohar batean, Eusko Jaurlaritzako jarduneko lehendakariak ohartarazi du «denen artean ahal den guztia» egin behar dela lehen olatuan bizitako egoera dramatikora ez itzultzeko.

 ©ARITZ LOIOLA / FOKU

Eragile guztiekin biltzeko eskatu dio oposizioak Eusko Jaurlaritzari

Olatz Esteban Ezkati

538 positibo atzeman dituzte Hego Euskal Herrian, iragan astean halako bi. Ospitaleratzeak ere bikoiztu egin dira egun batean: 103 pertsona daude erietxean.

 ©RAUL BOGAJO / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna