Eraikin eta lokaletako garbitzaileek «sektoreko desberdintasunak erretzeko sua» piztu zuten atzo, Donostiako Konstituzio plazan. Beharginek —%80 emakumeak— kale garbiketan aritzen diren gizonekiko %28ko soldata arrakala amaiarazteko eskatu zuten grebaren bidez. Esparru pribatuan eta publikoan izan zuen eragina lanuzteak, ELAko ordezkari Ana Alberdik esan zuenez. Ohartarazi zuen mobilizatzen jarraituko dutela «patronalak negoziazioa blokeatzen jarraitzen badu». Sindikatu horrek %54ko ordezkaritza du sektorean.
Grebalariak manifestazioan joan ziren Donostiako Parte Zaharrean barna, eta, Konstituzio plazara iristean, su bat piztu zuten pairatzen duten tratu desberdintasuna «erretzeko». Alberdik azaldu zuen «oso atomizatua» dagoela sektorea, eta ez dela batere erraza bakarrik jarduten duten langileak elkartu eta mobilizatzea. Hala ere, lanuzteak eragina izan zuen: esaterako, Ulman, Fagor Automationen, BMn, Zara Homen, Oyshon, La Caixan eta Laboral Kutxan. Esparru publikoan ere beste hainbat aipatu zituen ELAko ordezkariak: Zumarraga, Eibar eta Soraluzeko udalak eta Oñatiko Unibertsitatea.
«Atariak garbitzen dituzten langile askok ere greba egin dute, eta halako beharginak mobilizatzea oso zaila da», erantsi zuen Alberdik. Sektore feminizatua da eraikin eta lokalen garbiketa lanena, eta oso ohikoa da langileek kontratu bi eta hiru edukitzea lanaldi oso bat lortzeko. Kale garbitzaileen artean, aldiz, lanaldi osoko kontratuak dira gehienak: %80 hain zuzen.
Eraikin eta lokalen lan hitzarmenaren negoziazioa geldirik dago Gipuzkoan, «patronalak ez duelako soldata arrakala aitortu nahi». ELAko kideak azaldu zuen Aspel Espainiako patronalak ez diela jaramonik egin sindikatuek mahairatutako proposamenei.
LABen protesta
LAB sindikatuak ez zuen atzo bat egin greba deialdiarekin, baina elkarretaratze bat egin zuen Bretxako merkatuaren alboan, Parte Zaharrean, eta, ekintza horretan, kale garbitzaileen babesa jaso zuten. Haizea Solagurenbeaskoa sindikatu abertzalearen ordezkariak esan zuen 5.100 eurokoa dela kale garbitzaileen eta eraikin garbitzaileen arteko aldea urtero; «prekaritatea izugarria da, enplegu gehiena partziala delako». Solagurenbeaskoaren arabera, «luzea eta zaila» izango da sektoreak soldata arrakalari aurre egiteko egin beharko duen borroka, eta «sindikatuen batasuna» eskatu zuen egoera zail horri aurre egiteko.
6.700 behargin aritzen dira Gipuzkoako garbiketa lanetan, baina horietatik 1.500ek baino gehiagok enpresa itun bat dute, eta ELAk egindako greba deialdiak 5.000ri baino gehiagori eragin zien. ELA, LAB, CCOO, UGT eta ESK bidaide izan dira sektoreko lan hitzarmena berritzeko erreibindikazioan, baina greba deialdiaren urratsa ELAk baino ez du egin.
Emakume garbitzaileek sua piztu dute «ezberdintasuna erretzeko»
ELA sindikatua «gustura» dago Gipuzkoan deitutako grebari garbitzaileek emandako «erantzun zabalarekin». Hainbat enpresa, banku eta eraikin publikotan izan du eragina
Iruzkinak
Ez dago iruzkinik
Ordenatu
