Albistea entzun

Errusiak okupatutako lurretan erreferendumak egitekoak dira

Luhanskek, Donetskek eta Khersonek iragarri dute hilaren 23tik 27ra galdetuko dietela herritarrei ea Errusian sartu nahi duten. Zaporizhian ere egin asmo dute galdeketa. Kremlin pozik dago
Donetskeko herri errepublikako lider Denis Puxilin, joan den apirilean, Donetsken.
Donetskeko herri errepublikako lider Denis Puxilin, joan den apirilean, Donetsken. SERGEI ILNITSKI / EFE Tamaina handiagoan ikusi

Igor Susaeta -

2022ko irailak 21

Inbasioaren ondorioz Errusiak okupatutako lurrak atzera berreskuratzeko kontraerasoa hasi zuen Ukrainako armadak duela aste batzuk. Azken hilabeteetan kontrolpean izandako eremuetako batzuk galtzen hasi da Errusia Ukraina ipar-ekialdean eta hegoaldean, eta, horiek horrela, Moskuren menpe dauden Ukrainako lurraldeetan erabaki bat hartu dute: erreferendumak egitea galdetuz herritarrei ea nahi duten beren lurraldea Errusiako Federazioan sartzea.

Donetsk eta Luhansk Donbassko herri errepublika errusiazaleek iragarri zuten, atzo, hilaren 23tik 27ra egingo dutela galdeketa, eta, RIA Novosti Errusiako berri agentziaren arabera, Donetskeko lider Denis Puxilinek eskatu dio Vladimir Putin Errusiako presidenteari auzia «ahalik eta lasterren» har dezala kontuan, baldin eta erreferendumeko emaitzan baiezkoa ateratzen bada. «Eta ez daukagu zalantzarik hala izango dela». Errusiak Ukraina hegoaldean okupaturiko Kherson eta Zaporizhia eskualdeetan ere galdeketak egitekoak dira. Kremlinek begi onez hartu ditu. Ukrainako Gobernuak adierazi du, ordea, «xantaia» egiten ari dela Errusia.

Errusiako albiste agentziek atzo kaleratu zutenez, hau izango da Luhanskeko erreferendumean planteatuko duten galdera: «Nahi al duzu Luhanskeko herri errepublika Errusian sartzea Errusiako Federazioko subjektu gisa?». Luhanskeko legebiltzar errusiazaleko presidente Denis Miroxnitxenkok azaldu zuen bost egun beharko dituztela kontsulta egiteko —ostiral honetatik hurrengo asteartera—, bozketarako beharrezko baldintzak bermatze aldera. Donetskeko eta Luhanskeko herri errepubliketako legebiltzarrek herenegun onartu zituzten erreferendum bat egitearen aldeko mozioak. NATO Ipar Atlantikoko Itunaren Erakundeko idazkari Jens Stoltenbergek ohar batean salatu zuen «gezurrezkoak» direla erreferendumak, eta Putini leporatu dio «gerra areagotzea».

Kontuan hartu behar da ezen otsailaren 24an, Ukrainako inbasioa hasi baino egun batzuk lehenago, Donetsken eta Luhansken independentzia aitortu zuela Errusiak. 2014az geroztik Ukrainako armadaren kontra Donbassen borrokan aritutako milizia errusiazaleak babestu izan ditu Kremlinek, baina, behin bi herri errepublikak independentetzat jota, aukera zuen, gainera, tropak Ukraina hego-ekialdeko eremu horretara bidaltzeko.

Orduan, Sergei Lavrov Errusiako Atzerri ministroak gogorarazi zuen, atzo, inbasioa hasi zutenean adierazi zutela lurralde horietako herriei zegokiela beren etorkizuna erabakitzea. «Eta egungo egoera honek baieztatzen du beren etorkizunaren jabe izan nahi dutela», nabarmendu zuen Errusiako telebista batean egin zioten elkarrizketan. Errusiako behe ganberako presidente Viatxeslav Volodinek adierazi zuen, era berean, baiezkoak irabazten baldin badu «lagundu» egingo dituztela.

Ukrainako Gobernuko kabineteburu Andri Yermakek Telegramen azaldu zuenez, Errusiak «porrotari dion beldurrak» ekarri ditu deialdiak, eta «mehatxu bat» iruditzen zaizkio. Dmitro Kuleba Atzerri ministroak Twitterren idatzi zuen «sasi-erreferendumak» izango direla, eta ez dutela ezer aldatuko. «Errusia erasotzaile bat da oraindik ere, eta legez kanpo okupatzen ditu Ukrainaren zati batzuk».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Pertsona batzuk hauteskundeetako emaitzak ikusten, atzo, FdI Italiako Anaiak alderdiaren egoitzan. ©ETTORE FERRARI / EFE

Europako eskuin muturrak beso zabalik hartu du neofaxisten garaipena

Julen Otaegi Leonet

Le Penek ultrak zoriondu ditu, «EB antidemokratiko eta harroputz baten mehatxuei aurre egiteagatik». Orbanentzat, «merezitako garaipena» da». Frantziak «erne» egotera deitu du
Mobilizaziorako deia egiten duen kartel bat, Moskun. 'Ohorea Errusiako heroiei' dauka idatzita. ©YURI KOTXETKOV / EFE

Putinen babesean arrakalak

Igor Susaeta

Kazakhstanek eta Serbiak esan dute ez dituztela aitortuko Ukrainan okupatutako lurretako galdeketen emaitzak. Errekrutatzerakoan izandako «hutsegiteak» kritikatu dituzte Kremlin inguruko ahots batzuek
Kolonbiako eta Venezuelako herritarrak muga zeharkatzen, Francisco de Paula Santander zubitik, atzo. ©RAYNER PEÑA R. / EFE

Venezuelaren eta Kolonbiaren arteko muga ireki dute, zazpi urteren ondoren

Maddi Iztueta Olano

Lurreko eta aireko merkataritza trukeetarako erabili ahal izango da. Bi herrialdeak harreman diplomatikoak berreskuratzeko bidean daude

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.