Harresiari gorazarre

Erdi Arora egingo dute jauzi asteburuan Artaxoan, eta, herriko ondare historikoari omenaldia egiteko asmoz, bisitak antolatu dituzte murailara

Araitz Muguruza -

2015eko abuztuak 26
Herriko ondare garrantzitsuenetarikoa da Artaxoako harresia. Nafarroakoa ere bai, Erdi Arotik hona ondoen kontserbatu den hormatzarra baita. Horregatik, historia ikerlari ugariren arretagune nagusia da Artaxoa. Herritarrek ez diote ihes egiten lotura horri, eta Erdi Arora egiten dute jauzi urtero abuztu amaieran. Aurtengoa asteburu honetan egingo dute, eta, lehenengoz, bisita gidatuak antolatu dituzte harresiaren barrenak jendeari erakusteko.

Larunbat eta igandeko bisita batzuk antzeztuak eta haurrei zuzendutakoak izango dira. Helduek, alabaina, izango dute harresia ikusteko aukera, egunez zein gauez. Hurrengo orduetan egingo dituzte bisitak: 12:00, 13:00, 16:00, 17:00, 18:00 eta 21:00etan —larunbatean bakarrik—.

Bisitak ez dira, ordea, asteburuko ekitaldi nagusi bakarrak. Larunbat goizetik izango da giroa. Erdi Aroko azoka 11:00etan hasiko da, eta, harekin batera, hainbat erakustaldi hasiko dira. Besteak beste, hegazti harrapariak, zaldunen arteko borrokak eta arku tiratzaileak ikusteko aukera izango da. Haurrentzako lantegiak ere egingo dira.

Eguerdian, berriz, pregoia irakurriko dute. Aurten, Javier Diaz Huder idazleak egingo du. Horren ostean, La leyenda de la virjen de Jerusalem antzerki emanaldia izango da.

Igandean, herri antzerkia

Bigarren antzezlan bat ikusteko parada izango da arratsaldean. Erdi Aroko errege ezkontza bat irudikatuko dute, Boda Real entre Garcia Ramirez y Doña Urraca antzezlanean. Iluntzean, garaiko pintxo eta edariak dastatzeko aukera izango dute bertaratzen direnek.

Igandean, herritarrak izango dira protagonista. Eurek sortu eta osatu dute Artaxoako erreinua antzezlana. Harresian izango da emanaldi hori, 18:30ean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna