Euskarazko bi fotogramarekin

David Perez zinemagilearen 'Ane' eta Imanol Rayoren 'Hil kanpaiak' euskarazko filmak Donostiako 68. Zinemaldiko Zuzendari Berriak sailean lehiatuko dira
Itziar Ituño aktorea da Imanol Rayok zuzendutako <em>Hil kanpaiak</em> filmeko protagonistetako bat.
Itziar Ituño aktorea da Imanol Rayok zuzendutako Hil kanpaiak filmeko protagonistetako bat. ZINEMALDIA Tamaina handiagoan ikusi

Iñigo Astiz -

2020ko uztailak 31

Ez da jaialdiko sail nagusia, baina bai nagusietako bat, eta lehiaketaren parte ere bada, gainera. Beren lehen edo bigarren lan luzea filmatu duten zinemagileen filmek osatzen dute Donostiako Zinemaldiko Zuzendari Berriak atala, eta euskarazko bi film ikusi ahalko dira aurten haren barruan. David Perez zinema zuzendari bilbotarraren Ane izango da bi horietako lehena, eta Imanol Rayo zinemagile arbizuarraren Hil kanpaiak izango da bestea. Gutxienez, euskarazko bi fotograma joango dira, beraz, Euskal Herriko zinema jaialdi esanguratsueneko zintan. Euskal Herriko beste bi zuzendariren lanak ere programatuko dituzte, gainera: Marina Palacio donostiarraren Ya no duermo eta Laida Lertxundi bilbotarraren Autoficción (Autofikzioa) film laburrak emango dituzte Zabaltegi-Tabakalera sailean. Irailaren 18tik 26ra egingo dute festibala aurten, eta, ohitura duenez, antolakuntza urratsez urrats ari da programazioaren berri ematen. Jaialdiak industriarentzako «erabilgarria» izateko bokazioa ere baduela gogorarazi du Jose Luis Rebordinos zuzendariak.

Rayok (Arbizu, Nafarroa, 1984) Bernardo Atxaga idazlearen Bi anai eleberriaren moldaketarekin egin zuen estreinaldia zinemagintzan, 2011n, eta Zinemira saria eskuratu zuen hari esker Zinemaldian bertan. Miren Gorrotxategi idazlearen 33 ezkil eleberria hartu du orain oinarritzat, eta Hil kanpaiak izendatu du haren zinemarako moldaketa. Besteak beste, Itziar Ituño, Eneko Sagardoi eta Kandido Uranga aktoreak zuzendu ditu, eta Garizmendi baserrian agertutako hezurrek berriz irekiko dituzten iraganeko zauriak ditu ardatz istorioak. Egilearen hitzetan, «genero beltzetik abiatu» eta «tragediarantz doa» pelikula, eta pertsonaien ikuspuntua da giltzarria.

David Perez Sañudok (Bilbo, 1987) film laburrak egin ditu orain arte nagusiki, eta mundu osoko jaialdiak ezagutu ditu haiei esker. Esaterako, Aprieta pero raramente ahoga film laburra aurkeztu zuen Zinemira-Kimuak sailean 2017an, eta euskaraz filmatu du orain bere lehen film luzea: Ane. Desagertutako alaba baten bilaketa kontatzen du istorioak. Egun batez, Ane ez da etxera agertuko gosaltzera, eta haren bila abiatu beharko du amak, Lidek. Abiadura handiko trena zaintzen egiten du lan Lidek, eta, desagerpenaren harira, ezezagun zitzaion alabaren aktibismoa deskubrituko du. Izan ere, familia barruko komunikazioari eta komunikazio faltari buruzkoa ere bada filma. Besteak beste, Patricia Lopez Arnaizek, Jone Laspiurrek, Mikel Losadak eta Nagore Aranburuk osatu dute aktore taldea.

'Akelarre' eta 'Patria'

Horiez gainera, Euskal Herrian kokatutako filmek ere izango dute beren lekua Zinemaldian. Pablo Aguerok zuzendutako Akelarre filma ikusi ahalko da, esaterako, Sail Ofizialean. Argentinarraren bosgarren lan luzea da, eta Euskal Herrian filmatu du, euskara eta gaztelera tartekatuz. XVII. mendean girotutako drama historiko bat da, eta sorginkeriarekin zerikusia duen prozesu judizial bat du oinarri. Hala aurkeztu du pelikula zuzendariak berak, jaialdiak hautatutako filmen berri emateko prestatutako bideo batean: «Boterearen jabeek pentsamendu bakarra, hizkuntza bakarra, jainko bakarra ezarri nahi dute. Horregatik zapaltzen dituzte tokiko kulturak, estigmatizatzen dituzte emakumeak, eta hil egiten dituzte. Baina emakumeak basoan abesten eta kantatzen aritzen dira; ez dute amore ematen. Hori da Akelarre».

Lehia nagusiaren parte izango da Agueroren lana, eta bertan proiektatuko dituzten beste bi filmen berri ere eman dute antolatzaileek. Antonio Mendez zuzendari espainiarraren Courtroom 3H fikzioz besteko lan luzea ere lehiatuko da sail horretan, eta, lehiaz kanpo, berriz, Rodrigo Sorogoyen zuzendariaren Antidisturbios fikziozko lana ere emango dute.

Sail Ofizialak Patria telesailaren emanaldi berezia ere izango du. Aitor Gabilondok HBO Europerentzat sortutako zortzi ataleko telesaila da, Fernando Aranburu idazlearen nobelan oinarritutakoa. Euskal Herriko historiaren hiru hamarkada jorratzen ditu, indarkeriak banatutako bi familiaren ikuspegitik, eta euskal aktore sorta batek hartu du parte hura filmatzen. Zuzendaria pozik azaldu da aukerarekin: «Ohore bat da niretzat».

Isabel Lamberti (Buhl, Alemania, 1987) zuzendariaren La última primavera emango dute Zuzendari Berriak sailean, eta Juan Cavestany madrildarraren Un efecto óptico, berriz, Zabaltegi-Tabakaleran. Azken sail horretan proiektatuko dituzten hiru film laburren berri ere eman dute Zinemaldiaren antolatzaileek. Carla Simon kataluniarraren eta Dominga Sotomayor galiziarraren arteko harremana kontatzen duen Correspondencia izango da haietako bat, eta Marina Palacioren Ya no duermo eta Laida Lertxundiren Autoficción dira beste biak.

Perlak sailean, Maite Alberdiren (Santiago, 1983) El agente topo izango da ikusgai, zahar etxe batean espioi sartzen den 83 urteko alargun bati buruzkoa, eta, azkenik, Warner Espainiak eta Donostiako Zinemaldiak El verano que vivimos filmaren ongintzazko emanaldia eskainiko dute, zeina Carlos Sedes galiziarrak (Coruña, 1973) zuzendu baitu.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du agerraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren hutsegiteak berriz ere egin ez daitezen, eta aurrera begira ikasteko.

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Xixilu jatetxean, eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta uztailaren 31tik abuztuaren 4ra jatetxean egondakoek. Galdakaon, tabernan uztailaren 27tik abuztuaren 4ra egon zirenek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna