Albistea entzun

Lurralde koreografikoa dantzarazten

Esperimentazio eta ekoizpen egonaldiek, gogoeta saioek eta dokumentazio eta mediazio ekintzek osatuko dute mugaz haraindiko Atalak Sarearen programa berria
Clara Montero, Fernando Saenz de Ugarte, Mari Jose Telleria, Carine Agirregomezkorta eta Pello Leiñena.
Clara Montero, Fernando Saenz de Ugarte, Mari Jose Telleria, Carine Agirregomezkorta eta Pello Leiñena. JON URBE / FOKU Tamaina handiagoan ikusi

Itziar Ugarte Irizar -

2021eko martxoak 4

Dantzaren sektoreko profesionalei lan egiteko aukerak areagotzea eta sormen koreografikoa sustatzea: hasieratik helburu horiek jarri zituen zimendutzat Atalak Sareak, eta horien gainean ondu berri du urteari begirako programa berria ere. Akitania Berria-Euskadi-Nafarroa euroeskualdea biltzen du egitasmoak, eta, Dantzaz konpainia izan bazen ere sustatzaile nagusia, urterik urte bazkideak finkatzeak sendotu egin du programa. Horregatik, erakundeen arteko «konplizitate» hori txalotu dute ordezkariek programaren aldi berria aurkeztean. Konplizitatea eta elkarlana, non eta «hainbeste babes eta ikusgarritasun behar duen sektorean», Clara Montero Tabakalerako kultur zuzendariaren hitzetan. Dantzaz konpainiaz eta Tabakaleraz gain, Gasteizko Antzokien Sarea, Gipuzkoako Dantzagunea, Nafarroako Baluarte fundazioa eta Malandain Ballet Biarritz zentro koreografikoa aritu dira aurten Atalak Sarea sustatzen —kolaboratzaile sare zabalago batekin—.

Hiru lan lerro nagusi izango ditu programak aurten. Lehena, eta aurreko urteetan egindako urratsen bidetik, esperimentazio laborategiak izango dira. «Laborategi bereziak dira», Fernando Saenz de Ugarte Dantzaz konpainiaren zuzendariaren hitzetan. «Bereziak, ez direlako soilik koreografoak ariko, baita dantzariak ere, eta ez edozein kopuru: 10-14 bat izango dira». Azaldu duenez, zailtasun ekonomikoengatik, kopuru txikiagoak ohikoagoak dira egun, baina, besteak beste, sektorea ehuntzea euren asmoetako bat delako mantendu dituzte halako taldeak. Dantzarien artean soilik ez, erakundeekin eta komunitatearekin ere loturak estutzea da asmoa. «Garrantzitsuena, azken hori», esan du Sanez de Ugartek.

Hiru laborategi egingo dituzte: martxoan, Itxaso A. Cano koreografoak zuzenduko du lehena; ekainean, Eva Guerrerorekin ariko dira dantzariak, eta abenduan, azkenik, Amaia Elizaranekin. Bi astez ibiliko dira laborategian, «ezer amaitzeko presiorik gabe», Dantzaz-en arduradunaren esanetan. «Sorkuntzan, saiakeran ibiliko dira dantzariekin, eta, gero, lekuan lekura moldatuta egingo dituzte aurkezpenak».

Bada berrikuntza bat, ordea, egonaldien alorrean: aurten lehen aldiz, ikerketa eta esperimentazioa soilik ez, ekoizpena ere bultzatuko du Atalak Sareak; hasieran, ekoizpen bi urteko. Lehena egin dute jada: Carmen Larrazaren Nikola obra ekoitzi dute berriki. Urte bukaeran helduko diote bigarrenari, Hilde Koch ibilbide oparoko dantzari eta koreografoaren eskutik. «Artista kontsagratu bat» dela gogorarazi du Saenz de Ugartek, eta gaineratu haren lana «ondare» modura aztertu eta baliatzea izango dela helburua.

Adarrak zabaltzen

Beste bi lan lerroak ere berrikuntzekin osatu dituzte aurten. ATA-LAB deitu dutena da horietako bat, eta «pentsamendu laborategi» modura definitu dute. Izan ere, azken urtean, eta pandemia tarteko, dantzaren sektoreko profesionalen topaketak sustatzen aritu da Atalak, eta hor abiatutako hausnarketa giroari jarraipena ematea da orain asmoa.

Azken lan lerroa mediazioa eta dokumentazioa da. Azkenaldian bi proiektu piloturekin aritu ostean, horiek sendotu nahi ditu orain Atalakek. Euroeskualdeko Lehen eta Bigarren Hezkuntzako eskoletan eta helduen dantza talde amateurretan sorkuntza koreografikoa sustatzeko, eta bidenabar hausnarketarako tresna bihurtzeko, bi programa abiatuko dituzte: Dantzazubia eta Le Labo. Hori, mediazioan. Dokumentazio lerro berrian, ostera, koreografien sortze prozesuetan eratzen diren artxibo askotarikoak dokumentatzea da asmoa, horretarako lurraldeko hainbat entitaterekin lankidetzan jardunda. Horretan arituko da aurrerantzean Eresbil, esaterako, zeina aurten batu den sarera, Musikaren eta Arte Eszenikoen Artxiboarekin (AMAEN) eta Creative Pathsekin batera.

Asmo horiek guztiak zenbakitan jarrita, eta sustatzaileen arabera, hiru esperimentazio laborategi, ekoizpen koreografiko bat, hamasei emanaldi, hamahiru mediazio saio, sektoreko kideen arteko sei topaketa, 86 lan kontratu eta 1.200 ikusle inguru bilduko ditu, gutxienez, Atalak 2021ek. Saenz de Ugarte: «Pandemiak gauzak zaildu arren, Atalak Sareak badu etorkizuna; badu esanahia, eta badu eginbeharra».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©JAIZKI FONTANEDA / @FOKU

«Diskoa zuzenean defendatu behar da; hori falta zaigu»

Aitor Biain

Aurten emandako kontzertuetan, dantzatzeko ezohiko behar bat sumatu du entzuleengan Ortiz de Villalbak. Hutsune hori du berak ere, eta emankizun gehiago antolatzeko eskatu du.
Bilbo Arten bekadun izandako garaian sortutako obrak bildu ditu Zubizarretak <em>Eggs onna plate</em> erakusketan. ©MARISOL RAMIREZ / FOKU

Bilbo Arten egindakoa, argitara

Olatz Enzunza Mallona

Alazne Zubizarretaren 'Eggs onna plate' erakusketa jarri dute ikusgai Bilboko arte zentroan
 ©JON URBE / @FOKU

Bekatarien boteretzea

Itziar Ugarte Irizar

Dom Campistronek 'Bekatorosak' liburu grafikoa ondu du, Aldude inguruko lesbiana, gay eta bisexualen zazpi testigantzatan oinarrituta

1 ©MONIKA DEL VALLE / @FOKU

Denboraren kondentsazioak

Amaia Igartua Aristondo

Remigio Mendibururen hiru hamarkadako lana bildu du Bilboko Arte Ederren Museoak 'Mendiburu. Materia eta memoria' erakusketan. Eskulturaren esanahiaz dihardu. Irailaren 5era arte dago ikusgai

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.