Noiz sortua: 2019-09-17 00:30:00

Ernalketa lagundua zabaltzea erne zainduko du Les Bascos elkarteak

Ostegunean aztertuko dute Frantziako Asanblean, bioetikari buruzko lege proiektuaren barruan
Les Bascos eta Planning Familial elkarteen prentsaurrekoa, atzo, Baionan.
Les Bascos eta Planning Familial elkarteen prentsaurrekoa, atzo, Baionan. GUILLAUME FAUVEAU

Ekhi Erremundegi Beloki -

2019ko irailak 17

«Herrialde irekienen eta progresistenen parte izanen gara». Ernalketa lagundua emazte guziei zabaltzea urrats garrantzitsua da, Beñat Gachen Les Bascos elkarteko lehendakariarentzat. Horregatik, erne erreparatuko diote ostegunetik aitzina Frantziako Asanblea Nazionalean aztertuko duten biotekari buruzko lege proiektuari: zenbait puntu zehaztea nahi dute, eta espero dute ez dela kontrakoen mobilizazio handirik sortuko, 2012an sexu berekoen ezkontzak onartu zituztenean gertatu gisan.

Orain arte, antzutasun arazoak zituzten bikote heterosexualek soilik zuten ernalketa lagundurako aukera Frantzian. Gainerako emazteek ahal bezala egiten zuten: lagun edo ezagun bati laguntza eskatuta, ezezagun bati Interneten gametoak erosita, atzerriko klinika pribatu batera joanez...

Emmanuel Macron Frantziako presidentea iazko udazkenean engaiatu zen ernalketa lagundua emazte guziei zabaltzera 2019 bukaerarako. LGBT elkarteek eta mugimendu feministak lege berezitu bat nahi zuten, baina bioetikari buruzko lege proiektuan sartu dute azkenean. Uztailaren 24an aurkeztu zuten Frantziako Kontseiluan. Lehen lau artikuluetan aipatzen dute emazte guziei zabaltzea medikuntza bidezko haur sortzearen eskubidea; gameto ematearen eta kontserbazioaren baldintzak finkatzen ditu; helburutzat hartzen du medikuntza bidez sortutako haurren eskubideen aitortza; eta, emazte bikoteen kasuan, medikuntza bidez sortutako haurren gurasotasuna onartzeko bidea irekitzen du.

Les Bascos eta Planning Familial elkarteek aitzinamendutzat jo dute proiektua; hala ere, zenbait puntuk kezka sortu diete. Gurasotasunari dagokionez, emazte bikoteen kasuan, aitzinetikako borondate adierazpen bat izenpetzea eskatzen du lege proiektuak, haurra izanen duen emaztearen bikotekidea ere guraso gisa aitortua izan dadin. Adierazpen hori baldintza gisa ezartzekotan, ernalketa lagundua erabiltzen duten emazte guzientzat ezartzea nahi dute bi taldeek, bikotekidearen sexua kontuan hartu gabe.

Bestalde, lege proiektuak eskubidea ematen dio haurrari 18 urte betetzean gameto emaileari buruzko informazioa lortzeko. Horren ondorioz, orain arteko gameto bilketak deuseztatzea aurreikusi du lege proiektuak. Les Bascos eta Planning Familial haurra gameto emaileari buruz informatzearen alde dira, baina beharrezkotzat jo dute baldintzak zehaztea. Halaber, orain arte emandako gametoak deuseztearen kontra agertu dira, «galtze» handia litzatekeela ebatzita. Emaileak galdekatzea proposatu dute, haien nahia zein den jakiteko, eta emaileak biderkatzeko sustapen kanpainak egitera deitu dute.

Azkenik, medikuntza bidezko haur sortzea erabili nahi dutenei ebaluazio psikologikoa egitearen kontra agertu dira.

Ahalak dituen ospitalea

Bi elkarteen hitzetan, legea ez da «osoa». Gachenek salatu du haurrak ernaltzeko aukera atxiki duten gizon transexualen kasua «erabat baztertuta» geratu dela. Bestalde, heriotzaren ondorengo ernalketa lagundua ere ez dute aipatzen. «Gaur egun, emaile bat hiltzen bada, haren gametoak erabil daitezke. Haatik, bikote batean gameto emailea hiltzen bada, emazteak ez ditu gameto horiek erabiltzen ahal».

Azkenik, zerbitzu publikoa indartzeko beharraz abisatu dute: «Gaur egun, Espainiako Estatuko klinika pribatuetara joaten dira medikuntza bidez haurra izan nahi duten emazteak. Sekulako negozioa dute. Uste dugu publikoak bermatu beharko lukeen eskubidea dela. Gaur egun, zinezko arazoa bada ospitale publikoarekin: ahal gehiago behar dira», azaldu du Nadine Leonard Les Bascos elkarteko kideak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 29an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan lau pertsona hil dira COVID-19 gaitzaren eraginez, 22 positibo atzeman dituzte PCR probekin, eta bi gaixo ospitaleratu dituzte. Euskal Herrian 29.107 gaixok eman dute positibo guztira, koronabirusa atzemateko probaren bat eginda. Horietatik 2.056 hil dira. Grafikoak, albiste barruan.

Araban, Bizkaian eta Gipuzkoan Lanbide arduratuko da errenta berria banatzeaz. ©JUAN CARLOS RUIZ / FOKU

Iritsi da bizitzeko gutxieneko diru sarrera, muturreko pobrezia murrizteko

Irune Lasa

Espainiako Gobernuak diru saria onartu du, eta ekainean bertan hasiko da ordaintzen. Hegoaldean, Eusko Jaurlaritzak eta Nafarroako Gobernuak kudeatuko dute

Haur bat, jolas parke baten ondoan, Zarautzen. / ©Gorka Rubio, Foku

Espainiako Gobernuak eguneko udalekuak baimenduko ditu hirugarren fasean

Jon Ordoñez Garmendia

70 urtetik gorakoentzako ordutegiak desagertu egingo dira. Gehienez hogei pertsona elkartu ahal izango dira, baina ezingo da probintziatik atera oraindik.

Donostiako Zurriola hondartza, atzo. ©Gorka Rubio / FOKU.

Murgak dio ezin direla errepikatu hondartzetan ikusi diren irudiak

Maddi Ane Txoperena Iribarren

Jendea ez pilatzeko eta hondartzak modu «dinamikoan» erabiltzeko eskatu du Eusko Jaurlaritzako Osasun sailburuak. Era berean, galdegin du aisialdirako bada ez erabiltzea garraio publikoa «jende asko dagoenean».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna