Gerra Ukrainan

Moskuk salatu du Ukrainako indarrak Errusian sartu direla

Kievek esan du Kremlinen aurka ari direla dioten miliziak Errusiako indarrekin borrokatu direnak direla

Dnipro hiriko erreskate taldeen zenbait ibilgailu txikitu zituen Errusiak atzo egindako erasoak. EFE.
Igor Susaeta.
2023ko maiatzaren 23a
00:00
Entzun
Ukraina ekialdearekin muga egiten duen Errusiako Belgorod eskualdean eraso batzuk gertatu ziren atzo, hango gobernadorearen arabera. Viatxeslav Gladkoven esanetan, gutxienez zortzi pertsona zauritu zituzten, eta eraso horien atzean «Ukrainako armadako sabotaje egile batzuk» daude. Kievek, baina, hori ukatu zuen, eta nabarmendu Kremlinen aurka borrokatzen direla dioten erbesteratu errusiarrez osatutako milizia batzuk direla gertatutakoaren erantzuleak. Milizia horietako batek, hain justu, ohar bat zabaldu zuen sare sozialetan, eta «Kremlinen diktaduraren aurka» egitera deitu.

Errusiaren Askatasuna Legioa eta Boluntario Errusiarren Taldea dira Ukrainako inteligentzia zerbitzuek aipatutako bi miliziak, eta Errusiaren Askatasuna Legioak adierazi zuen, Twitterren, Kozinka herri mugakidea hartu zutela. Han inguruan dauden kazetariek, ordea, ez zuten halakorik baieztatu. Hori bai, Ukrainako zein Errusiako iturri ofizialek azpimarratu zuten borrokak izan zirela bi herrialdeen arteko mugan. Errusiak alerta «antiterrorista» ezarri zuen Belgoroden, eta gobernadoreak jakinarazi zuen zibilak ebakuatzen hasi direla.

Azkeneko urte eta erdian gertatu izan dira aire eraso batzuk Errusian, eta Moskuk Ukraina egin izan du horien erantzule, nahiz eta Kievek ukatu egin izan duen halakorik egin izana. Dena den, atzokoa ez da milizia horiek Errusian sartzen diren aurreneko aldia; bai, ordea, elkarrekin aritzen diren lehendabizikoa.

Eta horren guztiaren harira, Joe Biden AEBetako presidenteak azaldu zuen herenegun Volodimir Zelenski Ukrainako presidenteak bermatu diola F-16 gerra hegazkinak baldin badituzte ez dituztela erabiliko Errusiako lurrei eraso egiteko. G7koen bilera egin zuten asteburuan Japonian, eta Ukrainako presidentea ere munduko herrialde industrializatuenetako liderrekin bildu zen. Horiek berretsi zuten Kiev behar beste denboraz lagunduko dutela, eta babestu dute Ukrainako pilotuak F-16 gerra hegazkinak gidatzeko entrenatzea. Aukerari atea ireki dioten arren, ez dago argi, ordea, abioi horiek emango dizkioten.

Afrikaren ordezkaritza

Ukrainako Gobernuak atzo jakinarazi zuen Afrikako herrialde batzuen —Egipto, Senegal, Uganda, Zambia eta Kongoko Errepublika Demokratikoa— ordezkaritza batekin biltzekoa dela Zelenski. Bake proposamen bat egitekoak dira, eta Errusiako agintariekin ere batzartuko dira

Errusiako indarrek, berriz, Dnipro hiria bonbardatu zuten atzo goizaldean. Ukrainako iturrien arabera, erreskate taldeen ekipamendua suntsitu zuten.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.