Mugak gotortu eta kanporatzeak azkartu nahi ditu Bruselak

Europako Batzordearen proposamenak ez du jasotzen migratzaileak banatzeko kuota sistemarik. Poloniaren eta Hungariaren mesfidantzak gainditzea du helburu egitasmoak
Hiru migratzaile Portugalgo Loule herrian, itsasoan erreskatatuak izan ondoren.
Hiru migratzaile Portugalgo Loule herrian, itsasoan erreskatatuak izan ondoren. LUIS FORRA / EFE Tamaina handiagoan ikusi

Arantxa Elizegi Egilegor -

2020ko ekainak 23

Martxorako behar zuen itxia migratzaileen inguruko Europako Batasunaren proposamenak, baina Poloniaren eta Hungariaren jarrerak lehenik eta pandemiak ondoren atzeratu egin dituzte Bruselaren planak. Bi herrialde horiek hasieratik agertu dira Europara asilo eske heltzen diren migratzaileak kuota bidez banatzearen aurka, eta, ondorioz, banaketa zehaztuko duen oinarririk gabe, Grezia, Italia eta Espainia izan dira azken urteotan migratzaile gehien hartu dituzten estatuak.

Margaritis Schinas Batzordeko presidenteorde eta Europako Bizimodua Babesteko komisarioak, eta Ilva Johansson Barne komisarioak atondu duten planaren arabera, indartu egingo litzateke kanpo mugen gaineko zaintza eta azkartu kanporaketak.

Mugako polizia bilakatu den Frontexi baliabide teknologikoak bermatuko dizkiote EB Europako Batasuneko kanpo mugak airez eta itsasoz zaindu ditzan. Horrez gain, «erantzun azkarreko taldeak» ere izango ditu erakundeak, EBn paperik gabe sartzen saiatzen diren migratzaileak atzeman eta unean bertan kanporatzeko. «Krisi bat» piztuz gero, berriz, estatu kideei laguntza eskatu ahal izango die.

Kanporatzeak azkartu eta ugaritu ere egin nahi ditu Bruselak, eta, horretarako, asiloa ukatzen denetik eskatzailea kanporatzen den arteko tartea murriztu nahi du. Helburu horrekin, migratzaileen jatorrizko herrialdeekin akordioak hitzartu ditu azken urteetan, eta dagoeneko 82 sinatu ditu —duela bost urte 14 ziren—.

Bide batez, kuota sistema ere ezabatu egingo dute. Era horretan, estatu kideek ez dituzte gutxieneko migratzaile kopuruak onartu beharko, eta, aldiz, nahikoa izango lukete haiek hartzen dituzten herrialdeei «laguntza» eskaintzea.

Testua, ordea, proposamena besterik ez da oraingoz. Europako Batasunak datozen asteetan eztabaidatu eta onartu beharko du. Dena den, uztailaren 1etik EBko Kontseiluaren presidentetza duen Alemaniak berak ere ez du itxaropen handirik. Angela Merkel kantzilerrak argi utzi zuen bere agintaldiko lerro nagusiak aurkezterakoan, ez duela espero akordiorik datorren urtearen amaierara arte, eta orain ezer lortzekotan behin-behineko hitzarmenak liratekeela.

2015ean, milaka migratzailek Siriako gerratik ihesi Europarako bidean hartu zutenean ere ahalegindu zen Brusela, EBren kanpoaldeko muga osatzen duten herrialdeen zama arintzen. Ordu hartan, kuota sistema ezarri zuen Batzordeak, eta estatu kideen artean banatu zituen EBk hartu beharreko 160.000 iheslariak. Estatuek, ordea, ez zuten hitza bete, eta soilik 34.705 asilo eskatzaile lekualdatu zituzten. Poloniak, Eslovakiak eta Hungariak akordioaren aurka jo zuten, eta zalantzan jarri zuten haren legezkotasuna bera. Europako Justizia Auzitegiak bi urte geroago ebatzi zuen auzia eta Bruselaren alde egin zuen. Aipatu hiru herrialdeek, ordea, uko egin zioten asilo eskatzaileak hartzeari. Porrot hura ahaztu nahi du orain EBk, eta migratzaileen inguruko politikak baliatu nahi ditu batasun itxura emateko.

Erreskateak

Europako Batzordeak migratzaileen inguruko politikak zehazten dituen bitartean, gobernuz kanpoko erakundeek itsasoan erreskateak egiten jarraitzen dute. SOS Mediterranee GKEaren Ocean Viking itsasontzia atzo abiatu zen Marseillatik (Okzitania) Libiako kostaldera, 15 eguneko berrogeialdia bete ostean.

Erreskate lanetan ari dira aurrez ere Mare Jonio eta Sea Watch 3 ontziak. Bien artean 278 pertsona erreskatatu zituzten joan zen astean Libiako kostaldean. Asteburuan utzi zituzten guztiak Siziliako portuan (Italia). Gobernuz kanpoko erakundeek ohartarazi dute egoera larria dela oraindik, eta ohartarazi pandemia dela-eta ezarritako segurtasun neurriek ez dituztela migratzaileak gelditu. UNHCR Iheslarientzako Nazio Batuen Goi Mandatariaren datuen arabera, 339 pertsona hil dira Mediterraneoan urtea hasi zenetik.

Alde horretatik, EBrekin migratzaileak geldiarazteko akordioa hitzartu zuen Turkia oso kritiko agertu da Bruselarekin. «Turkiak besoak zabalik hartzen ditu migratzaileak, haien jatorriari begiratu gabe; aldiz, baliabide gehiago dituzten herrialdeek kuotak jartzen dizkiete asilo eskatzaileei», salatu du Recep Tayyip Erdogan presidenteak. Turkia da gaur egun iheslari gehien hartu dituen herrialdea, gehienak Siriako gerratik ihes egindakoak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Ordiziako herritar batzuk maskarak jantzita, atzo. ©JAVIER ETXEZARRETA / EFE

Agerraldiak ugaritu egin dira

Irati Urdalleta Lete, Iosu Alberdi Igor Susaeta

Beste bi foku agertu dira Nafarroan: Tuterakoan 23 pertsonak eman dute positibo, eta Iruñekoan, bostek. Ordiziakoan 58 dira kutsatutakoak; Murgarentzat, ez dago konfinamendua ezartzeko beharrik

 ©JON URBE / FOKU

Maskara, paisaiaren parte, era orokortuan ez bada ere

Arantxa Iraola - Amaia Ramirez de Okariz Kortabarria - Edurne Begiristain -Olatz Silva

Birusak hedatzen segitzen duela erakutsi dute azken egunotako datuek; izurriari euste aldera, beraz, maskararen erabileraren aldeko ahotsak ozentzen ari dira. Ez da uniformea erabilera. Errenterian, Hendaian eta Urruñan, Gasteizen eta Barakaldon izan da BERRIA erabilera aztertzeko.

Bi erizain, Galdakaoko ospitalean (Bizkaia) maiatzaren 6an, 55 egun gaixorik zeramatzan gizon bat sendatu zela ospatzen. ©ANDONI LUBAKI / FOKU

Koronabirusaren lehen kolpea Euskal Herrian: 2.152 hildako lau hilabetean

Mikel P. Ansa

Martxoaren 1etik ekainaren 30era, lau hilabete. Neguaren azken hondarra, eta udaberri guztia. Koronabirusaren pandemiak hankaz gora jarri du Euskal Herria, eta bizimoduak astindu ditu. Pandemiaren lehen olatuaren balantzea egin du BERRIAk, hamazazpi grafiko eta hamazazpi galdera hauekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna