Berrogei urtez idazleen bilgune

Azkeneko urteetan bezala, bi egunetan egingo dute, aurten ere, Sarako Idazleen Biltzarra (Lapurdi). Apirilaren 10ean hasiko da, publiko zabalari irekia zaion egunarekin. Biharamunean, berriz, profesionalentzako eguna antolatuko dute Bilketa egitasmoaren, Euskal Kultur Erakundearen eta Pirinio Atlantikoetako Departamenduko liburutegiaren partaidetzarekin. Egitarau «biziki aberatsa» proposatu nahi izan dutela azpimarratu du Jean-Michel Garatek, Sarako Biltzarra elkarteko lehendakariak. Atzo egin zuten idazle bilkuraren aurkezpena, Saran bertan.

110 idazleren kopurua «ausarki» gainditua izango zela azaldu zuen Garatek. Edizio honetan hemeretzi argitaletxek eta hamazazpi elkartek parte hartuko dute. «Edizio ederra izango da aurtengoa». Aldiz, aurten ez da saririk esleituko, bi urtean behin egiten baita.

Lehen egunerako, hiru gune nagusi bereizi dituzte antolatzaileek, denak Sarako kiroldegiaren inguruan. Kiroldegi barruan liburu azoka proposatuko dute, eta bertara sartzeko 2 euroko sarrera ordaindu beharko da. Kanpoaldean, ordea, dohainik egoteko aukerarekin, bi karpa jarriko dituzte. Karpa txikia izango da, batetik, non Kiribil konpainiak gazte literaturako irakurketa musikatuak proposatuko dituen. Karpa handian, bestetik, aurkezpen eta mahai inguruak egingo dira, eta Kanaldude telebistak grabatuko ditu. Hortxe proposatuko du ere haurrentzako liburu txokoa Sarako mediatekak.

Apirilaren 11n, asteartez, izango da profesionalentzako eguna, eta Lur Berri gelan iragango da osoki. Laugarren aldia da profesionalei egun bat proposatzen zaiela. Marie Andree Ouret Bilketa egitasmoko kide eta egun profesionalaren antolatzaileak «liburu munduan ari diren denetariko profesionalak» deitu ditu biltzera:«Liburuzainak, liburuak argitaratzen dituztenak, liburuak saltzen dituztenak, irakasleak, ikasleak, itzultzaileak, idazleak eta beste guztiak», adierazi zuen.

«Aurtengoa 40. edizioa denez, gai garrantzitsu bat aukeratu dugu egun profesionalerako: euskal literatura klasikoa», gaineratu zuen Ouretek. Hain zuzen, gai aproposa iruditu zitzaien, jakinik Saratik hainbat idazle klasiko ospetsu atera zirela, hala nola Axular eta Etxeberri Sarakoa. Jardunaldi horrekin bi xede nagusi dituztela azaldu du antolatzaileak: «Batetik, profesionalei eskaini nahi zaie formakuntza antzeko bat; bestetik, euskal literatura klasiko horrek gaur egungo gizartean presentzia eskasa duela jorratu nahi dugu». Egun amaieran egingo duten mahai inguruan etorkizunean jorratzeko pistak ateratzen saiatuko dira. «Badakigu zaila izango dela hain galdera konplexuari erantzun bat aurkitzea, baina gutxienez lanerako pista batzuk aurkitzea espero dugu».

GaratekSarako Idazleen Biltzarraren lehen urratsak ere gogoratu zituen: «Amets batetik abiatu zen ideia, idazle euskaldun edota euskal herritarrak biltzearen ametsetik». Handik 40 urtera jardunaldiak zutik irauten duela ikusirik, poztu egiten da elkarteko lehendakaria. «Sarako Biltzarrak ez ditu milaka eta milaka pertsona mugitzen, baina gaur egun argitaletxeek liburuak argitaratzen dituzte egun honetarako; hasieran, ez nuen inoiz pentsatu horretaraino irits zitekeenik».