Albistea entzun

Irekiak: arte garaikideko galerien denboraldiaren hasiera Donostian

Irailaren 10, 11 eta 12an egingo da lehen aldiz. Hiriko sei galeriak DAGGE elkartea sortu dute
Irekiak ekitaldiaren aurkezpena, atzo, Tabakalerako Z aretoan.
Irekiak ekitaldiaren aurkezpena, atzo, Tabakalerako Z aretoan. MAIALEN ANDRES / FOKU Tamaina handiagoan ikusi

Gorka Arrese -

2021eko irailak 2 - Donostia

Bilbon, Parisen, Madrilen edo Berlinen egin ohi duten gisa berean, artearen denboraldi berria abiatze aldera, gallery weekend edo galerien asteburua izango da Donostian lehendabiziko aldiz. Donostiako Arte Galeria Garaikideen Elkarteak (DAGGE), Tabakalerak, Donostiako Udalak eta Gipuzkoako Foru Aldundiak antolatu dute Irekiak ekitaldia, irailaren 10etik 12ra bitartean.

Altxerri, Arteko, Arteztu, Cibrian, Ekain eta Kur galerietan erakusketa berriak zabalduko dituzte; Tabakalerak bi erakusketa abiatuko ditu; eta Kursaal eraikineko fatxadan instalazio bat proiektatuko da ilunabarretan.

Ekain Artelanak galeriako Rita Unzurrunzagak, Altxerri galeriako Javier Baldak, Arte Galerien Elkarteko lehendakari Gregorio Cibrianek, Tabakalerako kultura zuzendari Clara Monterok, Tabakalerako zuzendari nagusi Edurne Ormazabalek eta Donostiako Udaleko Jon Insausti kultura zinegotziak aurkeztu dituzte Irekiak ekitaldiaren asmoak, helburuak eta egitaraua.

Bide batez, DAGGE elkarteak bere burua aurkeztu du estreinakoz jendaurrean.

Arte garaikidearen aldeko konpromisoa erakusteko eta bildumazaletasunari garrantzia emateko, Irekiak ekitaldiko aurreneko egunean arte obren erosketa bana egingo dute lau erakunde hauek: San Telmo museoak, Modus Vivendi bildumak, JNSL bildumak eta Laboral Kutxak.

Erakusketa berriak

Irailaren 10ean, 19:00etan, Donostiako sei arte galeriek erakusketa berriak zabalduko dituzte, denak aldi berean.

Ekain Artelanak aretoan Mikel Casal (Donostia, 1965) eta Juan Ignacio Mendizabal (Donostia, 1964) artisten Declaracion de intenciones (Asmoen adierazpena) izango da.

Altxerri aretoan Irma Alvarez Laviadak (Gijon, Espainia, 1978) Relaciones variables (Erlazio aldakorrak) erakutsiko du; eta Juan Ugaldek (Bilbo, 1958) Zinemaldirako egindako estudioak eta marrazkiak agertuko ditu.

Kur galerian, Jesus Maria Cormanek (Donostia, 1966) Enseres salvajes (Tresna basatiak) zabalduko du.

Cibrian galerian, You may come full circle (Zirkulu osoa egin dezakezu) erakusketa osatuko da lau artistarekin: Jose Ramon Amondarain (Donostia, 1964), Katinka Bock (Frankfurt, Alemania, 1976), Leandro Feal (Habana, 1986) eta Esther Gaton (Valladolid, Espainia, 1988).

Aztertun, Oaia Peruarena Telletxeak (Bera, Nafarroa, 1972) Bilketa margoak erakutsiko ditu.

Eta Arteko galerian, Cuerpos de tinta y siluetas de algoritmos (Tinta gorputzak eta algoritmo ingeradak) erakusketa apailatuko dute Angel Perisek (Valentzia, Herrialde Katalanak, 1993) eta Jaime de los Riosek (Donostia, 1982).

Sei arte galeria horietan bisita gidatuak egingo dituzte irailaren 11n eta 12an. Lau saio izango dira, bi euskaraz eta bi gaztelaniaz, 11:00etan eta 17:00etan. Maite Intxausti eta Irene Mendia izango dira gidariak.

Tabakalerak ere bi erakusketaren irekiera egingo du irailaren 10ean: alde batetik, Zin Ex - Gorputza eta arkitektura; bestetik, Chris Kraus - Pelikulak lehen eta gero, Kraus (New York, AEB, 1955) artistaren film guztien bildumarekin.

Bestalde, hiru egunetan, Kursaal eraikineko fatxadan Jaime de los Riosek Medialab Tabakaleraren laborategian sortutako Crimson Waves (Olatuak oskorrian) pieza proiektatuko da ilunabarretik gauerdira arte. Natura eta hiria, islak eta olatuak agertuko ditu Rafael Moneoren arkitekturaren gainean. Instalazioak 35 minutuko iraupena du.

Irekiak egitarauaren barruan Eduardo Txillidari buruzko ikastaro bat txertatu dute, hilaren 10ean, 9:00etan, Txillida Lekun.

Elkartearen aurkezpena

Donostiako Arte Galeria Garaikideen Elkartea 2021eko urtarrilean sortu zuten hiriko sei galeriak: Altxerri, Ekain, Kur, Cibrian, Arteko eta Arteztu. Elkartearen egitekoak eta helburuak aurkeztu dituzte orain, zortzi puntu hauetan laburbilduta:

Bat. Arte garaikidea sustatzea, eta arte galerien lana ezagutaraztea hirian, azoketan, artisten truke eta sustapen ekitaldietan.

Bi. Artisten sorkuntza plastikoa erakustea, ekoiztea eta komunikatzea.

Hiru. Artisten eta ikusleen artean bitartekari espezializatuak izaten jarraitzea.

Lau. Artearen sentsibilizazioarekin eta artista garaikideen zabalkundearekin lotutako ekitaldiak sustatzea eta, honenbestez, kulturaren arloan aktoreak eta partaideak izatea.

Bost. Jendaurrean galerien presentzia indartzea, eta egungo artea ezagutarazteko programa didaktikoak garatzea.

Sei. Galerien indarrak batzea, solaskidetza errazteko administrazioekin, erakunde publikoekin eta pribatuekin, eta arte arloko beste eragile batzuekin; eta haiekin batera programak koordinatzea.

Zazpi. Arte bilduma publikoak berraktibatzeko eta horiek emendatzeko aurrekontuak eta irizpideak ezartzen laguntzea; horretarako, erakusketak eta artistak eskaintzen dituzte galeriek, baita bitartekaritza profesionala ere.

Zortzi. Galeristen lan profesionala aintzatesteko marka komun bat sortuko du DAGGE elkarteak, eta ekintza bateratuak sinkronizatuko eta ordezkatuko ditu.

Datorren astean izango den Irekiak ekitaldiaren lehen aldi horren ostean, arteaz eta galeriez jardunaldi batzuk antolatzea izango dute hurrengo asmoa, Gregorio Cibrianek adierazi duenez.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Aitor Mendiluze eta Amets Arzallus, atzo, elkarrekin kantuan, hamarreko txikiko ariketan. ©MARISOL RAMIREZ / FOKU

Ez da ate ondoan geratu

Miren Mujika Telleria

Amets Arzallusek Bilbon irabazi ondoren, erabakita gelditu da finala. Harekin batera ariko dira Illarregi, Ibarzabal, Gaztelumendi, Colina, Mendiluze, Martin eta Lujanbio
<em>Titanic Rising</em> diskoan abiatutako bidean segitzen du Weyes Blood-ek disko berrian. ©BERRIA

Dirdira iluntasunean

Mikel Lizarralde

Folkaren eta pop barrokoaren artean mugitzen diren kantuen bitartez, Weyes Bloodek gaur egungo ajeetan arakatu du 'And In The Darkness, Hearts Aglow' diskoan.

Soinu txikia XIX. mendearen amaieran hedatu zen Euskal Herrian. ©BERRIA

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...