Espekulazioaren kontra protesta egin dute Maulen

Etxe agentzien espekulazioaren aurka mobilizatu ziren atzo Maulen dozenaka lagun. Euskal Herria ez da salgai leloa eraman zuten pankartan manifestariek, etxebizitzaren espekulazioa salatzeko. Maulen diren etxe agentzien inguruan itzuli bat eginez osatu zuten manifestazioaren ibilbidea, plazatik hasita. Egiten duten gisa bereko bigarren mobilizazioa izan zen atzokoa.

XEKK Xiberuko Espekulazioaren Kontrako Kolektiboak antolatu zuen manifestazioa. Ibilbidean, kolektiboko kideek hartu zuten hitza, etxebizitzaren arazoa barnealdera ere hedatu dela azaltzeko. «Zuberoa ez bada oraindik ere kostaldeko etxebizitzen prezioetara heltzen, ez dezagun uste horrelako prezioak ez zaizkigula hona heltzen ahal», erran zuen, kasurako, Serge Agerre kideak. Gehitu zuen laborantza lurrak eraikigarri gisa saltzen direla ere batzuetan. «Etxebizitzaren prezioek eta lansariek ez dute ber bidea hartu», trenkatu zuen.

Besteak beste, L'Immobilier Souletin izeneko agentziaren aitzinean gelditu ziren. «Ez dugu onartzen Zuberoa urtean zehar bigarren etxebizitza hutsez betea izanen den lurraldea izatea», adierazi zuen XEKK kolektiboko kide François Plagnardek. Ildo beretik mintzatu zen Claudine Arantzet: «Gazte anitzendako ez da aise leku baten atzematea, eta erretreta ttipiak dituzten zaharrendako ere ez. Alta, ez dute jauregi bat xerkatzen, justu etxe batedo apartamentu ttipi bat, lasaiki bizitzeko». Halaber, salatu zuen etxe agentziek eta bankuek erosleen edo bizitegi bat alokatu nahi dutenen hautatzeko sistemak jende xumeak bazter uzten dituela. «Jabeek dosier hoberena hautatzen dute. Nora joanen dira beste jendeak?», galdetu zuen. Herriko etxe aitzinean bildu ziren gero, «etxe hutsik ez, teilatu bat denentzat!» aldarrikatuz.