Iruditeria berriak

Irudi edizioa eta sorkuntza digitala asko aldatzen ari da. Digitalizazioa aspaldi iritsi zen arlo horretara, baina aldaketak bizkortzen ari dira orain. Photoshop-ek suposatu zuen aldaketaren tamainako aldaketak gertatzen ari dira adimen artifizialari eta diseinurako tresna errazei esker.

Hardwareak ere aldaketa handiak ekarri zituen tableta digitalizatzaileekin, baina orain softwarearen txanda da berriro. Photoshop eta Illustrator programek izango dituzte eguneraketak, eta aldaketek bertan ere eragingo dute. Software libreko Gimp eta Inkscape ere berrituko dira, mantsoagoa izango den arren. Hala ere, aldaketak hortik kanpo ematen ari dira.

Alde batetik, diseinu profesionalak era errazago batean egiteko software eta zerbitzu oso onak sortu dira. Horien artean ezagunena Canva.com da. Aurrez definitutako diseinuak moldatuz, kalitate altuko emaitzak sortzeko aukera ematen du ordainpeko zerbitzu horrek. Berezitasuna bere erraztasunean dago: ezer asko jakin gabe, gauza politak egin ahal dira. Orain oso maila altua eskaintzen duen Penpot.app ere badago. Antzeko funtzionaliteak eskaintzeaz gain, software libreko zerbitzua ere bada.

Bestetik, adimen artifizialaren lurrikarak irudi edizioan eta sorkuntzan eragin zuzena izango du. Arlo horretan tresna desberdinak sortzen ari dira: batzuk aipatzearren, Stable Difussion, Open Journey edo Anime AI. Denek antzeko funtzionamendua dute: testu bat txertatu eta bere modeloak irudi bat edo irudi sorta bat eskainiko digu. Kasu batzuetan, eskainitakoetatik aukeratu eta hainbat parametro aldatzeko aukera ere eskaintzen dute.

Tresna horiek guztiak gero eta integratuagoak egongo dira. Instalatzen diren programek ere txertatu dituzte adimen artifizialetik eratorritako tresnak. Tresnek zerbitzu errazenek eskaintzen dituzten zenbait aukera ere barneratuko dituzte. Aldaketa garrantzitsuena sormenari lotutakoa izango da.

Gauza ezberdinak egitea gero eta zailagoa izan daiteke. Edo kontrara, erraztasunak baliatuta jende gehiago iritsi daiteke lehen iristen ez zen tokietara. Tentagarria da ezkortasunean kokatzea. Neoliberalismo homologatzaile eta efizientziaren markoak stock argazki eta irudietan gintuen murgilduta. Orain horretan sakondu edo aire freskoa ekartzeko ordua da, makinen gainetik.