Oraingoan bai

Armiarma sarez josia dagoen euskarazko telebistaren zirrikitu batetik Primeran izeneko argi izpi bat sartu da. Izpi horri, oraindik txikia bada ere, etorkizunean euskaldunon telebista guztiak argitzeko moduko indarra izan dezakeela antzematen diot. Primeran iritsi da, eta, argalguneak dituen arren, oso pozik nago!

Egun ditugun plataformekin alderatuz gero, esango nuke Netflixekin dituela antzekotasun gehien. Ez edukiari dagokionez, noski, baina bai interfazearen abiadurari, edukien argitasunari eta nabigatzeko erraztasunari dagokionez. Hori guztia primeran dago [begi-keinua], baina benetan axola zaiguna edukia da. Beraz, gatozen harira. Nostalgikoenentzat polita da «Gernikako piperrak miseraz beteak! Eta kito!!» berriro oihukatzeko aukera izatea, Maria Luisa Galardiren eszena ahaztezinak berrikustea, euskal zinemaz gozatzea edota Eskandinaviako edukien 400 ordu horien barruan murgiltzea. Suspense maratoia, Talentu gazteak... multzo tematiko horiek sortzea ere ideia bikaina da. Zer esanik ez zenbat gozatuko dugun dokumentalen txokoarekin. Nire ustez, ordea, epe luzera begira, eduki mota horrekin ezinezkoa izango da plataformarekiko atxikimendua sortzea, eta are gutxiago publiko hori gaztea bada. Ekoizpen propio berriak eta eduki esklusiboen aldeko apustu irmoa behar direla uste dut. HBOra The Sopranos berriro ikustearen aitzakiaz harpidetzen denak, ondoren beste zerbait gehiago beharko du, ez du plataformarekiko bizi osoko fideltasuna erakutsiko Tony Soprano behin eta berriro ikusteagatik soilik. Badakit mundu mailako telesail mediatiko baten eskubideak lortu daitezkeela pentsatzea utopikoa dela, horregatik, Filminen eredua aplikagarriagoa eta errealistagoa iruditzen zait.

Berriki estreinatu da Primeran, eta faltan nabaritzen ditudanak aipatzea bidegabea irudituko zaizue. Baina maite duzun norbaiti potentzialtasuna ikusten diozunean bezala da; animatu egin behar zaio hasieran, indarra eman, baina hobetu ditzakeen gauzak ere zintzotasunez aitortu behar zaizkio. Pozik nago, uste dudalako, oraingoan bai, argi honek benetako indarra izango duela eta euskaldunon erreferentziazko plataforma izango dela. Baina mesedez, faborez, arren eta otoi, ez dadila beste saiakera hutsal horietako bat izan.