Albistea entzun

Beste uda batez Galeuscan

Bederatzi idazleri narrazio bana kaleratuko die BERRIAk igandetik aurrera; Arantxa Iturberi lehenik
Aintzane Usandizaga, Kirmen Uribe eta Arantxa Iturbe idazleak izango dira aurten BERRIAko udako narrazioetan ariko diren euskal idazleak.
Aintzane Usandizaga, Kirmen Uribe eta Arantxa Iturbe idazleak izango dira aurten BERRIAko udako narrazioetan ariko diren euskal idazleak. BERRIA Tamaina handiagoan ikusi

Itziar Ugarte Irizar -

2022ko uztailak 1

Narrazio bat igandeko. Azken urteetan, hitzordu finko bilakatu da BERRIAren kultur orrietako eskaintza udatiarrean, eta hala izango da beste urte batez ere. Bederatzi narraziok osatuko dute aurtengo kontakizunen katea: Galiziako hiru idazlek, Herrialde Katalanetako hiru idazlek eta Euskal Herriko beste hiru idazlek. Zehazki, Xose Manuel Martinez Oca, Mario Regueira eta Nee Barros izango dira egile galegoak; Gemma Pasqual, Nuria Bendicho eta Aina Fullana Llull katalanak; eta Arantxa Iturbe, Kirmen Uribe eta Aintzane Usandizaga, berriz, euskaldunak. Jatorriz galegoz eta katalanez idatzitakoak euskaraz kaleratuko ditu gero BERRIAk —Iñigo Roquek itzuliko ditu galegozko testuak eta BERRIAko Euskara Taldeak katalanezkoak—, eta berdin egingo dute Galiziako Nòs eta Kataluniako Vilaweb hedabideek ere, bakoitzak bere hizkuntzara eramanda beste bi herrialdeetako idazleen narrazioak.

Arantxa Iturberen Ikusten izango da katea abiatuko duena, igande honetan bertan, eta Joseba Beramendi Exprai ilustratzailearen irudiak osatuko du, baita ondotik helduko diren narrazioak ere. Irratian aritzen da egunero Iturbe (Alegia, Gipuzkoa, 1964), baina ibilbide oparoa du literaturan ere; antzerkian eta narrazio laburrean, batik bat.

Iturberenaren ostean, Kirmen Uribe (Ondarroa, Bizkaia, 1970) eta haren istorioa helduko dira uztailaren 10ean. Poesia bilduma bi eta, batik bat, nobela publikatu du Uribek, eta Izurdeen aurreko bizitza (Susa, 2021) du orain arteko lanik berriena.

Album ilustratu bat (Etxe honetan, Pamiela) eta ipuin liburu bat (Kabitu ezina, Elkar) urte berean eman zituen, bestalde, Aintzane Usandizagak (Lasarte-Oria, Gipuzkoa, 1988), 2019an, eta Esther Ferrer artistaren jiran ondutako (Ia) guztia moztu eta itsats daiteke argitaratu du berriki, Pamielarekin eta Aran Santamariaren irudiekin osatuta. Uztailaren 17an argitaratuko du BERRIAk haren udako narrazioa.

Katalanen adarrean, Gemma Pasqual (Almoines, 1967) aurreko mendearen hondarretan hasi zen publikatzen, eta obra zabala eta dozenaka sari bildu ditu ordutik; Nuria Bendichok (Bartzelona, 1995) debut oso txalotua egin zuen iaz Terres Mortes eleberriarekin —Anagrama sarirako finalista izan zen—; eta Aina Fullanak ere (Manacor, Mallorca, 1997) irakurle askoren interesa piztu du Els dies bons lehen nobelarekin.

Eta ugaritasuna hiru egile galegoen artean ere: dozena lanetik gora ditu emanak Xose Manuel Martinez Ocak (A Estrada, 1942); narratiba eta poesia artean aritzen da Mario Regueira (Ferrol, 1979); eta Identidade da Nee Barrosen (Ourense, 2002) estreinako lana, antzezlan bat.

2004an hasi zen BERRIA udako igandetan euskal idazleen narrazioak argitaratzen, irudiekin batera. 2019an hasi zuen, ondoren, Vilaweb-ekin elkarlana, eta 2020an batu ziren galegoak. Iaz, gaelikoz idazten duten hiru idazleren lanak ere argitaratu ziren.

Bertso jarriak ere bueltan

Bertso jarriak iaz heldu ziren egunkariaren udako orrietara, eta horiek ere segida izango dute aurten. Larunbatetan argitaratuko dira, eta askotariko gaien bueltan eta askotariko doinuen erritmora joango da beste kate bat txirikordatzen horrela. Bihar izango da lehena, Oihana Arana idazle eta bertsolariaren eskutik, eta irakurtzeko soilik ez, entzuteko modua ere izango da BERRIAren webgunean. Parte hartuko dute, besteak beste, Irati Alcantarilla, Andere Arriolabengoa, Beñat Astiz, Jexux Mari Irazu, Paule Ixiar Loizaga, Gorka Pagonabarraga, Johaiñe Sarraillet eta Ekhiñe Zapiainek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Mugan musika taldea, disko berria argitaratu baino lehenago. ©PABLO CLEMENTE

Indarrez jantzitako doinu eztiak

Miren Mujika Telleria

Mugan taldeak zazpi kanturekin osatu du 'Bizirik ez bagaude', bere ibilbideko lehen diskoa

Errealitatea eta alegiazko munduak nahasten dira <em>Itsasotik</em> ikuskizunean. ©DONOSTIAKO MUSIKA HAMABOSTALDIA
Michel Piccoli eta Romy Schneider aktoreak, Sauteten 'Les choses de la vie' filmean (1970). ©Donostiako Zinemaldia

Sauteten hamahiru film bildu ditu Zinemaldiak hari eskainitako zikloan

Leire Perlines Apalategi

Zinemagile eta gidoigile frantsesaren obra aztertuko du jaialdiak aurten, haren atzera begirakoan. Zikloaren osagarri, zuzendariari egindako elkarrizketekin osatutako liburu bat plazaratuko dute.

Olivia Newton-John Ikerketa Onkologikoen Institutuak antolatutako ekitaldi batean ©MICK TSIKAS / EFE

Olivia Newton-John hil da, 'Grease' filmeko aktorea

Lide Egizala Urteaga

Sandy Olsen pertsonaiari eman zion bizitza Grease pelikulan. 30 urte zeramatzan bularreko minbiziaren aurkako borrokan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...