Osagaiak edozelan hautatuta

Modan jarri den plater hau denen ahotan dago. Poke bowl izena du, eta jatorria Hawaiin dauka (AEB). Sare sozialetan joera berria bihurtu da, eta zenbaitek sushi jakiaren hobekuntzatzat jo dute, arrain gordinari bestelako osagaiak gehituta prestatzen baita. Erraz prestatzen da, eta horri zor zaio, hain zuzen, plateraren arrakasta. Azkar kozinatu daiteke, eta jateko samurra da.

Poke hitzak sekzio edo ebaki esan nahi Hawaiin. Arrain gordinezko entsalada bat da funtsean, eta Hawaiiko sukaldaritzan aperitibo antzera edo plater nagusi gisa ematen da. Forma tradizionalak aku —atun zerrendatua— eta he'e —olagarroa— osagaiak ditu. He'e pokeari japonierazko tako poke deitzen zaio, Ni'ihau uhartean izan ezik, han hawaiieraz hitz egiten baita. Ahi pokea, zeina gero eta ezagunagoa baita, hegats horiko atunarekin prestatzen da. Aldaera batzuek izokin gordina edo itsaskiak izan ditzakete osagai nagusi gisa, eta gordinik erabiltzen dira pokearen ongailu komunak.

Ohiko jana, merkaturatua

Jatorrizko hawaiiarrek beti jan izan dute pokea, baina inoiz ez modu komertzialean. Hastapenetan, indarberritzeko plater azkar gisa jaten zuten. Pokearen egungo forma, ostera, 1970eko hamarkadan hedatu zen. Azalik eta hezurrik gabeko arraina xerratan ebakita. Sashimia edo arrain gordin japoniarra, wasabiarekin —Japoniako errefau berde mina— eta soja saltsarekin zerbitzatua, ohikoa da gaur egun ere Hawaii uharteetan. Bertsiorik oinarrizkoenak atun zatiekin edo tokian tokiko osagaiez gazitutako beste arrain batzuekin eginak dira, baina, denborarekin, beste sukaldaritza batzuetako eraginak hartu ditu: Japoniako edo Indiako jakienak, besteak beste.

Ohiko pokea arrain txikitu hezurgabetua da. Hezurraren noranzkoari jarraituz, xerratan mozten da, eta ongailu tradizionalekin zerbitzatzen: itsas gatzarekin, algekin eta limuarekin. XIX. mendean gehitu zizkioten barazkiak, tomateak eta tipulak; Maui kipula osagai arrunta da.

2010eko hamarkadatik aurrera, pokea gero eta ezagunagoa egin zen Ipar Amerikan eta Europan. 2014-2016 urteen artean, bikoiztu egin ziren jatetxeak: 342tik 700eraino.

Bertsio modernoa bol erara zerbitzatzen da, eta osagaiak, nahasirik egon ordez, multzokatuta daude. Nahierara erabaki litezke: ahuakatea, ponzu saltsa, teriyaki saltsa, txanpiñoiak, kipula kurruskariak, jalapeñoa, sriracha saltsa, martorria, anana edo pepinoa, esaterako. Hawaiiko ohiko pokea ez bezala, estilo kontinentala ez da aurrez irineztatua egoten: saltsekin nahierara prestatzen da. Gaur egungo poke jatetxe gehienetan, ontzia erabat pertsonaliza daiteke, oinarritik arrainaren adoboraino. Beste itsaski batzuk ere erabil daitezke, baina atuna da ezagunena.

Jateko araurik gabe

Poke modernoa honelakoa izan ohi da: ahi —hegats horiko atuna—kuboetan moztua, Hawaiiko itsas gatzarekin marinatua; shoyu kantitate txiki bat—soja saltsa—; inamona —kukui intxaur errea eta birrindua—, sesamo olio apur bat, limukohu alga eta pipermin hawaiiar xehatua. Beste aldaera batzuk ere izan daitezke: tako —olagarroa— ondua, beste hegalabur gordin mota batzuk, izokin gordina eta beste sashimi mota batzuk, Maui tipula xerratan edo kubotan, furikakea, saltsa mina —sambal olek—, tomate xehatua, tobikoa—arrabak—, ogo edo beste alga mota batzuk, eta berakatza.

Poke bowl-a jateko araurik ez dago. Batzuek nahiago dute osagaiak nahastu; beste batzuek, aurkezpen ordenari eutsi. Eta gauza bertsua erabili beharreko tresnekin: zotzak erabiliko dituzte zenbaitek, sardexka besteek.